ສະຖານ​ເອກອັກຄະ​ລັດຖະທູດ ​ແຫ່ງ ສປປ ລາວ ປະ​ຈໍາຣາຊະ​ອານາຈັກ ກໍາປູ​ເຈຍ ​​ໄດ້ຈັດ​ການ ແຂ່ງຂັນ​ກິ​ລາ​ ມິດຕະພາບ ກັບ​ກະຊວງ​ການ​ຕ່າງປະ​ເທດ ​ແລະ ​ຮ່ວມ​ມື​ສາກົນ ​ແຫ່ງ ຣາຊະ​ອານາຈັກ ກໍາປູ​ເຈຍ ຢູ່ ສະຖານ​ເອກ​ອັກຄະ​ລັດຖະທູດ ​ແຫ່ງ ສປປ ລາວ ​ເພື່ອ​ຂໍ່ານັບ​ຮັບ​ຕ້ອນວັນ​ສ້າງ​ຕັ້ງ​ສາຍ​ພົວພັນ​ການ​ທູດ ລາວ-ກຳປູ​ເຈຍ ຄົບຮອບ 60 ປີ (15/06/1956-15/06/2016) ໃນ​ວັນ​ສຸກ, ທີ 10 ມິຖຸນາ 2016 ​​​ໂດຍມີ ພະນະທ່ານ ອຸ​ງ ຊຽນ, ​ຮອງ​ລັດຖະມົນຕີກະຊວງ​ການ​ຕ່າງປະ​ເທດ ​ແລະ ​ຮ່ວມ​ມື​ສາກົນ ​ແຫ່ງ ຣາຊະ​ອານາຈັກ ກໍາປູ​ເຈຍ ພ້ອມ​ດ້ວຍ​ພັນ​ລະ​ຍາ, ພະນະທ່ານ ປຣະສິດ ​ໄຊ​ຍະ​ສິດ, ​ເອກ​ອັກຄະ​ລັດຖະທູດ ວິສາມັນ​ຜູ້​ມີ​ອໍານາດ​ເຕັມ ​ແຫ່ງ ສປປ ລາວ ປະ​ຈໍາ ຣາຊະ​ອານາຈັກ ກໍາປູ​ເຈຍ ​ເປັນ​ກຽດ​ເຂົ້າ​ຮ່ວມ​ຊົມ​ການ​ແຂ່ງຂັນ ນອກຈາກ​ນັ້ນ​ຍັງ​ມີ ທ່ານ ຫົວໜ້າ​ ​ແລະ ຮອງ​ຫົວໜ້າ​ກົມ ອາຊີ I ​ແລະ ກົມ​ພິທີການ​ທູດ ພ້ອມ​ດ້ວຍ​ພະນັກງານຈາກ​ກະຊວງ​ການ​ຕ່າງປະ​ເທດ ​ແລະ ຮ່ວມ​ມື​ສາກົນ, ສະຖານທູດ​ລາວ ​ແລະ ນັກ​ສຶກສາລາ​ວ​ເຂົ້າ​ຮ່ວມ ​​ໂດຍ​ມີ​ການ​ແຂ່ງຂັນ ​3 ປະ​ເພດກິລາ​ຄື: ກິລາ​ຕີດອກ​ປີກ​ໄກ່, ກິລາ​ເປ​ຕັງ ​ແລະ ກິລາ​ປິ່ງ​ປ່ອງ ​ໂດຍ​ມີ​ການ​ແຂ່ງ​ຂັນ​ຂອງ​ທີ​ມຍິງ ​ແລະ ທີ​ມຊາຍ ​ເພື່ອ​ຊິງຂັນ​ລາງວັນ​ທີ 1 ​ແລະ ລາງວັນ​ທີ 2​ ​ໃນ​ແຕ່ລະ​ປະ​ເພດ​ກິລາ​​, ການຈັດ​ການ​​ແຂ່ງ​ຂັນ​ກິລາ​ດັ່ງກ່າວ​ ​ເພື່ອ​ເປັນ​ການ​ຮັດ​ແໜ້ນ​ສາຍ​ພົວພັນ​ມິດ​ຕະພາບ ​ແລະ ການ​ຮ່ວມ​ມືທີ່​ດີຖານ​ບ້ານ​ໃກ້​ເຮືອນ​ຄຽງທີ່​ມີ​ມູນ​ເຊື້ອ​ມາ​ແຕ່​ບູຮານນະ​ການ​ ກໍ​ຄື​ການ​ສ້າງ​ຄວາມ​ສາມັກຄີ​ຮັກ​ແພງ​ກັນລະຫວ່າງ​ກະຊວງ ​ແລະ ສະຖານທູດ. ການແຂ່ງຂັນແມ່ນ​ໄດ້ດຳເນີນໄປດ້ວຍບັນຍາກາດຟົດຟື້ນມ່ວນຊື່ນ ແລະ ຄວາມສາມັກຄີອັນແຫນ້ນແຟ້ນ. ພາຍຫຼັງ​ສໍາ​ເລັດ​ການ​ແຂ່ງຂັນ​ກໍ​ໄດ້​ມີ​ການ​ມອບ​ລາງວັນ ​ແລະ ຮ່ວມ​ພາ​ເຂົ້າ​ສາມັກຄີ ພ້ອມ​ທັງ​ມ່ວນ​ຊື່ນ​ລໍາວົງສາມັກ​ຄີ​ຮ່ວມ​ກັນ.

