ໃນຕອນເຊົ້າ ຂອງວັນທີ 29 ເມສາ 2017 ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍພັນລະຍາ ແລະ ຄະນະ ໄດ້ເຂົ້າຮ່ວມພິທີເປີດກອງປະຊຸມສຸດຍອດອາຊຽນຄັ້ງທີ 30 ພາຍໃຕ້ຄໍາຂວັນ: ‘ຮ່ວມມືເພື່ອການປ່ຽນແປງ, ຜູກຜັນກັບສາກົນ’ ໂດຍການເປັນເຈົ້າພາບ ແລະ ປະທານ ຂອງຟີລິບປິນ ຊຶ່ງມີບັນດາປະມຸກລັດ/ຫົວໜ້າລັດຖະບານປະເທດອາຊຽນ, ລັດຖະມົນຕີຕ່າງປະເທດອາຊຽນ ແລະ ແຂກຖືກເຊີນເຂົ້າຮ່ວມ.
ໃນວັນທີ 28 ເມສາ 2017 ທີ່ ນະຄອນຫຼວງມະນີລາ, ຟີລິບປິນ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ, ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 15 ແລະ ກອງປະຊຸມສະພາປະສານງານອາຊຽນ ຄັ້ງທີ 19 ໂດຍການເປັນເຈົ້າພາບ ແລະ ປະທານຂອງຟີລິບປິນ ພາຍໃຕ້ຄໍາຂັວນ: ‘ຮ່ວມມືເພື່ອການປ່ຽນແປງ, ຜູກຜັນກັບສາກົນ’.
ກອງປະຊຸມລັດຖະມົນຕີຕ່າງປະເທດອາຊຽນ ໄດ້ທົບທວນ ແລະ ປຶກສາຫາລື ກ່ຽວກັບການສືບຕໍ່ສ້າງປະຊາຄົມອາຊຽນ ໂດຍສະເພາະ ການຈັດຕັ້ປະຕິບັດວິໄສທັດປະຊາຄົມອາຊຽນ 2025 ແລະ ການພົວພັນຮ່ວມມືກັບພາຍນອກ, ພ້ອມທັງ ແລກປ່ຽນຄວາມຄິດຄວາມເຫັນກ່ຽວກັບບັນຫາພາກພື້ນ ແລະ ສາກົນ ທີ່ພວມສືບຕໍ່ຜັນແປ ເປັນຕົ້ນແມ່ນບັນຫາທີ່ອາຊຽນ ມີຄວາມສົນໃຈຮ່ວມກັນ ແລະ ສະພາບການຢູ່ພາກພື້ນຕ່າງໆ, ລວມທັງຕາເວັນອອກກາງ ແລະ ແຫຼມເກົາຫຼີ.
ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 15 ໄດ້ທົບທວນຄືນການຈັດຕັ້ງປະຕິບັດ ບັນດາໜ້າວຽກຕ່າງໆ ພາຍໃຕ້ເສົາຄໍ້າປະຊາຄົມການເມືອງ-ຄວາມໝັ້້ນຄົງອາຊຽນ ກໍຄື ການຈັດຕັ້ງປະຕິບັດບັນດາກິດຈະກຳພາຍໃຕ້ແຜນແມ່ບົດປະຊາຄົມການເມືອງ-ຄວາມໝັ້ນຄົງອາຊຽນ 2025 ຊຶ່ງເຫັນວ່າມີຄວາມຄືບໜ້າດີ ແລະ ໄດ້ຊຸກຍູ້ບັນດາຂະແໜງການຕ່າງໆ ພາຍໃຕ້ເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ ໃຫ້ສືບຕໍ່ຈັດຕັ້ງປະຕິບັດວຽກງານພາຍໃຕ້ຂອບວຽກຂອງຕົນ ແລະ ເນັ້ນຢໍ້າການປະສານງານ ລະຫວ່າງ ຂະແໜງການໃນການຈັດຕັ້ງປະຕິບັດກິດຈະກໍາທີ່ກວມລວມ ຫຼາຍຂະແໜງການ ແລະ ຫຼາຍເສົາຄໍ້າ ເພື່ອຮັບປະກັນໃຫ້ແກ່ການຈັດຕັ້ງປະຕິບັດແຜນແມ່ບົດປະຊາຄົມການເມືອງ-ຄວາມໝັ້ນຄົງອາຊຽນ 2025 ຢ່າງມີປະສິດທິພາບ ແລະ ປະສິດທິຜົນ. ໃນນີ້ ທ່ານ ສະເຫຼີມໄຊ ກົມມະສິດ ກໍໄດ້ແຈ້ງຕໍ່ກອງປະຊຸມຊາບວ່າ ສປປ ລາວ ໄດ້ໃຫ້ສັດຕະຍາບັນ ແກ່ສົນທິສັນຍາອາຊຽນ ວ່າດ້ວຍການຕ້ານການຄ້າມະນຸດ ໂດຍສະເພາະແມ່ຍິງ ແລະ ເດັກນ້ອຍ ແລະ ຈະຍື່ນສານສັດຕະຍາບັນ ໃຫ້ແກ່ເລຂາທິການໃຫຍ່ອາຊຽນ ໃນໄວໆນີ້.
