ໃນວັນທີ 15 ພຶດສະພາ 2017, ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ພ້ອມດ້ວຍຄະນະຜູ້ແທນຂັ້ນສູງຂອງລາວ ໄດ້ສືບຕໍ່ເຂົ້າຮ່ວມກອງປະຊຸມໂຕະມົນບັນດາຜູ້ນຳ ຂອງກອງປະຊຸມເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ ໜຶ່ງແລວທາງ ໜຶ່ງເສັ້ນທາງ ເປັນມື້ທີ 2, ເຊິ່ງໄດ້ມີການຮັບຮອງເອົາ ຖະແຫລງການຮ່ວມຂອງບັນດາຜູ້ນຳກອງປະຊຸມໂຕະມົນ ເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ໜຶ່ງແລວທາງ ໜຶ່ງເສັ້ນທາງ”(Joint Communique of the Leaders Roundtable of the Belt and Road Forum for International Cooperation).
ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ພ້ອມດ້ວຍຄະນະຜູ້ແທນຂັ້ນສູງຂອງລາວ ໄດ້ເດີນທາງເຖິງນະຄອນຫລວງປັກກິງ, ສປ ຈີນ, ໃນວັນທີ 13 ພຶດສະພາ 2017, ເພື່ອເຂົ້າຮ່ວມກອງປະຊຸມເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ໜຶ່ງແລວທາງ ໜຶ່ງເສັ້ນທາງ” ພາຍໃຕ້ຫົວຂໍ້: “ການຮ່ວມມືເພື່ອຄວາມວັດທະນາຖາວອນຮ່ວມກັນ” (Belt and Road: Cooperation for Common Prosperity) ທີ່ຈະຈັດຂື້ນເປັນເວລາ 2 ວັນ, ແຕ່ວັນທີ 14-15 ພຶດສະພາ 2017, ໂດຍໄດ້ຮັບການຕ້ອນຮັບຢ່າງອົບອຸ່ນຈາກການນໍາຂັ້ນສູງຂອງ ສປ ຈີນ, ແລະ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ.