ໃນວັນທີ 13-14 ທັນວາ 2016, ຢູ່ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ນະຄອນຫລວງວຽງຈັນ, ໄດ້ມີການຈັດກອງປະຊຸມວິຊາການວຽກງານການຕ່າງປະເທດຂຶ້ນ ພາຍໃຕ້ການເປັນປະທານຂອງ ທ່ານ ສະເຫລີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ; ກອງປະຊຸມຄັ້ງນີ້ ຍັງມີບັນດາຮອງລັດຖະມົນຕີ, ຄະນະກົມ ແລະ ຄະນະພະແນກກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ເອກອັກຄະລັດຖະທູດ ແລະ ກົງສຸນໃຫຍ່ ແຫ່ງ ສປປ ລາວ ປະຈຳ ຕ່າງປະເທດ ແລະ ຜູ້ຕາງຫນ້າຂະແຫນງການກ່ຽວຂ້ອງ ຈາກບັນດາກະຊວງ, ທະບວງກົມ, ນະຄອນຫລວງ ແລະ ແຂວງ ເຂົ້າຮ່ວມ ຫລາຍກວ່າ 400 ຄົນ.
ການປະຊຸມຄັ້ງນີ້ ຈະດຳເນີນໄປເປັນເວລາ 2 ມື້, ເປັນກອງປະຊຸມລະດັບວິຊາການ ເພື່ອສັງເກດຕີລາຄາການຈັດຕັ້ງປະຕິບັດນະໂຍບາຍຕ່າງປະເທດຂອງພັກ-ລັດເຮົາ ແລະ ການເຄື່ອນໄຫວການຕ່າງປະເທດຂອງ ສປປ ລາວ ໃນໄລຍະ 3 ປີ ຜ່ານມາ ນັບແຕ່ກອງປະຊຸມວຽກງານການຕ່າງປະເທດຄັ້ງທີ 12 ກຳນົດອອກ, ທັງກຳນົດທິດທາງແຜນການວຽກງານການຕ່າງປະເທດ ຂອງ ສປປ ລາວ ສຳລັບ 3 ປີ ຕໍ່ຫນ້າ ສົກປີ 2017-2019. ກອງປະຊຸມຄັ້ງນີ້ ຍັງຈະໄດ້ມີການປຶກສາຫາລື ແລກປ່ຽນຄຳຄິດຄຳເຫັນ ກ່ຽວກັບ ວຽກງານການຕ່າງປະເທດຂອງພັກ-ລັດ ເພື່ອກະກຽມໃຫ້ແກ່ກອງປະຊຸມທາງການວຽກງານການຕ່າງປະເທດ ຄັ້ງທີ 13, ເຊິ່ງຈະຈັດຂຶ້ນຢ່າງເປັນທາງການ ໃນທີ 15-16 ທັນວາ 2016 ໂດຍການຈະເຂົ້າຮ່ວມຂອງທ່ານນາຍົກລັດຖະມົນຕີ, ບັນດາລັດຖະມົນຕີ, ເຈົ້າແຂວງ ແລະ ເຈົ້າຄອງນະຄອນຫລວງວຽງຈັນ.
ກອງປະຊຸມວິຊາການຕ່າງປະເທດຄັ້ງນີ້ ດຳເນີນໄປດ້ວຍບັນຍາກາດແຫ່ງຄວາມເປັນເຈົ້າການ ແລະ ຮັບຜິດຊອບສູງ ແລະ ເຕັມໄປດ້ວຍເນື້ອໃນອັນອຸດົມສົມບູນ ທີ່ບັນດາຜູ້ຕາງຫນ້າຈາກຂະແຫນງການຕ່າງໆໄດ້ຍົກຂຶ້ນ ເພື່ອສັງເກດຕີລາຄາສະພາບການພາກພື້ນ ແລະ ສາກົນ ແລະ ການປະຕິບັດແນວທາງການຕ່າງປະເທດ ໄລຍະເຄິ່ງທ້າຍສະໄຫມການຈັດຕັ້ງຜັນຂະຫຍາຍມະຕິ 9 ຂອງສູນກາງພັກ ແລະ ຈຸດສຸມສຳລັບວຽກງານການຕ່າງປະເທດແຕ່ປີ 2017-2019; ເປັນເຈົ້າການໃນການເຊື່ອມໂຍງກັບພາກພື້ນ, ສາກົນ ແລະ ປະກອບສ່ວນຢ່າງຕັ້ງຫນ້າເຂົ້າໃນການສ້າງປະຊາຄົມອາຊຽນ; ຍົກສູງຄວາມສາມາດ ລັກສະນະນຳຫນ້າ ແລະ ຄວາມເປັນເຈົ້າການຂອງພະນັກງານໃນຂະແຫນງການຕ່າງປະເທດ ຕໍ່ການປະຕິບັດແນວທາງການຕ່າງປະເທດຂອງພັກ.
ຕະຫລອດການດຳເນີນກອງປະຊຸມ, ທ່ານປະທານ ໄດ້ຕັ້ງຫລາຍຄຳຖາມເຈາະຈີ້ມຕໍ່ແຕ່ລະວາລະຂອງກອງປະຊຸມ ເພື່ອໃຫ້ໄດ້ຕາມເນື້ອໃນຄຳຂວັນ ແລະ ຫົວຂໍ້ຍ່ອຍຂອງກອງປະຊຸມຄັ້ງນີ້ຄື “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເພີ່ມທະວີຄວາມເປັນເຈົ້າການໃນການເຊື່ອມໂຍງເສດຖະກິດພາກພື້ນ ແລະ ສາກົນ” ແລະ “ຍົກສູງຄວາມສາມາດ, ລັກສະນະນຳໜ້າ ແລະ ຄວາມເປັນເຈົ້າຂອງພະນັກງານ ໃນຂະແໜງການຕ່າງປະເທດ”, ເຊິ່ງກໍລວມທັງບັນຫາ, ຂໍ້ຫຍຸ້ງຍາກ ແລະ ຂອດການປະສານງານ ທີ່ກອງປະຊຸມຍັງເຫັນວ່າ ຄວນຈະໄດ້ຮັບການປັບປຸງແກ້ໄຂໃຫ້ດີຂຶ້ນ ເພື່ອໃຫ້ສອດຄ່ອງກັບສະພາບແວດລ້ອມໃຫມ່ ແລະ ທັນກັບສະພາບການປ່ຽນແປງຢ່າງວ່ອງໄວຂອງໂລກໃນປະຈຸບັນ.
ຂະນະດຽວກັນ, ຜູ້ແທນກອງປະຊຸມ ກໍໄດ້ເອົາໃຈໃສ່ປະກອບຄໍາເຫັນ ແລະ ແລກປ່ຽນບົດຮຽນ ພ້ອມສະເຫນີຫາທາງອອກຢ່າງກົງໄປກົງມາ, ເຊິ່ງໄດ້ເຮັດໃຫ້ການປະຊຸມປຶກສາຫາລືຄັ້ງນີ້ ດຳເນີນໄປຢ່າງມີບັນຍາກາດ ແລະ ມີຄວາມຫມາຍສຳຄັນຫລາຍທີ່ສຸດ ຕໍ່ການກະກຽມທາງດ້ານເນື້ອໃນໃສ່ກອງປະຊຸມວຽກງານການຕ່າງປະເທດ ຄັ້ງທີ 13 ຕໍ່ໄປ.