ກອງປະຊຸມຄະນະກໍາມະການຜູ້ຕາງໜ້າຖາວອນປະຈໍາອາຊຽນ ຄັ້ງທີ 7 ( 7/2016 CPR Meeting )ໄດ້​ຈັດ​ຂື້ນໃນວັນທີ 5 ພຶດສະພາ 2016, ທີ່ ໂຮງແຮມຫຼວງພະບາງວິວ, ແຂວງຫຼວງພະບາງ ພາຍໃຕ້ການເປນປະທານຂອງ ທ່ານ ລັດສະໝີ ແກ້ວມະນີ, ເອກອັກຄະລັດຖະທູດ, ຜູ້ຕາງໜ້າຖາວອນແຫ່ງ ສປປ ລາວ ປະຈໍາອາຊຽນ ໂດຍມີການເຂົ້າຮ່ວມຂອງບັນດາເອກອັກຄະລັດຖະທູດ, ຜູ້ຕາງໜ້າຖາວອນປະເທດສະມາຊິກອາຊຽນ, ຮອງເລຂາທິການໃຫຍ່ອາຊຽນຮັບຜິດຊອບວຽກເສົາຄໍ້າການເມືອງ-ຄວາມໝັ້ນຄົງ, ພະນັກງານການທູດຈາກບັນດາປະເທດສະມາຊິກ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໃນວັນທີ 24 ເມສາ 2016, ທີ່ ນະຄອນຫລວງລອນດອນ, ປະເທດອັງກິດ, ສະຖານເອກອັກຄະລັດຖະທູດ ແຫ່ງ ສປປ ລາວ ໄດ້ຈັດພິທີບາສີສູ່ຂວັນສະເຫລີມສະຫລອງປີໃໝ່ລາວ ພສ 2559 ແລະ ສູດປະລິຕະມົງຄຸນຂຶ້ນຢູ່ສະຖານທູດ ຊຶ່ງເປັນການທຳພິທີທາງສາສະໜາຄັ້ງທຳອິດ ນັບແຕ່ສະຖານເອກອັກຄະລັດຖະທູດໄດ້ຮັບການເປີດຄືນໃໝ່.

ໂດຍອີງຕາມການເຊື້ອເຊີນຂອງກະຊວງວັດທະນາທຳໄທ, ໃນວັນທີ 20-24 ເມສາ ທີ່ຜ່ານມານີ້ ສະຖານເອກອັກຄະລັດຖະທູດ ສປປ ລາວ ທີ່ບາງກອກ ໄດ້ເຂົ້າຮ່ວມງານເທດສະການຊິມອາຫານອາຊຽນ ເຊິ່ງແມ່ນສ່ວນໜື່ງຂອງງານມະຫາກຳວັດທະນາທຳອາຊຽນ ປີ 2016 ທີ່ປະເທດໄທ ເປັນເຈົ້າພາບຈັດຂຶ້ນ. ການເຂົ້າຮ່ວມງານໃນຄັ້ງນີ້, ທາງສະຖານທູດລາວ ໄດ້ນຳເອົາຜະລິດຕະພັນອາຫານລາວ ຈຳນວນ 10 ເຍື່ອງ ທີ່ລວມມີທັງອາຫານຫຼັກ ແລະ ອາຫານຫວານ ເຂົ້າຮ່ວມສາທິດ, ແຈກຈ່າຍ ແລະ ຈຳໜ່າຍ.