ໃນ​ວັນ​ທີ 27 ທັນ​ວາ 2016, ທີ່​ກະ​ຊວງ​ການ​ຕ່າງ​ປະ​ເທດ ໄດ້​ຈັດ​ກອງ​ປະ​ຊຸມ​ສຳ​ມະ​ນາວິທະຍາສາດ​ ພາຍ​ໃຕ້​ຫົວ​ຂໍ້ ທ່າອ່ຽງ ແລະ ທ່າ​ຂະ​ຫຍາຍ​ຕົວ ຂອງສະ​ພາບ​ການ​ພາກ​ພື້ນ ແລະ​ ສາ​ກົນໃນສະພາບການໃໝ່. ໃຫ້​ກຽດ​ເຂົ້າ​ຮ່ວມ​ບັນ​ຍາຍ ແລະ ເປັນປະທານກອງປະຊຸມສຳມະນາວິທະຍາສາດ ຄັ້ງນີ້ມີ​ ທ່ານ ສົມ​ສະ​ຫວາດ ເລັງ​ສະ​ຫວັດ, ອະ​ດີດ​ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ອະດີດຮອງນາຍົກລັດຖະມົນຕີ, ທີ່ປຶກສາຄະນະບໍລິຫານງານສູນກາງພັກ ດ້ານວຽກງານພຶດຕິກຳທິດສະດີ ແລະ ແນວຄິດໄກສອນພົມວິຫານ; ທ່ານ ສະ​ເຫລີມ​ໄຊ ກົມ​ມະ​ສິດ,​ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ຄະນະພັກຄະນະນຳກະຊວງການຕ່າງປະເທດ; ທ່ານ ອາ​ລຸນ​ແກ້ວ ກິດ​ຕິ​ຄຸນ, ລັດ​ຖະ​ມົນ​ຕີ​ປະ​ຈຳ​ສຳ​ນັກ​ງານ​ນາ​ຍົກ; ທ່ານ ພົງ​ສະ​ຫວັດ ​ບຸບ​ຜາ, ອະ​ດີດ​ລັດ​ຖະ​ມົນ​ຕີ​ປະ​ຈຳ​ສຳ​ນັກ​ງານ​ປະ​ທານ​ປະ​ເທດ; ເອກອັກຄະລັດຖະທູດ, ກົງສຸນໃຫຍ່, ຄະ​ນະ​ກົມ​ພາຍ​ໃນ​ກະ​ຊວງ, ບັນ​ດາ​ຫົວ​ໜ້າ​ສຳ​ນັກ​ງານ​ການ​ທູດ​ລາວ​ທີ່​ຕ່າງ​ປະ​ເທດ​ເຂົ້າ​ຮ່ວມ​ຮັບ​ຟັງ ແລະ ປະກອບຄຳເຫັນ.

 ໃນ​ກອງ​ປະ​ຊຸມ​ຄັ້ງ​ນີ້ ໄດ້​ປຶກສາຫາລື ແລກປ່ຽນຄຳຄິດເຫັນ ຕໍ່ສະ​ພາບ​ການ​ພາກ​ພື້ນແລະສາ​ກົນ​ໃນສະພາບການໃໝ່ ແລະ ທ່າ​ຂະຫຍາຍຕົວ​ຂອງ​ສະ​ພາບ​ການ​ໃນ​ຊຸມ​ປີ​ຕໍ່​ໜ້າ. ພາຍຫລັງທີ່ ທ່ານ ສົມສະຫວາດ ເລັ່ງສະຫວັດ ໄດ້ມີຄຳເຫັນ ທີ່ເປັນທິດຊີ້ນຳ ແລະ ທັງເປັນຄຳຖາມເຈາະຈີ້ມຕໍ່ກອງປະຊຸມແລ້ວ, ບັນດາຜູ້ເຂົ້າຮ່ວມກອງປະຊຸມ ຍັງໄດ້ປະກອບຄຳຄິດເຫັນ ທີ່ມີລັກສະນະສັງລວມ, ວິໄຈ ແລະ ລົງເລິກໃນບາງບັນຫາ ທີ່ຈະເປັນພື້ນຖານ ແລະ ເປັນປະໂຫຍດໃຫ້ແກ່ວຽກງານຄົ້ນຄວ້າວິໄຈສະພາບການພາກພື້ນ ແລະ ສາກົນ ຂອງຂະແໜງການຕ່າງປະເທດ ທີ່ເປັນເສນາທິການໃຫ້ແກ່ຂັ້ນເທິງ ໃນວຽກງານການຕ່າງປະເທດ ໃນຕໍ່ໄປ.

          ກອງປະຊຸມສຳມະນາຄັ້ງນີ້ ແມ່ນມີຄວາມໝາຍ, ມີຜົນດີ ແລະ ທັງເປັນການລະດົມມັນສະໝອງ ຕໍ່ຫົວຂໍ້ສະເພາະ ທີ່ເປັນທີ່ສົນໃຈໃນເວລານີ້.