ກອງປະຊຸມຂອງສະພາປະສານງານອາຊຽນ ຄັ້ງທີ 19 ໄດ້ສຸມໃສ່ການປຶກສາຫາລື ກ່ຽວກັບ ການຈັດຕັ້ງປະຕິບັດຄໍາຕົກລົງຂອງຜູ້ນໍາອາຊຽນ ໃນກອງປະຊຸມສຸດຍອດອາຊຽນ ຄັ້ງທີ 28 ແລະ 29 ທີ່ຈັດຂຶ້ນຢູ່ ສປປ ລາວ ໃນປີ 2016, ພິຈາລະນາ ວາລະ ແລະ ຮັບຮອງເອົາເອກະສານຜົນຂອງກອງປະຊຸມສຸດຍອດອາຊຽນ ຄັ້ງທີ 30 ແລະ ຮັບຮອງເອົາບັນດາບົດລາຍງານຂອງຂະແໜງການເພື່ອນໍາສະເໜີຜູ້ນໍາອາຊຽນ ພິຈາລະນາຮັບຊາບ ແລະ ຮັບຮອງເອົາ ເຊັ່ນ: ບົດລາຍງານຂອງເລຂາທິການໃຫຍ່ອາຊຽນ ກ່ຽວກັບ ການປະຕິບັດໜ້າທີ່ຂອງກອງເລຂາອາຊຽນ ແລະ ວຽກງານອາຊຽນ. ພ້ອມກັນນັ້ນ, ກອງປະຊຸມຍັງໄດ້ ຮັບຮອງເອົາບົດລາຍງານຂອງຜູ້ບໍລິຫານມູນລະນິທິອາຊຽນ, ບົດລາຍງານຂອງຄະນະກໍາມະການຜູ້ຕາງໜ້າຖາວອນປະຈໍາອາຊຽນ, ບົດລາຍງານຂອງໜ່ວຍງານສະເພາະກິດວ່າດ້ວຍຂໍ້ລິເລີ່ມເພື່ອການເຊື່ອມໂຍງອາຊຽນ ແລະ ບົດລາຍງານຂອງຄະນະກໍາມະການປະສານງານການເຊື່ອມຈອດອາຊຽນ ແລະ ອື່ນໆ.
ໃນກອງປະຊຸມດັ່ງກ່າວ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຊຸກຍູູ້ບັນດາຂະແຫນງການຂອງອາຊຽນ ເພື່ອສືບຕໍ່ປະກອບສ່ວນເຂົ້າໃນຂະບວນການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ກໍຄື ບັນດາແຜນແມ່ບົດສໍາລັບ 3 ເສົາຄໍ້າປະຊາຄົມອາຊຽນ, ແຜນວຽກຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 3 ແລະ ແຜນແມ່ບົດວ່າດ້ວຍການເຊື່ອມຈອດອາຊຽນ 2025 ໃຫ້ມີປະສິດທິພາບ.
ໃນໂອກາດນີ້, ທ່ານ ລັດຖະມົນຕີ ສະເຫຼີມໄຊ ກົມມະສິດ ຍັງຈະສືບຕໍ່ຕິດຕາມ ພະນະທ່ານ ນາຍົກ ລັດຖະມົນຕີ ທອງລຸນ ສີສຸລິດ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 30 ແລະ ກອງປະຊຸມພົບປະກັບໜ່ວຍງານຕ່າງໆ ທີ່ຈະຈັດຂຶ້ນໃນວັນທີ 29 ເມສາ 2017 ທີ່ ນະຄອນຫຼວງມະນີລາ, ຟີລິບປິນ ເຊັ່ນດຽວກັນ.