ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານ ເຮັດໃຫ້ກົມຈັກການຈັດຕັ້ງມີຄວາມໜັກແໜ້ນເຂັ້ມແຂງ ແລະ ເປັນການເພີ່ມທະວີກຳລັງແຮງຂອງກະຊວງການຕ່າງປະເທດ ໃນການຈັດຕັ້ງປະຕິບັດໜ້າທີ່ການເມືອງ ແລະ ການຕ່າງປະເທດໃນໄລຍະໃໝ່ ແລະ ອີງໃສ່ດຳລັດຂອງນາຍົກລັດຖະມົນຕີ ແຫ່ງ ສປປ ລາວ ວ່າດ້ວຍການແຕ່ງຕັ້ງຫົວໜ້າກົມ ສະບັບເລກທີ 331, 332, 333/ນຍ, ລົງວັນທີ 09 ກັນຍາ 2016.

ໃນວັນທີ 4 ມັງກອນ 2017, ທີ່ ກະຊວງການຕ່າງປະເທດ ໄດ້ຈັດພິທີມອບ-ຮັບໜ້າທີ່ຕຳແໜ່ງຫົວໜ້າກົມ ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ, ມີບັນດາທ່ານຄະນະນຳກະຊວງ, ຫົວໜ້າກົມ, ຮອງຫົວໜ້າກົມ ແລະ ແຂກຖືກເຊີນ ເຂົ້າຮ່ວມຈຳນວນ 25 ທ່ານ. ພິທີໃນຄັ້ງນີ້ ໄດ້ມີການມອບ-ຮັບຕຳແໜ່ງຂັ້ນກົມ ຈຳນວນ 3 ກົມຄື:

1. ສະຖາບັນການຕ່າງປະເທດ: ລະຫວ່າງ ທ່ານ ຢົງ ຈັນທະລັງສີ, ຫົວໜ້າສະຖາບັນການຕ່າງປະເທດ ຜູ້ເກົ່າ ກັບ ທ່ານ ທ່ຽງ ບຸບຜາ, ຫົວໜ້າສະຖາບັນການຕ່າງປະເທດຜູ້ໃໝ່.
2. ກົມອາຊີ-ປາຊີຟິກ ແລະ ອາຟຣິກາ: ລະຫວ່າງ ທ່ານ ວິໂຣດ ສູນດາລາ, ຫົວໜ້າກົມ ຜູ້ເກົ່າ ກັບ ທ່ານ ນາງ ຟອງສະໝຸດ ອັ່ນລາວັນ, ຫົວໜ້າກົມ ຜູ້ໃໝ່.
3. ກົມອົງການຈັດຕັ້ງສາກົນ: ລະຫວ່າງ ທ່ານ ຄຳອິນ ຄິດຈະເດດ, ຫົວໜ້າກົມ ຜູ້ເກົ່າ ກັບ ທ່ານ ອານຸພາບ ວົງໜໍ່ແກ້ວ, ຫົວໜ້າກົມ ຜູ້ໃໝ່.

ໃນໂອກາດດັ່ງກ່າວ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ບັນດາທ່ານຫົວໜ້າກົມ ທີ່ໄດ້ຮັບການແຕ່ງຕັ້ງໃໝ່ ແລະ ຕໍ່ຫົວໜ້າກົມ ທີ່ໄດ້ຮັບການແຕ່ງຕັ້ງໃຫ້ເປັນ ເອກອັກຄະລັດຖະທູດ ແຫ່ງ ສປປ ລາວ ປະຈຳຢູ່ຕ່າງປະເທດ, ພ້ອມທັງເນັ້ນໜັກໃຫ້ຈົ່ງເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ, ຕັ້ງໜ້າຝຶກຝົນຫຼໍ່ຫຼອມຕົນເອງທາງດ້ານທິດສະດີ, ແນວທາງນະໂຍບາຍຂອງພັກ-ລັດ, ການຊີ້ນຳ-ນຳພາດ້ານວຽກງານວິຊາສະເພາະ, ວຽກງານຄົ້ນຄວ້າໃຫ້ມີລັກສະນະເລິກເຊິ່ງ ໃນການເປັນເສນາທິການໃຫ້ແກ່ຂັ້ນເທິງ ໃນການຈັດຕັ້ງປະຕິບັດແນວທາງການຕ່າງປະເທດ ໃຫ້ບັນລຸຜົນສຳເລັດ ໂດຍສະເພາະແມ່ນການບຸກທະລຸ ການທູດປ້ອງກັນເຫດ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອການເຊື່ອມໂຍງພາກພື້ນ ແລະ ສາກົນຂອງປະເທດເຮົາໃນໄລຍະໃໝ່.

