ໃນລະຫວ່າງວັນທີ 15-16 ກຸມພາ 2017, ທີ່ ນະຄອນຢາງກຸງ, ຄະນະກໍາມະການຊາຍແດນ ແຫ່ງ ສປປ ລາວ ແລະ ສສ ມຽນມາ ໄດ້ດຳເນີນກອງປະຊຸມຄັ້ງທີ XII ຂອງຄະນະກໍາມະການຊາຍແດນ ລາວ-ມຽນມາ ຂັ້ນສູນກາງ ໂດຍໄດ້ສັງເກດຕີລາຄາ ກ່ຽວກັບ ການຈັດຕັ້ງປະຕິບັດຕາມບົດ​ບັນທຶກ​ກອງ​ປະຊຸມ​ຄັ້ງ​ທີ XI ຂອງ​ຄະນະ​ກໍາມະການ​ຊາຍ​ແດ​ນ ລາວ-ມຽນມາ ຂັ້ນສູນກາງ, ສະບັບລົງ​ວັນ​ທີ 22 ທັນວາ 2013 ແລະ ຕາມສັນຍາ​ວ່າດ້ວຍການ​ຄຸ້ມ​ຄອງ ​ແລະ ຮ່ວມມື​ຕາມ​ບໍລິ​ເວນ​ຊາຍ​ແດນ ລາວ-ມຽນມາ ທີ່​ທັງສອງຝ່າຍໄດ້​ລົງ​ນາມກັນໄວ້​ໃນ​ວັນ​ທີ 29 ມີນາ 1997.

ໃນວັນທີ 14 ກຸມພາ 2017, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Vladimir Goshin ເນື່ອງໃນໂອກາດມາຍື່ນສານຕາຕັ້ງຕໍ່ ປະທານປະເທດ ແຫ່ງ ສປປ ລາວ ເພື່ອດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ເບລາຣຸດ ປະຈຳ ສປປ ລາວ, ຊຶ່ງມີສຳນັກງານຕັ້ງຢູ່ ຮ່າໂນ້ຍ, ສສ. ຫວຽດນາມ.