ກອງ​ປະຊຸມ ຄັ້ງ​ທີ 21 ຂອງ ຄະນະ​ກຳມາ​ທິການ​ລະຫວ່າງ​ລັດຖະບານ​ອາ​ຊຽນ ວ່າ​ດ້ວຍ ສິດທິ​ມະນຸດ ໄດ້ມີຂຶ້ນໃນ​ວັນ​ທີ 5-9 ​ເມສາ 2016 ທີ່ ກອງ​ເລຂາ​ອາ​ຊຽນ,​ ໂດຍ​ການ​ເປັນ​ປະທານ​ຂອງ ທ່ານ ພູ​ໂຂງ ສີ​ສຸລາ​ດ, ປະທານ​ຄະນະ​ກຳມາ​ທິການ​ລະຫວ່າງ​ລັດຖະບານ​ອາ​ຊຽນ ວ່າ​ດ້ວຍ ສິດທິ​ມະນຸດ, ຫົວໜ້າກົມ​ສົນທິສັນຍາ ​ແລະ ກົດໝາຍ, ກະຊວງການ​ຕ່າງປະ​ເທດ. ​​ກອງ​ປະຊຸມ​ໄດ້​ປຶກສາ​ຫາລື​ແຜນກິດຈະກຳບູລິມະສິດ ສຳລັບປີ 2016 ຂອງຄະນະ​ກຳມາ​ທິການ​ລະຫວ່າງ​ລັດຖະບານ​ອາ​ຊຽນ ວ່າ​ດ້ວຍ ສິດທິ​ມະນຸດ, ຮ່າງບົດລາຍງານການ​ເຄື່ອນ​ໄຫວປະຈຳປີ 2016 ແລະ ແຜນກິດຈະກໍາບູລິມະສິດ ສໍາລັບ​ສົກປີ 2017. ໃນ​ລະຫວ່າງ​ກອງ​ປະຊຸມ, ຄະນະ​ກຳມາ​ທິການ​ລະຫວ່າງ​ລັດຖະບານ​ອາ​ຊຽນ ວ່າ​ດ້ວຍ ສິດທິ​ມະນຸດ ​ໄດ້​ພົບປະ​ປະຈຳ​ປີ ກັບ ​ເລຂາທິການ​ໃຫຍ່​ອາ​ຊຽນ ​​ແລະ ຄະນະກຳມະການຜູ້ຕາງໜ້າອາຊຽນ (CPR) ເພື່ອ​ເພີ່ມ​ທະວີ​ການ​ປະສານ​ງານ​ໃນ​ການ​ປະຕິບັດ​ພາລະ​ບົດບາດ​ໃນ​ການ​ສົ່ງ​ເສີມ ​ແລະ ປົກ​ປ້ອງ​ສິດທິ​ມະນຸດ​ ຢູ່​ ອາ​ຊຽນ ບົນພື້ນຖານເງື່ອນ​ໄຂຂອງ​ພາກ​ພື້ນ ​ແລະ ຂອງ​ແຕ່ລະ​ປະ​ເທດສະ​ມາ​ຊິກ​ອາ​ຊຽນ.

ໃນວັນທີ 22 ເມສາ 2016, ກົມອາຊຽນ, ກະຊວງການຕ່າງປະເທດໄດ້ຈັດກອງປະຊຸມເຜີຍແຜ່ ສຳລັບບັນດາທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນທີ່ກ່ຽວຂ້ອງ ກ່ຽວກັບການເປັນປະທານອາຊຽນ ຂອງ ສປປ ລາວ ປີ 2016, ທີ່ໂຮງແຮມດອນຈັນ ພາເລສ, ນະຄອນຫລວງວຽງຈັນ ໂດຍການເປັນປະທານຂອງທ່ານ ພົງ​ສະຫວັນ ສີ​ສຸລາ​ດ, ຫົວໜ້າກົມອາຊຽນ, ກະຊວງການຕ່າງປະເທດ ແລະ ບັນຍາຍໂດຍ ຜູ້ຕາງຫນ້າຈາກກະຊວງການຕ່າງປະເທດ, ກະຊວງອຸດສາຫະກຳ ແລະ ການຄ້າ, ແລະ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສໍາລັບ ແຕ່ລະເສົາຄໍ້າປະຊາຄົມອາຊຽນ ຄື: ປະຊາຄົມ ການເມືອງ-ຄວາມຫມັ້ນຄົງອາຊຽນ, ປະຊາຄົມ ເສດຖະກິດອາຊຽນ ແລະ ປະຊາຄົມ ວັດທະນະທໍາ-ສັງຄົມອາຊຽນ. ພ້ອມດ້ວຍຜູ້ເຂົ້າຮ່ວມຈາກຂະແຫນງການກ່ຽວຂ້ອງ, ບັນດາທູຕານຸທູດ, ແລະ ອົງການຈັດຕັ້ງສາກົນທີ່ກ່ຽວຂ້ອງຕ່າງໆຈໍານວນ 100 ກ່ວາທ່ານ.

ໃນທາມກາງບັນຍາກາດທີ່ປວງຊົນລາວທັງຊາດ ພວມເບີກບານມວນຊື່ນ ສະເຫຼີມສະຫລອງ ປີໃໝ່ລາວ ພສ 2559, ສະຖານທູດລາວ ທີ່ໂຕກຽວ, ປະເທດຍີ່ປຸ່ນ, ກໍ່ບໍ່ໄດ້ປະຮີດໃຫ້ໝອງ ບໍ່ໄດ້ປະຄອງໃຫ້ເສົ້າ, ໄດ້ພ້ອມພາກັນຈັດງານສະຫລອງບຸນປີໃໝ່ລາວຂື້ນ ໃນວັນທີ 17 ເມສາ 2015 ຢູ່ໃນໃຈກາງນະຄອນຫລວງໂຕກຽວ, ເມືອງມີນາໂຕກຶ ເຊິ່ງເປັນບ່ອນທີ່ ທຸງຊາດລາວປີວສະບັດຢູ່ເທີງປາຍເສົາ, ໂດຍມີຜູ້ຄົນ 400 ກ່ວາຄົນ ຫລັ່ງໄຫລ່ເຂົ້າມາຮ່ວມງານຢ່າງຄັບຄາໜາແໜ້ນ ເຊິ່ງໃນນັ້ນ ມີທັງພີ່ນ້ອງຊາວລາວ ຢູ່ປະເທດຍີ່ປຸ່ນ, ນັກສຶກສາລາວ ແລະ ຊາວຍີ່ປຸ່ນ.