ໂດຍຕອບສະໜອງຕາມຄໍາເຊີນຂອງ ທ່ານ ສະເຫລີມ ໄຊກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ ຟ້າມ ບິ່ງ ມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ ພ້ອມດ້ວຍພັນລະຍາ ແລະ ຄະນະຜູ້ແທນຈາກກະຊວງການຕ່າງປະເທດ ໄດ້ເດີນທາງມາຢ້ຽມຢາມສປປລາວຢ່າງເປັນທາງການ ໃນລະຫວ່າງວັນທີ 24-26 ທັນວາ 2016.

ໃນຕອນບ່າຍຂອງວັນທີ 26 ທັນວາ 2016, ພິທີຕ້ອນຮັບທາງການໄດ້ຈັດຂຶ້ນທີ່ກະຊວງການຕ່າງປະເທດ ໂດຍການຕ້ອນຮັບຂອງ ທ່ານ ສະເຫລີມ ໄຊກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ຫລັງຈາກນັ້ນ ກໍໄດ້ມີພິທີພົບປະສອງຝ່າຍ ລະຫວ່າງສອງກະຊວງການຕ່າງປະເທດ ລາວ-ຫວຽດນາມ. ໃນການພົບປະສອງຝ່າຍ ໄດ້ທົບທວນຄືນ ກ່ຽວກັບ ການພົວພັນຮ່ວມມືຂອງສອງປະ​ເທດ ລາວ-ຫວຽດນາມ ​ແລະ ຂອງ​ສອງກະຊວງການຕ່າງປະເທດ ໃນຊຸມປີຜ່ານມາ ແລະ ປຶກສາຫາລືແຜນການຮ່ວມມືໃນຊຸມປີຕໍ່ໜ້າ​ ໂດຍ​ສະ​ເພາະ​ໃນ​ດ້ານການພົວພັນການເມືອງ, ການພົວພັນຮ່ວມມືດ້ານເສດຖະກິດ, ວຽກງານປ້ອງກັນຄວາມສະຫງົບ-ປ້ອງກັນຊາດ, ​ວຽກງານຊາຍແດນ ​ແລະ ສະ​​ເພາະ​ຂອງ​ສອງ​ກະຊວງ​ການ​ຕ່າງປະ​ເທດ ລາວ-ຫວຽດນາມ. ພ້ອມກັນນັ້ນ, ສອງຝ່າຍ ຍັງໄດ້ແລກປ່ຽນຄຳຄິດຄຳເຫັນ ກ່ຽວກັບ ສະພາບການທີ່ພົ້ນເດັ່ນໃນພາກພື້ນ ແລະ ສາກົນ ທີ່​ຕ່າງ​ຝ່າຍ​ຕ່າງ​ສົນ​ໃຈ ​ແລະ ​ໃນ​ປີ 2017 ທີ່​ຈະ​ມາ​ເຖິງ​ນີ້ ສອງ​ປະ​ເທດ ລາ​ວ-ຫວຽດນາມ ຈະ​ຈັດ​ກິດຈະກຳ​ສະ​ເຫລີ​ມສະຫລອງ​ສອງ​ວັນ​ປະຫວັດ​ສາດ​ຄື ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ລາວ-ຫວຽດນາມ ຄົບຮອບ 55 ປີ ​ແລະ ວັນ​ເຊັນ​ສົນທິສັນຍາ​ມິດຕະພາບ ຄົບຮອບ 40 ປີ.

ພາຍຫລັງສຳເລັດການພົບປະດັ່ງກ່າວ, ກໍໄດ້ມີພິທີມອບໃບປະກາດປະລິນຍາເອກກິດຕິມະສັກດ້ານ​ການ​ພົວພັນ​ຕ່າງປະ​ເທດ ໃຫ້ແກ່ ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ເຊິ່ງມອບໂດຍ ທ່ານ ຫງວຽນ ຫວູ ຕຸ່ງ, ຫົວໜ້າສະຖາບັນການຕ່າງປະເທດຂອງຫວຽດນາມ, ໂດຍການເຂົ້າຮ່ວມຂອງ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດແຫ່ງ ສສ. ຫວຽດນາມ, ພ້ອມດ້ວຍຄະນະທາງການຂອງສອງກະຊວງການຕ່າງປະເທດ.

ໃນວັນດຽວກັນ, ທ່ານຟ້າມບິ່ງມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ, ກໍໄດ້ເຂົ້າຢ້ຽມຂ່ຳນັບ ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ທີ່ ທໍານຽບປະທານປະເທດ ແລະ ເຂົ້າຢ້ຽມຂ່ຳນັບ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ທີ່ສໍານັກງານນາຍົກລັດຖະມົນຕີ, ຊຶ່ງ​ທັງ​ສອງ​ຝ່າຍ​ຕ່າງ​ກໍ​ມີ​ຄວາມ​ຍິນ​ດີ ​ແລະ ຊົມ​ເຊີຍ ​ຕໍ່​ຄວາມ​ສາມັກຄີ​ພິ​ເສດ ​ແລະ ການ​ພົວພັນ​ຮ່ວມ​ມື​​ຮອບດ້ານ ລະຫວ່າງ ສອງ​ພັກ-​ສອງ​ລັດ ກໍ​ຄື​ ປະຊາຊົນ​ສອງ​ຊາດ ລາວ-​ຫວຽດນາມ ທີ່​ນັບ​ມື້​ນັບ​ຂະຫຍາຍ​ໂຕ​ຍິ່ງ​ຂຶ້ນ.