ຖະ​ແຫລ​ງການ​ລັດຖະມົນ​ຕີ​ຕ່າງປະ​ເທດ​ອາ​ຊຽນ

ກ່ຽວ​ກັບ ​ເຫດການ​ແຜ່ນ​ດິນ​ໄຫວ​ໃນ​ແຂວງ​ອາ​ເຈ, ປະ​ເທດອິນ​ໂດ​ເນ​ເຊຍ.  

11 ທັນວາ 2016

*****************************

ບັນດາ​ປະ​ເທດ​ມະ​ມາ​ຊິກ​ອາ​ຊຽນ ຮູ້ສຶກ​ເສຍ​ໃຈ ຕໍ່​ກັບ​ເຫດການ​ແຜນ​ດິນ​ໄຫວທີ່​ເກີດ​ຂຶ້ນ ຢູ່ ຝັ່ງຕາ​ເວັນ​ອອກສ່ຽງ​ເໜືອ​ ເກາະ​ສຸ​ມາຕາ, ແຂວງອາ​ເຈ, ປະ​ເທ​ດອິນ​ໂດ​ເນ​ເຊຍ, ​ໃນ​ວັນທີ 7 ທັນວາ 2016, ອັນ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ ​ແລະ ບາດ​ເຈັບ​ເປັນ​ຈຳນວນ​ຫຼາຍຄົນ ​ແລະ ຊັບ​ສິນ​ຖືກ​ທຳລາຍ.

ໃນຊ່ວງເວລາທີ່ຫຍຸ້ງຍາກນີ້, ອາ​ຊຽນ ສະ​ແດງ​ຄວາມ​​ເຫັນ​ອົກ​ເຫັນ​ໃຈ ​ແລະ ​ເສົ້າສະຫຼົດ​ໃຈ​ຢ່າງ​ສຸດຊຶ້ງ ມາ​ຍັງ ລັດຖະບານ ​ແລະ ປະຊາຊົນ ​ອິນ​ໂດ​ເນ​ເຊຍ, ໂດ​ຍສະ​ເພາະ​ແມ່ນ ຄອບຄົວ​ຂອງ​ຜູ້​ໄດ້​ຮັບ​ເຄາະ​ຮ້າຍ ຈາກ​ເຫດການ​ແຜ່ນ​ດິນ​ໄຫວ.

ອາ​ຊຽນ ພ້ອມ​ທີ່​ຈະ​ໃຫ້ການ​ຮ່ວມ​ມື ​ແລະ ການ​ສະໜັບສະໜູນ ​ໂດຍ​ທຸກ​ວິທີ​ທາງ​ທີ່​ ອາ​ຊຽນສາມາດ​ເຮັດ​ໄດ້ ​ເພື່ອ​ປະກອບສ່ວນ​ໃຫ້​ແກ່​ຄວາມ​ພະຍາຍາມ​ຂອງ​ລັດຖະບານ ​ແລະ ປະຊາຊົນ​ອິນໂດເນເຊຍ ​ຟື້ນ​ຄືນ​ສູ່​ສະພາບ​ປົກກະຕິ​ໂດຍ​​​ໄວ.

ຖະແຫຼງການລັດຖະມົນຕີຕ່າງປະເທດອາຊຽນ ກ່ຽວກັບ ການທົດລອງນິວເຄລຍ ໂດຍ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ

10 ກັນຍາ 2016

ອາຊຽນ ສະແດງຄວາມເປັນຫ່ວງຢ່າງຈິງຈັງ ຕໍ່ການທົດລອງນິວເຄລຍ ຄັ້ງທີ ຫ້າ ຂອງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ (ສປປ ເກົາຫຼີ) ໃນວັນທີ 9 ກັນຍາ 2016 ຊຶ່ງເປັນການລະເມີດບັນດາຍັດຕິທີ່ກ່ຽວຂ້ອງ ຂອງສະພາຄວາມໝັ້ນຄົງຂອງອົງການສະຫະປະຊາຊາດ.

ອາຊຽນ ຢໍ້າຄືນ ຄວາມສໍາຄັນຂອງສັນຕິພາບ ແລະ ຄວາມໝັ້ນຄົງໃນແຫຼມເກົາຫຼີ ແລະ ຢືນຢັນຄືນ ການສະໜັບສະໜູນຂອງຕົນຢ່າງເຕັມປ່ຽມ ເພື່ອສ້າງແຫຼມເກົາຫຼີ ໃຫ້ເປັນເຂດປອດອາວຸດນິວເຄລຍໂດຍສັນຕິວິທີ. ອາຊຽນ ຮຽກຮ້ອງໃຫ້ ສປປ ເກົາຫຼີ ປະຕິບັດຢ່າງຄົບຖ້ວນ ບັນດາຍັດຕິທີ່ກ່ຽວຂ້ອງ ຂອງສະພາຄວາມໝັ້ນຄົງຂອງອົງການສະຫະປະຊາຊາດ ລວມທັງ ຍັດຕິຂອງສະພາຄວາມໝັ້ນຄົງຂອງອົງການສະຫະປະຊາຊາດ ສະບັບເລກທີ 2270. ອາຊຽນ ຮຽກຮ້ອງໃຫ້ທຸກຝ່າຍທີ່ກ່ຽວຂ້ອງ ເອົາຄວາມພະຍາຍາມຮ່ວມກັນ ເພື່ອປົກປັກຮັກສາສັນຕິພາບ ແລະ ຄວາມໝັ້ນຄົງໃນຂົງເຂດດັ່ງກ່າວ.