ໃນວັນທີ 28 ທັນວາ 2016, ກະຊວງການຕ່າງປະເທດ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານ ປະຈໍາປີ 2016, ທີ່ ກະຊວງການຕ່າງປະເທດ, ພາຍໃຕ້ການເປັນປະທານຂອງ ທ່ານ ສະເຫຼີມໄຊ ກົມມະສິດ, ກໍາມະການສູນກາງພັກ, ລັດຖະມົນຕີກະຊວງການຕ່າງປະເທດ, ໂດຍມີບັນດາຮອງລັດຖະມົນຕີ, ຄະນະກົມ, ພະນັກງານອາວຸໂສບໍານານ ພ້ອມດ້ວຍພະນັກງານພາຍໃນກະຊວງການຕ່າງປະເທດ ແລະ ແຂກຖືກເຊີນ ເຂົ້າຮ່ວມ.

    ໃນ​ວັນ​ທີ 27 ທັນ​ວາ 2016, ທີ່​ກະ​ຊວງ​ການ​ຕ່າງ​ປະ​ເທດ ໄດ້​ຈັດ​ກອງ​ປະ​ຊຸມ​ສຳ​ມະ​ນາວິທະຍາສາດ​ ພາຍ​ໃຕ້​ຫົວ​ຂໍ້ ທ່າອ່ຽງ ແລະ ທ່າ​ຂະ​ຫຍາຍ​ຕົວ ຂອງສະ​ພາບ​ການ​ພາກ​ພື້ນ ແລະ​ ສາ​ກົນໃນສະພາບການໃໝ່. ໃຫ້​ກຽດ​ເຂົ້າ​ຮ່ວມ​ບັນ​ຍາຍ ແລະ ເປັນປະທານກອງປະຊຸມສຳມະນາວິທະຍາສາດ ຄັ້ງນີ້ມີ​ ທ່ານ ສົມ​ສະ​ຫວາດ ເລັງ​ສະ​ຫວັດ, ອະ​ດີດ​ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ອະດີດຮອງນາຍົກລັດຖະມົນຕີ, ທີ່ປຶກສາຄະນະບໍລິຫານງານສູນກາງພັກ ດ້ານວຽກງານພຶດຕິກຳທິດສະດີ ແລະ ແນວຄິດໄກສອນພົມວິຫານ; ທ່ານ ສະ​ເຫລີມ​ໄຊ ກົມ​ມະ​ສິດ,​ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ຄະນະພັກຄະນະນຳກະຊວງການຕ່າງປະເທດ; ທ່ານ ອາ​ລຸນ​ແກ້ວ ກິດ​ຕິ​ຄຸນ, ລັດ​ຖະ​ມົນ​ຕີ​ປະ​ຈຳ​ສຳ​ນັກ​ງານ​ນາ​ຍົກ; ທ່ານ ພົງ​ສະ​ຫວັດ ​ບຸບ​ຜາ, ອະ​ດີດ​ລັດ​ຖະ​ມົນ​ຕີ​ປະ​ຈຳ​ສຳ​ນັກ​ງານ​ປະ​ທານ​ປະ​ເທດ; ເອກອັກຄະລັດຖະທູດ, ກົງສຸນໃຫຍ່, ຄະ​ນະ​ກົມ​ພາຍ​ໃນ​ກະ​ຊວງ, ບັນ​ດາ​ຫົວ​ໜ້າ​ສຳ​ນັກ​ງານ​ການ​ທູດ​ລາວ​ທີ່​ຕ່າງ​ປະ​ເທດ​ເຂົ້າ​ຮ່ວມ​ຮັບ​ຟັງ ແລະ ປະກອບຄຳເຫັນ.