ໃນວັນທີ 7 ກຸມພາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດລາວ ໄດ້ຕ້ອນຮັບການເຂົ້າຢ້ຽມຂຳ່ນັບຂອງ ທ່ານ ນາງ ພິໄລພັນ ສົມບັດສິຣິ, ປະທານຄະນະກຳມາທິການຕ່າງປະເທດ, ສະພານິຕິບັນຍັດແຫ່ງຊາດ ພ້ອມດ້ວຍຄະນະ, ໃນໂອກາດ ທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ.

ໃນວັນທີ 30 ມັງກອນ 2017, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ອູ ຈໍ ໂຊ ວິນ (U Kyaw Soe Win), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສະຫະພາບ ມຽນມາ ປະຈຳ ສປປ ລາວ ແລະ ໄດ້ຕາງໜ້າໃຫ້ລັດຖະບານ ແຫ່ງ ສປ ລາວ ປະດັບຫຼຽນກາມິດຕະພາບ ໃຫ້ແກ່ ທ່ານເອກອັກຄະລັດຖະທູດ ເພື່ອເປັນການຍ້ອງຍໍຊົມເຊີຍຜົນງານທີ່ ທ່ານທູດ ໄດ້ກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ 2 ປະເທດ ຕະຫຼອດໄລຍະການປະຕິບັດໜ້າທີ່ການທູດຢູ່ ສປປ ລາວ.

ໃນໂອກາດດັ່ງກ່າວ, ທ່ານເອກອັກຄະລັດຖະທູດ ແຫ່ງ ສສ. ມຽນມາ ກໍ່ໄດ້ກ່າວແຈ້ງໂດຍຫຍໍ້ ກ່ຽວກັບການປະຕິບັດໜ້າທີ່ຂອງຕົນຢູ່ ສປປ ລາວ ໃນໄລຍະທີ່ຜ່ານມາ ແຕ່ເດືອນມີນາ 2012 ຫາ ເດືອນມັງກອນ 2017 ແລະ ຊົມເຊີຍຜົນສຳເລັດຂອງ ສປປ ລາວ ໃນການພັດທະນາເສດຖະກິດ-ສັງຄົມ, ປ້ອງກັນຊາດ, ປ້ອງກັນຄວາມສະຫງົບ ໂດຍສະເພາະ ແມ່ນຜົນສຳເລັດໃນການເປັນປະທານອາຊຽນຂອງ ສປປ ລາວ ໃນປີ 2016 ຜ່ານມາ. ພ້ອມນີ້, ກໍ່ໄດ້ສະແດງຄວາມຂອບໃຈຢ່າງສູງ ຕໍ່ລັດຖະບານ ກໍ່ຄືກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອຳນວຍຄວາມສະດວກຕະຫຼອດໄລຍະການປະຕິບັດໜ້າທີ່ວຽກງານການທູດຢູ່ ສປປ ລາວ ຈົນປະສົບຜົນສຳເລັດເປັນຢ່າງດີ.

ທ່ານລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍ ແລະ ຕີລາຄາສູງ ພ້ອມສະແດງຄວາມຂອບໃຈຢ່າງຈິງໃຈຕໍ່ການເອົາໃຈໃສ່ປະກອບສ່ວນຢ່າງຫ້າວຫັນຂອງທ່ານເອກອັກຄະລັດຖະທູດ ໃນການເພີ່ມທະວີສາຍພົວພັນມິດຕະພາບອັນເປັນມູນເຊື້ອມາແຕ່ດົນນານ ແລະ ການຮ່ວມມືອັນໃກ້ຊິດ ລະຫວ່າງ ສອງປະເທດລາວ ແລະ ມຽນມາ ໃຫ້ແຕກດອກອອກຜົນຍິ່ງໆຂຶ້ນ ເປັນຕົ້ນແມ່ນການແລກປ່ຽນການຢ້ຽມຢາມຂອງການນຳຂັ້ນສູງ ແລະ ຂັ້ນຕ່າງໆ ນັບແຕ່ສູນກາງລົງຮອດທ້ອງຖິ່ນ ແລະ ການສະໜັບສະໜູນເຊິ່ງກັນ ແລະ ກັນ ທັງໃນຂອບສອງຝ່າຍ ແລະ ຫຼາຍຝ່າຍ ໃນອານຸພາກພື້ນ, ພາກພື້ນ ແລະ ສາກົນຕ່າງໆ ກໍ່ຄືຕໍ່ການເປັນປະທານອາຊຽນຂອງ ສປປ ລາວ.

ເຖິງແມ່ນວ່າ ທ່ານເອກອັກຄະລັດຖະທູດ ອູ ຈໍ ໂຊ ວິນ ຈະສິ້ນສຸດໜ້າທີ່ການທູດ ປະຈຳຢູ່ ສປປ ລາວ ແລ້ວກໍ່ຕາມ, ກໍ່ຫວັງຢ່າງຍິ່ງວ່າ ທ່ານທູດ ຈະສືບຕໍ່ຊຸກຍູ້ການພົວພັນຮ່ວມມືອັນດີ ລະຫວ່າງ ສອງປະເທດ ໃຫ້ນັບມື້ນັບຈະເລີນຍິ່ງໆຂຶ້ນ. ທ້າຍສຸດ, ທ່ານລັດຖະມົນຕີກະຊວງການຕ່າງປະເທດ ໄດ້ອວຍພອນໃຫ້ ທ່ານ ອູ ຈໍ ໂຊ ວິນ ຈົ່ງມີສຸກຂະພາບແຂງແຮງ, ມີຄວາມຜາສຸກ, ປະສົບຜົນສຳເລັດໃນໜ້າທີ່ອັນມີກຽດສູງສົ່ງຂອງທ່ານ ແລະ ເດີນທາງກັບຄືນປະເທດ ດ້ວຍຄວາມສະຫວັດດີພາບ.

