ໃນວັນທີ 25 ເມສາ 2017 ທີ່ຜ່ານມາ, ທ່ານສະເຫຼີມໄຊກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ຮັບການເຊື້ອເຊີນຈາກ ສູນ Jeffrey Sachs ເພື່ອການພັດທະນາແບບຍືນຍົງ, ປະເທດມາເລເຊຍ, ໃຫ້ເປັນແຂກກິດຕິມະສັກ ເພື່ອມີຄຳເຫັນ ຕໍ່ກອງປະຊຸມສຳມະນາ ກ່ຽວກັບ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ຢູ່ພາກພື້ນອາຊີຕາເວັນອອກສ່ຽງໃຕ້ເຊິ່ງໄດ້ຈັດຂື້ນພາຍໃຕ້ຫົວຂໍ້ “ການກຳນົດທິດທາງແລະທ່າແຮງເພື່ອການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃນອານະຄົດ”.
ໃນວັນທີ 11 ເມສາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນໄຊອິດສະຫຼະ ຊັ້ນ 2 ໃຫ້ແກ່ ທ່ານ ພົງສະຫວັດ ບຸບຜາ, ອະດີດຮອງລັດຖະມົນຕີກະຊວງການຕ່າງປະເທດ, ອະດີດລັດຖະມົນຕີປະຈຳສຳນັກງານປະທານປະເທດ ທີ່ໄດ້ມີຜົນງານປະກອບສ່ວນທາງດ້ານເຫື່ອແຮງ, ສະຕິປັນຍາ ເຂົ້າໃນໂຄງການປັກຫຼັກໝາຍຖີ່ ແລະ ບູລະນະລະບົບຫຼັກໝາຍຊາຍແດນ ລາວ-ຫວຽດນາມ ໃນລະຫວ່າງປີ 2008-2015 ໄດ້ຮັບຜົນສໍາເລັດເປັນຢ່າງດີ, ຊຶ່ງເປັນການປະກອບສ່ວນອັນສຳຄັນໃນການປົກປັກຮັກສາ ແລະ ສ້າງສາປະເທດຊາດ.