ໃນວັນທີ 6 ມິຖຸນາ 2016, ທີ່ ສຳນັກງານໃຫຍ່ຂອງອົງການເກືອດຫ້າມສານອາວຸດເຄມີ OPCW, ນະຄອນລາຮາຍ, ປະເທດ ໂຮນລັງ, ທ່ານ ຄຳເຄື່ອງ ບຸນເຕີມ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ບຣຸກແຊນ, ປະເທດ ແບນຊິກ, ໄດ້ເຂົ້າຍື່ນສານແຕ່ງຕັ້ງຕໍ່ ທ່ານ Ahmet Uzumcu, ຫົວໜ້າກົມ ອົງການເກືອດຫ້າມສານອາວຸດເຄມີ ເພື່ອດຳລົງຕຳແໜ່ງເປັນຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ອົງການເກືອດຫ້າມສານອາວຸດເຄມີ.

ໃນວັນທີ 27 ພຶດສະພາ 2016, ທ່ານ ສົງການ ຫລວງມຸນິນທອນ, ຫົວໜ້າກົມເສດຖະກິດ, ກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສ ຂອບການຮ່ວມມື ແມ່ນ້ຳຂອງ-ສ.ເກົາຫລີ ​ໄດ້​ນຳພາ​ຄະນະ​ຜູ້ແທນລາວ ​ເຂົ້າ​ຮ່ວມກອງ​ປະຊຸມ ເຈົ້າໜ້າທີ່ອາວຸໂສ ຂອບການຮ່ວມມື ແມ່​ນ້ຳຂອງ-ສ.​ເກົາຫລີ, ທີ່ ພະນົມເປັນ, ປະເທດກໍາປູເຈຍ, ພາຍ​ໃຕ້​ການ​ເປັນ​ປະທານ​ຮ່ວມ​ ຂອງ ທ່ານ ກັງ ຢຸນ-ຮູນ, ຫົວໜ້າກົມກິດຈະການອາຊີໃຕ້ ແລະ ປາຊີຟິກ, ​ກະຊວງການ​ຕ່າງປ​ະ​ເທດຂອງ ສ.​ເກົາຫລີ ​ແລະ ທ່ານ ສົກ ສີພັນນາ, ທີ່ປຶກສາປະຈຳ​ກະຊວງ​ການ​ຕ່າງປະ​ເທດ ແລະ ການຮ່ວມມືສາກົນ ​ຂອງ ກຳປູເຈຍ ແລະ ຍັງ​ມີ​ບັນດາຫົວໜ້າເຈົ້າໜ້າທີ່ອາວຸໂສ ພ້ອມ​ດ້ວຍ​ຄະນະ ຈາກປະເທດແມ່ນໍ້າຂອງ (ກຳປູ​ເຈຍ, ສປປ ລາວ, ມຽນມາ, ​ໄທ ​ແລະ ຫວຽດນາມ) ເຂົ້າຮ່ວມຢ່າງພ້ອມພຽງ.