ໃນຕອນເຊົ້າຂອງວັນທີ 27 ເມສາ 2017, ສະຫາຍ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ. ຫວຽດນາມ, ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງໄປວາງພວງມາລາ ເພື່ອລະນຶກ ແລະ ສະແດງຄວາມຮູ້ບຸນຄຸນ ຕໍ່ນັກຮົບປະຕິວັດ, ທີ່ ອານຸສາວະລີນັກຮົບນິລະນາມ. ຫຼັງຈາກນັ້ນ, ສະຫາຍ ນາຍົກລັດຖະມົນຕີ ແລະ ຄະນະຜູ້ແທນ ແຫ່ງ ສສ. ຫວຽດນາມ ກໍໄດ້ໄປຢ້ຽມຢາມບັນດາອະດີດການນຳຂອງ ສປປ ລາວ, ເຊັ່ນ: ຢ້ຽມຢາມ ສະຫາຍ ຄຳໄຕ ສີພັນດອນ, ອະດີດປະທານປະເທດ; ສະຫາຍ ສີສະຫວາດ ແກ້ວບຸນພັນ, ອະດີດນາຍົກລັດຖະມົນຕີ; ແລະ ສະຫາຍ ທອງສິງ ທໍາມະວົງ, ອະດີດນາຍົກລັດຖະມົນຕີ ແຫ່ງ ສປປ ລາວ. ໃນໂອກາດດັ່ງກ່າວ, ສະຫາຍ ຫງວຽນ ຊວັນ ຟຸກ ໄດ້ນຳເອົາຄວາມຢື້ຢາມຖາມຂ່າວ ຈາກບັນດາການນຳ ແຫ່ງ ສສ. ຫວຽດນາມ ເຖິງບັນດາອະດີດການນຳ ແຫ່ງ ສປປ ລາວ, ເຊິ່ງການພົບປະຢ້ຽມຢາມ ໄດ້ດຳເນີນໄປດ້ວຍບັນຍາກາດໄມຕີຈິດມິດຕະພາບ ແລະ ຄວາມໃກ້ຊິດສະໜິດແໜ້ນ ລະຫວ່າງ ສະຫາຍ ນາຍົກລັດຖະມົນຕີ ແຫ່ງ ສສ. ຫວຽດນາມ ແລະ ບັນດາອະດີດການນຳ ແຫ່ງ ສປປ ລາວ.
ໃນໂອກາດຢ້ຽມຢາມ ສປປ ລາວ ຄັ້ງນີ້, ສະຫາຍນາຍົກລັດຖະມົນຕີ ຫງວຽນ ຊວັນ ຟຸກ ຍັງໄດ້ເປັນກຽດເຂົ້າຮ່ວມພິທີເປີດໂຮງແຮມ ຄຼາວ ພຼາຊາ (Crowne Plaza), ເຊິ່ງເປັນໂຮງແຮມ ທີ່ລົງທຶນໂດຍນັກລົງທຶນຫວຽດນາມ ແລະ ໄດ້ຖືໂອກາດດັ່ງກ່າວ ພົບປະໂອ້ລົມກັບນັກທຸລະກິດ ຫວຽດນາມ ທີ່ລົງທຶນຢູ່ ສປປ ລາວ. ນອກນັ້ນ, ສະຫາຍ ຫງວຽນ ຊວັນ ຟຸກ ແລະ ຄະນະ ຍັງໄດ້ໄປຢ້ຽມຢາມສະຖານທີ່ສຳຄັນຂອງ ສປປ ລາວ ເຊັ່ນ: ຫໍພິພິດທະພັນ ໄກສອນ ພົມວິຫານ ແລະ ອານຸສອນສະຖານ ສຸພານຸວົງ ເປັນຕົ້ນ.
ການເດີນທາງຢ້ຽມຢາມ ສປປ ລາວ ຢ່າງເປັນທາງການ ຂອງ ສະຫາຍນາຍົກລັດຖະມົນຕີ ຫງວຽນ ຊວັນ ຟຸກ, ແລະ ຄະນະ ໃນຄັ້ງນີ້ ໄດ້ມີຜົນສຳເລັດ ແລະ ມີຄວາມໝາຍອັນສຳຄັນໃນຫຼາຍດ້ານເຊັ່ນ: ສອງຝ່າຍ ໄດ້ບັນລຸຂໍ້ຕົກລົງໃນລະດັບສູງ ແລະ ໄດ້ມີການລົງນາມເອກະສານຮ່ວມກັນ ຈຳນວນ 8 ສະບັບ, ພິເສດແມ່ນສາມາດບັນລຸໄດ້ຂໍ້ຕົກລົງ ວ່າດ້ວຍການຮ່ວມລົງທຶນ ເພື່ອພັດທະນາ ທ່າເຮືອຫວຸ້ງອ່າງ (ທ່າທຽບເຮືອ 1, 2 ແລະ 3), ເປັນທ່າເຮືອ ລາວ-ຫວຽດນາມ ເພື່ອ ສປປ ລາວ ມີທາງອອກສູ່ທະເລ. ພິເສດທີ່ສຸດ ແມ່ນສອງຝ່າຍໄດ້ພ້ອມກັນເປີດປີສາມັກຄີມິດຕະພາບ ລາວ-ຫວຽດນາມ ຫວຽດນາມ-ລາວ 2017 ຂຶ້ນຢ່າງເປັນທາງການ, ໂດຍເຫັນດີເປັນເອກະພາບກັນ ໃນການຈັດຕັ້ງບັນດາກິດຈະກຳເຄື່ອນໄຫວ ສະເຫຼີມສະຫຼອງສອງວັນປະຫວັດສາດ ຄື: ວັນຄົບຮອບ 40 ປີ ແຫ່ງການເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ ແລະ 55 ປີ ແຫ່ງ ການສ້າງຕັ້ງສາຍພົວພັນການທູດສອງປະເທດ ໃຫ້ມີຄວາມເຄັ່ງຂຶມ, ຄຶກຄື້ນ ແລະ ມີຄວາມໝາຍສຳຄັນ ໃນທົ່ວພັກ, ທົ່ວກອງທັບ ແລະ ທົ່ວປວງຊົນທັງສອງຊາດ.
ໃນຕອນຄ່ຳຂອງວັນທີ 26 ເມສາ 2017, ສະຫາຍ ນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍພັນລະຍາ ໄດ້ຈັດງານລ້ຽງຕ້ອນຮັບ ເປັນກຽດໃຫ້ແກ່ ສະຫາຍ ນາຍົກລັດຖະມົນຕີ ຫງວຽນ ຊວັນ ຟຸກ ພ້ອມດ້ວຍພັນລະຍາ ແລະ ຄະນະ ຢ່າງສົມກຽດ ແລະ ມີບັນຍາກາດແຫ່ງມິດໄມຕີທີ່ອົບອຸ່ນ.
ໃນຕອນແລງຂອງວັນທີ 27 ເມສາ 2017, ສະຫາຍ ນາຍົກລັດຖະມົນຕີ ຫງວຽນ ຊວັນ ຟຸກ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງກັບຄືນ ສສ. ຫວຽດນາມ ດ້ວຍຄວາມສະຫວັດດີພາບ.