ກອງ​ປະຊຸມ​ພາຍ​ໃນກະກຽມ​ໃຫ້​ແກ່​ກອງ​ປະຊຸມ​ວຽກງານ​ການ​ຕ່າງປະ​ເທດ ຄັ້ງ​ທີ 13, ​​ຈັດ​ຂຶ້ນ​ໃນ​ລະຫວ່າງ​ວັນ​ທີ 8-9 ທັນວາ 2016, ທີ່​ ກະຊວງ​ການ​ຕ່າງປະ​ເທດ, ​ໂດຍ​ການ​ເປັນ​ປະທານ​ຂອງ ​ທ່ານ ສະ​ເຫຼີມ​ໄຊ ກົມມະ​ສິດ,ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ​ກະຊວງ, ລັດຖະມົນຕີ​ກະຊວງ​ການ​ຕ່າງປະ​ເທດ, ​ໃນ​ກອງ​ປະຊຸມ​ຄັ້ງ​ນີ້ມີຄະນະ​ພັກ​ຄະນະ​ນຳ​ກະຊວງ​ການ​ຕ່າງປະ​ເທດ, ຫົວໜ້າຫ້ອງການ, ​ເອກ​ອັກຄະ​ລັດຖະທູດ, ​ຜູ້ຕາງໜ້າຖາ​ວອນ, ​ກົງ​ສູນ​ໃຫຍ່​ລາວ​ທີ່​ຕ່າງປະ​ເທດ, ທູດ​ອາວຸ​ໂສ​, ຫົວໜ້າ​ກົມ, ຮອງ​ກົມ ​ແລະ ຄະນະ​ພະ​ແນ​ກ ພາຍ​ໃນກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ເຂົ້າ​ຮ່ວມຢ່າງ​ພ້ອມພຽງ.

          ກອງ​ປະຊຸມ​ດັ່ງກ່າວ, ​ແມ່ນ​ຈະ​ໄດ້​ມີ​ການສະຫຼຸບຕີ​ລາ​ຄາ​ຄືນ​ຜົນ​ການຈັດ​ຕັ້ງປະຕິບັດ​ແນວທາງ​ນະ​ໂຍບາຍ​ການ​ຕ່າງປະ​ເທດ​ຂອງ​ພັກ​ທີ່​ກຳ​ນົດ​ອອກ​ໃນ​ມະຕິ 9 ຂອງ​ພັກ, ການ​ເຄື່ອນ​ໄຫວ​ການ​ຕ່າງປະ​ເທດ​ຂອງ​ກະຊວງ​ການ​ຕ່າງປະ​ເທດ, ທັງ​ພາກສ່ວນ​ທີ່ຢູ່​ພາຍ​ໃນ​ປະ​ເທດ ​ແລະ ສຳນັກງານ​ຕາງໜ້າການ​ທູດ​ລາວທີ່​ຕ່າງປະ​ເທດ, ນັບ​ແຕ່​ກອງ​ປະຊຸມ​ວຽກ​ງານ​ການ​ຕ່າງປະ​ເທດ ຄັ້ງທີ 12 ​ໃນ​ປີ 2013 ຈົນ​ເຖິງ​ປັດຈຸ​ບັນ, ຊຶ່ງ​ຈະ​ໄດ້​ລົງ​ເລີກ​ໃນ​ວຽກງານ​ການຈັດ​ຕັ້ງ​ພັກ ​ແລະ ພະນັກງານ,​ວຽກງານ​ວິຊາ​ສະ​ເພາະ, ​ວຽກງານ​ບໍລິຫານ ​ແລະ ການ​ເງິນ ​ແຕ່​ກອງ​ປະຊຸມ​ວຽກງານ​ການ​ຕ່າງປະ​ເທດ ຄັ້ງ​ທີ 12 ຮອດ​ປັດຈຸບັນ ​ແລະ ທິດ​ທາງ​ແຜນການ​ແຕ່​ນີ້ຮອດ​ປີ 2019. ກອງ​ປະຊຸມ​ດັ່ງກ່າວ​ແມ່ນ​ເຫດການ​ຊີວິດ​ການ​ເມືອງພາຍ​ໃນ​ຂອງກະຊວງ​ການ​ຕ່າງປະ​ເທດ ກໍ​ຄື​ຂະ​ແໜງ​ການ​ຕ່າງປະ​ເທດ ​ທີ່​ຜູ້​ເຂົ້າ​ຮ່ວມກອງ​ປະຊຸມຄັ້ງ​ນີ້ ຈະ​ໄດ້​ພ້ອມ​ກັນ​ສຸມ​ໃສ່​ສັງ​ເກດ​ຕີ​ລາຄາ, ປະກອບ​ຄຳ​ຄິດ​ຄຳ​ເຫັນ ດ້ວຍ​ຄວາມ​ຮັບຜິດຊອບ​ຢ່າງ​ສູງ ​ເພື່ອ​ຊອກ​ເຫັນ​ບັນ​ຫາ ​ແລະ ຫາ​ວິທີ​ແກ້​ໄຂ​ບັນຫາ ​ແນ່​ໃສ່​ເຮັດ​ໃຫ້ການ​ເຄື່ອນ​ໄຫວ​ການ​ຕ່າງປະ​ເທດ​ຂອງ​ປະ​ເທດ​ເຮົາມີ​ຄວາມຄືບໜ້າ​ໃໝ່ ມີ​ຜົນສຳ​ເລັດ​ໃໝ່​ໃນ​ການຈັດ​ຕັ້ງ​ປະຕິບັດ​ແນວທາງ​ການ​ຕ່າງປະ​ເທດ​ຂອງ​ພັກ​ທີ່​ກຳ​ນົດ​ອອກ​ໃນ​ມະຕິ 10 ຂອງ​ພັກ.

ກອງ​ປະຊຸມ​ດັ່ງກ່າວ ດຳ​ເນີນ​ໄປ​ພາຍ​ໃຕ້ຄຳ​ຂວັນ​ “ການ​ທູດ​ປ້ອງ​ກັນ​ເຫດ ​ແລະ ບຸກທະລຸ ​ເພື່ອ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ, ​ເພີ່ມ​ທະວີ​ຄວາມ​ເປັນ​ເຈົ້າ​ການ​ໃນ​ການ​ເຊື່ອມ​ໂຍງ​ເສດຖະກິດ​ພາກພື້ນ ​ແລະ ສາກົນ” ​​ໂດຍ​ມີ​ຫົວ​ຂໍ້​ລົງ​ເລິກ​ຄື: “ຍົກ​ສູງ​ຄວາມ​ສາມາດ​ລັກສະນະ​ນຳໜ້າ ​ແລະ ຄວາມ​ເປັນ​ເຈົ້າ​ຂອງ​ພະນັກງານ ​ໃນ​ຂະ ແໜງການ​ຕ່າງປະ​ເທດ”.

          ກອງປະຊຸມຄັ້ງນີ້ ຈະເປັນກອງປະຊຸມເລີ່ມຕົ້ນ ກະກຽມໃຫ້ແກ່ກອງປະຊຸມຂັ້ນວິຊາການທີ່ຈະໄຂຂຶ້ນໃນວັນທີ 13-14 ທັນວາ 2016 ແລະ ກອງປະຊຸມທາງການ ທີ່ຈະຈັດຂຶ້ນໃນວັນທີ 15-16 ທັນວາ 2016, ທີ່ ສູນການຝຶກອົບຮົມ ແລະ ຮ່ວມມືສາກົນ (ICTC), ນະຄອນຫຼວງວຽງຈັນ ໃນຕໍ່ໜ້ານີ້.