ໃນວັນທີ 3 ເມສາ 2017, ທີ່ ກະຊວງປ້ອງກັນຄວາມສະຫງົບ, ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ຕາງໜ້າໃຫ້ຄະນະພັກ, ຄະນະນຳ ແລະ ພະນັກງານກະຊວງການຕ່າງປະເທດ ໄດ້ນຳເອົາກະຕ່າດອກໄມ້ ເຂົ້າອວຍພອນ ຄະນະນຳກະຊວງປ້ອງກັນຄວາມສະຫງົບ, ເນື່ອງໃນໂອກາດ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 56 ປີ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ຄະນະພັກ, ຄະນະນຳ ພ້ອມດ້ວຍພະນັກງານກະຊວງການຕ່າງປະເທດ ສະແດງຄວາມຮູ້ບຸນຄຸນ ແລະ ຊົມເຊີຍ ຄະນະນຳກະຊວງປ້ອງກັນຄວາມສະຫງົບ ພ້ອມດ້ວຍພະນັກງານ ທີ່ໄດ້ປະຕິບັດວຽກງານມີຜົນສຳເລັດອັນໃຫຍ່ຫຼວງ ຕະຫຼອດໜຶ່ງປີຜ່ານມາ ແລະ ອວຍພອນໄຊອັນປະເສີດ ໃຫ້ນາຍ ແລະ ອ້າຍນ້ອງກຳລັງປ້ອງກັນຄວາມສະຫງົບ ຈົ່ງມີສຸຂະພາບເຂັ້ມແຂງ ເພື່ອສືບຕໍ່ປະຕິບັດໜ້າທີ່ວຽກງານອັນມີກຽດ ໃນການປົກປັກຮັກສາ ແລະ ສ້າງສາພັດທະນາ ສປປ ລາວ ກໍຄືຄວາມສະຫງົບສຸກ ແລະ ຄວາມເປັນລະບຽບຮຽບຮ້ອຍຂອງສັງຄົມ ໃຫ້ມີຜົນສຳເລັດຢ່າງດີຕະຫຼອດໄປ.