ກອງປະຊຸມວິສາມັນຂອງຄະນະກໍາມະການຊາຍແດນຮ່ວມ ລາວ-ກໍາປູເຈຍ; ກຳປູເຈຍ-ລາວ ໄດ້ຈັດຂຶ້ນໃນວັນທີ 25 ມັງກອນ 2017 ທີ່ ຫ້ອງວ່າການສໍານັກງານນາຍົກລັດຖະມົນຕີ, ຣາຊະອານາຈັກກຳປູເຈຍ. ຄະນະຜູ້ແທນຝ່າຍລາວ ນຳໂດຍ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ປະທານຄະນະກຳມະການຊາຍແດນຮ່ວມ ລາວ-ກຳປູເຈຍ ແລະ ຄະນະຜູ້ແທນຝ່າຍກຳປູເຈຍ ນຳໂດຍ ທ່ານ ວາ ກິມ ຮົງ, ລັດຖະມົນຕີອາວຸໂສ, ຮັບຜິດຊອບວຽກງານຊາຍແດນ ແຫ່ງ ຣາຊະອານາຈັກກຳປູເຈຍ, ປະທານຄະນະກຳມະການຊາຍແດນຮ່ວມ ກຳປູເຈຍ-ລາວ.

ກອງປະຊຸມໄດ້ດໍາເນີນໄປ ພາຍໃຕ້ບັນຍາກາດສະໜິດສະໜົມ ກົງໄປກົງມາ ບົນຈິດໃຈ ແຫ່ງສາຍພົວພັນແບບບ້ານໃກ້ເຮືອນຄຽງທີ່ດີ ມິດຕະພາບອັນເປັນມູນເຊື້ອ ແລະ ການຮ່ວມມືຮອບດ້ານ ແບບຍືນຍົງ ແລະ ຄວາມມຸ້ງມາດປາດຖະໜາ ທີ່ ຈະສ້າງເສັ້ນຊາຍແດນລາວ-ກໍາປູເຈຍ ໃຫ້ເປັນເສັ້ນຊາຍແດນແຫ່ງສັນຕິພາບ ມິດຕະພາບ ສະຖຽນລະພາບ ການຮ່ວມມື ແລະ ການພັດທະນາ ຊົ່ວນິລັນດອນ.

ກອງ​ປະຊຸມ​​ສອງ​ຝ່າຍເຫັນ​ດີ​ເປັນ​ເອກະ​ພາບ​ກັນ​ດັ່ງ​ລຸ່ມ​ນີ້:

I. ສືບຕໍ່ປຶກສາຫາລື ກ່ຽວກັບ 4 ບໍລິເວນ ທີ່ຍັງຄົງຄ້າງດັ່ງລຸ່ມນີ້:

1)    ຫຼັກ​ໝາຍ​ຊາຍ​ແດນ​ເລກທີ 033 ຢູ່​ດ່ານ​ສາກົນ​ໜອງ​ນົກຂຽນ-​ຕຣາປຽງ​ກຽນ

2)    ​ເສັ້ນ​ຊາຍ​ແດນ​ຕາມ​ເສັ້ນທາງ​ເລກທີ 13 (ລາວ)/7(ກຳປູ​ເຈຍ)

3)    ​ເສັ້ນ​ຊາຍ​ແດນ​ຢູ່​ບໍລິ​ເວນ​ເວີນ​ຄາມ/​ໂອ​ສະ​ໄວ

4)    ​ເສັ້ນ​ຊາຍ​ແດນ​ຢູ່​ບໍລິ​ເວນ​ຫຼັກ​ໝາຍ​ຊາຍ​ແດນ​ເລກທີ 032/1-032/5

II. ລົງກວດກາພື້ນທີ່ຕົວຈິງຢູ່ 2 ບໍລິເວນໃນເວລາທີ່ເໝາະສົມພາຍໃນປີ 2017 ດັ່ງລຸ່ມນີ້:

1)    ບໍລິເວນຫຼັກໝາຍຊາຍແດນເລກທີ 002 ແລະ 003

2)    ບໍລິເວນຫຼັກໝາຍຊາຍແດນຄູ່ເລກທີ 029 ແລະ 030

III. ຈັດຕັ້ງໜ່ວຍງານໜຶ່ງຂຶ້ນ ເພື່ອສຶກສາຄວາມເປັນໄປໄດ້ຮ່ວມກັນ ກ່ຽວກັບ ການປັກຫຼັກໝາຍຊາຍແດນຖີ່, ຮູບແບບ ແລະ ຈຳນວນຫຼັກໝາຍຊາຍແດນຖີ່ ນັບທັງຮ່າງຂໍ້ກຳນົດທາງດ້ານເຕັກນິກ ຈຳນວນໜຶ່ງອີກ. ໜ່ວຍງານດັ່ງກ່າວນີ້ ຈະປຶກສາຫາລືກັນໃນເວລາເໝາະສົມອັນໃກ້ນີ້.

ພ້ອມ​ກັນ​ນີ້​ສອງ​ຝ່າຍ​ຈະ​ພະຍາມຊອກ​ວິທີ​ທາງ​ໃນ​ການ​ແກ້​ໄຂ​ຈຸດ​ຄົງ​ຄ້າງ​ໃຫ້​ສຳ​ເລັດ​ໂດຍ​ໄວຕາມ​ການ​ຕົກລົງ​ຂອງ​ຜູ້ນຳ​ຂອງສອງ​ປະ​ເທດ.