ໃນວັນທີ 22-23 ທັນວາ 2016, ຄະນະຜູ້ແທນ ສປປ ລາວ ນໍາໂດຍ ທ່ານ ສະເຫລີມໄຊ ກົມມະສິດ, ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບ ການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ທີ່ ສຽມຣຽບ, ລາຊະອານາຈັກ ກໍາປູເຈຍ, ພາຍໃຕ້ການເປັນ ປະທານຮ່ວມ ຂອງ ທ່ານ ປຣາກ ໂຊຄົນ (PRAK Sokhonn), ລັດຖະມົນຕີອາວຸໂສ, ລັດຖະມົນຕີກະຊວງ ການຕ່າງປະເທດ ແລະ ການຮ່ວມມືສາກົນ ແຫ່ງ ລາຊອານາຈັກກໍາປູເຈຍ ແລະ ທ່ານ ຫວາງ ອີ້ (Wang Yi), ລັດຖະ ມົນຕີກະຊວງການຕ່າງປະເທດ ແຫ່ງ ສປ ຈີນ ແລະ ມີບັນດາລັດຖະມົນຕີຕ່າງປະເທດ ແລະ ຄະນະຜູ້ແທນ ຂອງ 6 ປະເທດສະມາຊິກ ຄື: ກຳປູເຈຍ, ສປ ຈີນ, ສປປ ລາວ, ມຽນມາ, ໄທ ແລະ ສສ. ຫວຽດນາມ ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ໄດ້ຕີລາຄາສູງຕໍ່ຄວາມຄືບຫນ້າ ຂອງການຈັດຕັ້ງຜັນຂະຫຍາຍຖະແຫລງການຊານຢາ ຂອງກອງປະຊຸມຜູ້ນໍຳຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1 ໂດຍສະເພາະ ໄດ້ມີການກຳໜົດກົນໄກ ແລະ ສ້າງຕັ້ງກອງປະຊຸມຫນ່ວຍງານ ຂອງ 5 ຂະແຫນງການຮ່ວມມື ຄື: ການເຊື່ອມຈອດ, ການສ້າງຄວາມອາດ ສາມາດໃນການຜະລິດ, ຊັບພະຍາກອນນໍ້າ, ເຂດເສດຖະກິດຊາຍແດນ, ກະສິກໍາ ແລະ ການຫລຸດຜ່ອນຄວາມທຸກຍາກ; ໂຄງການເຫັນຜົນໄວ ໄດ້ຖືກຈັດຕັ້ງປະຕິບັດ ແລະ ມີຄວາມຄືບຫນ້າ ເປັນຢ່າງດີ. ສໍາລັບໂຄງການເຫັນຜົນໄວ ຂອງສປປ ລາວ ກໍໄດ້ຖືກຈັດຕັ້ງປະຕິບັດ ຈໍານວນ 2 ໂຄງການ ຄື: ໂຄງການເຄື່ອນໄຫວແສງສະຫວ່າງ (ໂຄງການປິ່ນປົວແກ່ນຕາຂຸ້ນ) ແລະ ໂຄງການຫລຸດຜ່ອນຄວາມທຸກຍາກ.
ກອງປະຊຸມ ໄດ້ສະແດງຄວາມຍິນດີ ທີ່ ສປ ຈີນ ໄດ້ສ້າງຕັ້ງກອງທຶນພິເສດ ຂອງ ຂອບ ການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ພ້ອມຍັງໄດ້ກໍານົດລະບຽບການຂຶ້ນແຜນໂຄງການ ແລະ ນໍາໃຊ້ກອງທຶນດັ່ງກ່າວ. ກອງປະຊຸມຄັ້ງນີ້ ໄດ້ຮັບຮອງເອົາ 3 ເອກະສານສໍາຄັນ ຄື: (1) ຖະແຫລງຂ່າວຮ່ວມ ຂອງ ກອງປະຊຸມລັດຖະມົນຕີຕ່າງປະເທດ ຂອບ ການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 (Joint Press Communiqué of the 2nd MLC Foreign Ministers’ Meeting), (2). ເອກະສານຕິດຕາມຜົນໄດ້ຮັບຂອງກອງປະຊຸມຜູ້ນໍາຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1 (Matrix of Follow-ups to the Outcomes of the 1st LMC Leaders’ Meeting) (3) ຫລັກການທົ່ວໄປຂອງການສ້າງຕັ້ງ ຫນ່ວຍງານຂົງເຂດບູລິມະສິດ (General Principle for the Establishment of the Joint Working Groups on the MLC Key Priority Areas) ເພື່ອເປັນບ່ອນອີງໃນການຮ່ວມມືຕໍ່ຫນ້າ.
ໃນໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນລາວ ກໍໄດ້ປະກອບຄໍາເຫັນຢ່າງສ້າງສັນ ແລະ ໄດ້ນໍາສະ ເຫນີແຜນການຮ່ວມມືໃນຕໍ່ຫນ້າເພື່ອສ້າງເປັນແຜນປະຕິບັດງານຂອງຂອບການຮ່ວມມືດັ່ງກ່າວ ໃນໄລຍະຫ້າປີຕໍ່ຫນ້າ, ໂດຍສຸມໃສ່ການພັດ ທະນາພື້ນຖານໂຄງລ່າງການເຊື່ອມຈອດ, ການພັດທະນາ ແລະ ກໍ່ສ້າງສິ່ງອຳນວຍຄວາມສະດວກ ຕ່າງໆ ເພື່ອຊຸກຍູ້ການຜະລິດເປັນສິນຄ້າ; ການກໍ່ສ້າງ ແລະ ຊັບພະຍາກອນມະນຸດ, ການຝືກອົບຮົມ ເພື່ອສ້າງແຮງ ງານທີ່ມີສີມືທັງຈຳນວນ ແລະ ຄຸນນະພາບ ເພື່ອຮອງຮັບ ແລະ ສະຫນອງ ໃຫ້ແກ່ໂຄງການລົງທຶນໃນຂົງເຂດດັ່ງກ່າວ ທັງນີ້ກໍເພື່ອບັນລຸເປົ້າ ໝາຍການຫລຸດຜ່ອນຄວາມທຸກຍາກ ຂອງບັນດາປະເທດສະມາຊິກ ລວມທັງ ສປປລາວ ໃນປີ 2020 ໃຫ້ປະກົດຜົນເປັນຈິງ.
ໃນໂອກາດດັ່ງກ່າວນີ້, ທ່ານ ສະເຫລີມໄຊ ກົມມະສິດ ຍັງໄດ້ພົບປະສອງຝ່າຍກັບ ທ່ານ ປຣາກ ໂຊຄົນ, ລັດຖະມົນຕີອາວຸໂສ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງ ຣາຊະອານາຈັກ ກໍາປູເຈຍ; ທ່ານ ຟ້າມ ບິ່ງ ມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ; ແລະ ທ່ານ ທ່ານ ຫວາງ ອີ້, ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ຕາມລໍາດັບ ຊຶ່ງໄດ້ປຶກສາຫາລືເຖິງຄວາມຄືບຫນ້າ ຂອງການຮ່ວມມື ລະຫວ່າງ ລາວ-ກໍາປູເຈຍ, ລາວ-ຫວຽດນາມ ແລະ ລາວ-ຈີນ ຕາມລໍາດັບ ພ້ອມທັງໄດ້ແລກປ່ຽນ ຄໍາຄິດຄໍາເຫັນຕໍ່ສະພາບການພາກພື້ນ ແລະ ສາກົນ ທີ່ສົນໃຈຮ່ວມກັນ ແລະ ດໍາເນີນການຕໍ່ໄປ ດ້ວຍບັນຍາກາດໄມຕີຈິດມິດຕະພາບອັນອົບອຸ່ນ, ກົງໄປກົງມາ ແລະ ໄດ້ຮັບຜົນສໍາເລັດຢ່າງຈົບງາມ.
ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ຈະຈັດຂຶ້ນໃນປີ 2017 ທີ່ ສປ ຈີນ.