ສະຫາຍ ພັນຄໍາ ວິພາວັນ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິ ການສູນກາງພັກປະຊາຊົນ ປະຕິວັດລາວ, ຮອງປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະໄດ້ເດີນທາງໄປຮ່ວມພິທີໄຫ້ວອາໄລເຖິງດວງວິນຍານຂອງສະຫາຍ ຟີເເດນ ກາສໂຕຼ ຣຸດສ ແຕ່ວັນທີ 30 ພະຈິກ 2016 ຢູ່ທີ່ເມືອງ ແຊນເຕນໂກ ເດ ກູບາ (Santiago de Cuba), ສ.ກູບາ ເຊຶ່ງເປັນຖິ່ນກໍາເນີດນັກປະຕິວັດຕໍ່ສູ້ເພື່ອປົດປ່ອຍປະເທດໃນເດືອນ ມັງກອນ 1959 ແລະ ໄດ້ສະຖາປະນາເປັນສາທາລະນະລັດ ກູບາ ມາເຖິງປະຈຸບັນ. ຄະນະຜູ້ແທນໄດ້ກັບຄືນເຖິງນະຄອນຫລວງວຽງຈັນ ດ້ວຍຄວາມສະຫວັດດີພາບ ໃນຕອນສວຍຂອງວັນທີ 07 ທັນວາ 2016.
ໂດຍໄດ້ຮັບການມອບຫມາຍຈາກ ພັກ-ລັດຖະບານ ສປປ ລາວ ຄະນະຜູ້ແທນຂັ້ນສູງດັ່ງກ່າວໄດ້ ນໍາເອົາຄວາມໂສກເສົ້າເສຍດາຍຂອງສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ກໍຄື ພັກ-ລັດຖະບານ ແລະ ປະຊາຊົນລາວອ້າຍນ້ອງ ຕໍ່ການສູນເສຍສະຫາຍ ຟີເເດນກາສໂຕຼຣຸດສຜູ້ນໍາການປະຕິວັດທີ່ຍິ່ງໃຫຍ່ຂອງພັກ, ລັດ ແລະ ປະຊາຊົນ ກູບາ ອ້າຍນ້ອງ ທັງເປັນເພື່ອນມິດສະຫາຍຮ່ວມອຸດົມການຂອງພັກ, ລັດຖະບານ ແລະ ປະຊາຊົນລາວ ໄປເຖິງການນໍາພັກ-ລັດຖະບານ ແລະ ປະຊາຊົນ ສ.ກູບາ ອ້າຍນ້ອງ.
ການເດີນທາງໄປ ສ.ກູບາ ຄັ້ງນີ້ ສະຫາຍ ພັນຄໍາ ວິພາວັນ ແລະ ຄະນະຜູ້ແທນກໍ່ໄດ້ຖືກຕ້ອນຮັບອັນອົບອຸ່ນດ້ວຍໄມຕີຈິດມິດຕະພາບຈາກການນໍາ ສ.ກູບາ ນັບແຕ່ມື້ໄປຮອດຈົນເຖິງມື້ກັບຄືນປະເທດ. ໃນໂອກາດດັ່ງກ່າວນີ້, ຄະນະຜູ້ແທນ ສປປ ລາວ ກໍ່ໄດ້ເຂົ້າພົບປະສະຫາຍ ຊານວາດໍຣ ບານເດສ ເມຊາ (Salvador Valdés Mesa), ກໍາມະການກົມການເມືອງສູນກາງພັກ, ຄະນະບໍລິຫານງານສູນກາງພັກ, ຮອງປະທານສະພາແຫ່ງລັດ ແຫ່ງ ສ.ກູບາ ທີ່ຫ້ອງວ່າການສູນກາງພັກຄອມມູນິດ ກູບາ ທີ່ ລາຮາວານ, ສ.ກູບາ.
ການພົບປະເຮັດວຽກຮ່ວມກັນສອງຝ່າຍຂອງຄະນະຜູ້ແທນຂັ້ນສູງຂອງ ສປປ ລາວ ແລະ ສ.ກູບາ ຄັ້ງນີ້, ນອກຈາກສອງຝ່າຍໄດ້ສະແດງຄວາມໂສກເສົ້າເສຍດາຍຕໍ່ການມໍລະນະກໍາຂອງສະຫາຍ ຟີເເດນກາສໂຕຼຣຸດສແລ້ວ. ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພັດທະນາເສດຖະກິດ-ສັງຄົມ, ສະພາບພາຍໃນປະເທດຕົນ, ໄດ້ທົບທວນຄືນການພົວພັນສອງຝ່າຍລະຫວ່າງ ສປປ ລາວ ແລະ ສ.ກູບາ, ເຊິ່ງແມ່ນປະເທດເພື່ອນມິດຍຸດທະສາດທີ່ມີມູນເຊື້ອການພົວພັນ, ຮ່ວມມື ແລະ ຊ່ວຍເຫລືອເຊິ່ງກັນແລະກັນເປັນຢ່າງດີຕະຫລອດໄລຍະ, ນັບແຕ່ສະໄຫມຕໍ່ສູ້ປົດປ່ອຍຊາດເມື່ອກ່ອນ ກໍຄືໃນພາລະກິດປົກປັກຮັກສາ ແລະ ພັດທະນາປະເທດຊາດປະຈຸບັນ ບົນພື້ນຖານອຸດົມການສ້າງສັງຄົມນິຍົມ. ສອງຝ່າຍຈະສືບຕໍ່ຮັດແຫນ້ນສາຍພົວພັນໃຫ້ເຂົ້າສູ້ລ່ວງເລິກດ້ວຍການຮ່ວມມື, ຊ່ວຍເຫລືອກັນໃນການສ້າງສາພັດທະນາເສດ ຖະກິດ-ສັງຄົມຂອງແຕ່ລະປະເທດ ໃນຂະແຫນ່ງການທີ່ສອງຝ່າຍມີທ່າແຮງ ເປັນຕົ້ນ: ດ້ານສາທາລະນະສຸກ ແລະ ການສຶກສາ ແລະ ກິລາ ແລະ ສະຫນັບສະຫນູນເຊິ່ງກັນແລະກັນໃນເວທີພາກພື້ນ ແລະ ສາກົນ.