ສາທາລະນະລັດ ສະຫະພາບ ມຽນມາ ໄດ້ເປັນເຈົ້າພາບຈັດ ກອງປະຊຸມວົງແຄບຂອງລັດຖະມົນຕີຕ່າງປະເທດອາຊຽນ ໃນວັນທີ 19 ທັນວາ 2016 ທີ່ ຢ້າງກຸງ. ທ່ານ ສະເຫລີມໄຊ ກົມມະສິດ ໃນນາມປະທານອາຊຽນ ໄດ້ເປັນປະທານກອງປະຊຸມບໍ່ເປັນທາງການດັ່ງກ່າວ. ໃນໂອກາດນີ້ ທ່ານ ນາງ ອອງ ຊານ ຊູ ຈີ, ທີ່ປຶກສາສາແຫ່ງລັດ, ລັດຖະມົນຕີການຕ່າງປະເທດ ຂອງ ສະທາລະນະລັດ ສະຫະພາບ ມຽນມາ ໄດ້ແຈ້ງໃຫ້ບັນດາລັດຖະມົນຕີຕ່າງປະເທດອາຊຽນຊາບ ກ່ຽວກັບສະພາບການທີ່ເກີດຂື້ນ ຢູ່ ລັດລະຄາຍ ແລະ ຄວາມພະຍາຍາມຂອງ ລັດຖະບານມຽນມາໃນການແກ້ໄຂຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆຢູ່ລັດດັງກ່າວ, ລວມທັງ ການຮ່ວມມືຂອງມຽນມາກັບວົງຄະນາຍາດສາດກົນ ໂດຍສະເພາະແມ່ນກັບອົງການສະຫະປະຊາຊາດ ເຊັ່ນໄດ້ມີການສ້າງຕັ້ງ ຄະນະກໍາມະການສູນກາງກ່ຽວກັບການສ້າງສັນຕິພາບ, ສະຖຽນລະພາບ ແລະ ການພັດທະນາ ຢູ່ ລັດລະຄາຍ ແລະ ຄະນະກໍາມາທິການ ທີ່ປຶກສາ ຊຶ່ງນໍາໂດຍ ທ່ານ ໂກຟີອານັນ, ອາດີດເລຂາທິການໃຫຍ່ ຂອງ ອົງການ ສປຊ.
ພ້ອມນີ້, ທ່ານ ນາງ ອອງ ຊານ ຊູ ຈີ ກໍໄດ້ແຈ້ງຄວາມຄືບຫນ້າ ຂອງການແກ້ໄຂສະພາບການຢູ່ລັດລະຄາຍ. ບັນດາລັດຖະມົນຕີຕ່າງປະເທດອາຊຽນ ຮັບຊາບຂໍ້ມູນດັ່ງກ່າວ ແລະ ໄດ້ປຶກສາຫາລື ວິທີທາງ ເພື່ອຊ່ວຍເຫລືອມຽນມາ, ລວມທັງການໃຫ້ການຊ່ວຍເຫລືອທາງດ້ານມະນຸດສະທໍາ ແລະ ໄດ້ສະແດງຄວາມກຽມພ້ອມໃຫ້ການຊ່ວຍເຫລືອແບບສອງຝ່າຍ ຫລື ຜ່ານຊ່ອງທາງທີ່ເຫມາະສົມ.
ໃນຕອນທ້າຍຂອງກອງປະຊຸມ, ທ່ານ ສະເຫລີມໄຊ ກົມມະສິດ ກໍໄດ້ສະແດງຄວາມຂອບໃຈບັນດາປະເທດສະມາຊິກອາຊຽນ ທີ່ໄດ້ໃຫ້ການຮ່ວມມື, ສະຫນັບສະຫນູນ ແລະ ຊ່ວຍເຫລືອແກ່ ສປປ ລາວ ຕະຫລອດການເປັນປະທານອາຊຽນ ຂອງ ສປປລາວ ໃນປີ 2016 ດ້ວຍຜົນສໍາເລັດອັນຈົບງາມ. ການເປັນປະທານອາຊຽນຂອງ ສປປ ລາວ ຈະສິ້ນສຸດລົງ ໃນວັນທີ 31 ທັນວາ 2016 ນີ້ ແລະ ສປປ ລາວຈະເປັນປະທານອາຊຽນ ຄັ້ງຕໍ່ໄປໃນປີ 2024.