ໂດຍຕອບສະຫນອງຕາມການເຊື້ອເຊີນ ຂອງ ທ່ານ ປຣັກ ໂສຄົນ (PRAK Sokhonn), ລັດຖະມົນຕີອາວຸໂສ ແລະ ລັດຖະມົນຕີ ກະຊວງການຕ່າງປະເທດ ແລະ ການຮ່ວມມືສາກົນ ແຫ່ງ ລາຊະອານາຈັກ ກໍາປູເຈຍ, ທ່ານ ສະເຫລີມໄຊ ກົມມະສິດ, ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວຈະນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ແລະ ກອງປະຊຸມ ທີ່ກ່ຽວຂ້ອງ, ເຊິ່ງຈະຈັດຂຶ້ນໃນວັນທີ 22-23 ທັນວາ 2016 ທີ່ ສຽມຣຽບ, ກໍາປູເຈຍ.
ໃນໂອກາດເຂົ້າຮ່ວມກອງປະຊຸມຄັ້ງນີ້ ບັນດາທ່ານລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຈະໄດ້ທົບທວນຄືນຄວາມຄືບໜ້າຂອງການຈັດຕັ້ງຜັນຂະຫຍາຍ ຖະແຫລງການຊານຢາ ຂອງ ກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງຄັ້ງທີ 1 ທີ່ໄດ້ຈັດຂຶ້ນໃນເດືອນມີນາ 2016 ທີ່ຜ່ານມາ ແລະ ຈະໄດ້ປຶກສາຫາລືຮ່ວມກັນກ່ຽວກັບແຜນການຮ່ວມມືໃນຕໍ່ໜ້າ, ໂດຍສະເພາະ ແມ່ນການສ້າງແຜນປະຕິບັດງານສຳລັບໄລຍະຫ້າປີຕໍ່ຫນ້າຂອງຂອບການຮ່ວມມືດັ່ງກ່າວ. ໂອກາດນີ້, ກອງປະຊຸມ ຈະຮັບຮອງເອົາ 3 ເອກະສານ ຄື: 1.) ຖະແຫລງການຮ່ວມ ຂອງກອງປະຊຸມລັດຖະມົນຕີຕ່າງປະເທດ ຄັ້ງທີ 2 (Joint Press Communiqué of the 2nd MLC Foreign Ministers’ Meeting); 2.) ເອກະສານຄວາມຄືບຫນ້າຜົນການຈັດຕັ້ງປະຕິບັດຂອງກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ (Matrix of Follow-ups to the Outcomes of the 1st MLC Leaders’ Meeting); 3.) ເອກະສານລະບຽບການສຳລັບການສ້າງຕັ້ງຫນ່ວຍງານບູລິມະສິດຂອງຂອບການຮ່ວມມື (General Principles for the Establishment of the Joint Working Groups on the MLC Key Priority Areas)ເພື່ອນຳໄປຈັດຕັ້ງປະຕິບັດໃຫ້ເປັນຮູບປະທໍາ ແລະ ນຳຜົນປະໂຫຍດຕົວຈິງ ມາສູ່ປະຊາຊົນຂອງປະເທດສະມາຊິກ.
ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ໄດ້ສ້າງຕັ້ງຂຶ້ນ ຢູ່ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1 ໃນເດືອນພະຈິກ 2015, ເຊິ່ງປະກອບດ້ວຍ 6 ປະເທດ ສະມາຊິກ ຄື : ກໍາປູເຈຍ, ສປ ຈີນ, ສປປ ລາວ, ສສ. ມຽນມາ, ໄທ ແລະ ສສ ຫວຽດນາມ ແລະ ກວມເອົາ 3 ເສົາຄ້ຳການຮ່ວມມື ຄື: 1. ການຮ່ວມມືດ້ານການເມືອງ-ຄວາມຫມັ້ນຄົງ, 2. ການຮ່ວມມືດ້ານເສດຖະກິດ ແລະ ການພັດທະນາຍືນຍົງ ແລະ 3. ການຮ່ວມມືດ້ານສັງຄົມ-ວັດທະນາທໍາ ແລະ ການແລກປ່ຽນ ລະຫວ່າງ ປະຊາຊົນ, ໂດຍມີຈຸດປະສົງ ເພື່ອສ້າງພາກພື້ນນີ້ ໃຫ້ມີສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງ.