ໃນວັນທີ 10 ມັງກອນ 2017, ທີ່ ແຂວງຈຳປາສັກ, ໄດ້ມີພິທີເປີດດ່ານສາກົນ ໜອງນົກຂຽນ-ຕຣາປຽງກຣຽນ, ໂດຍເປັນກຽດເຂົ້າຮ່ວມຂອງ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ, ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ; ມີບັນດາລັດຖະມົນຕີ, ຮອງລັດຖະມົນຕີຂອງສອງຝ່າຍ; ຄະນະພັກ, ຄະນະນຳແຂວງຈຳປາສັກ, ແຂວງຊຽງແຕງ, ເອກອັກຄະລັດຖະທູດ, ກົງສູນໃຫ່ຍ ແຫ່ງ ສປປ ລາວ ປະຈຳຣາຊະອານາຈັກກຳປູເຈຍ ແລະ ຣາຊະອານາຈັກກຳປູເຈຍ ປະຈຳລາວ ແລະ ປະຊາຊົນຂອງສອງປະເທດ ເຂົ້າຮ່ວມ.
ສປປ ລາວ ແລະ ຣາຊະອານາຈັກ ກໍາປູເຈຍ ເປັນປະເທດບ້ານໃກ້ເຮືອນຄຽງ, ບ້ານພີ່ເມືອງນ້ອງ, ທີ່ມີຊາຍແດນ ແລະ ແມ່ນໍ້າລໍາເຊຕິດຈອດກັນ 535 ກິໂລແມັດ. ປະຊາຊົນລາວ ແລະ ກໍາປູເຈຍ ມີສາຍພົວພັນມິດຕະພາບ ທີ່ເປັນມູນເຊື້ອ, ມີຄວາມສາມັກຄີຮັກແພງ, ມີການຮ່ວມມືທີ່ດີງາມ ແລະ ໄປມາຫາສູ່ກັນ ແລະ ຊ່ວຍເຫຼືອກັນມາແຕ່ບູຮານນະການ. ການພົວພັນຮ່ວມມືລະຫວ່າງສອງປະເທດ ໃນປະຈຸບັນ ນັບມື້ນັບໄດ້ຮັບການເສີມຂະຫຍາຍ ໃຫ້ແໜ້ນແຟ້ນ ແລະ ກ້າວເຂົ້າສູ່ລວງເລິກ ແລະ ລວງກວ້າງເປັນລຳດັບ.
ດ່ານສາກົນ ໜອງນົກຂຽນ-ຕຣາປຽງກຣຽນ ເປັນດ່ານສາກົນແຫ່ງທໍາອິດ ລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ, ຊຶ່ງກ່ອນໜ້ານີ້ ເຄີຍເປັນດ່ານທ້ອງຖິ່ນ ເພື່ອອໍານວຍຄວາມສະດວກໃຫ້ແກ່ການໄປມາຫາສູ່ກັນ ລະຫວ່າງ ປະຊາຊົນແຂວງຈຳປາສັກ ແລະ ແຂວງຊຽງແຕງ. ມາຮອດວັນທີ 9 ເມສາ 2009, ສອງປະເທດ ໄດ້ເຫັນດີຍົກລະດັບໃຫ້ເປັນດ່ານສາກົນ ແລະ ໄດ້ທຸ້ມເທທຸກຄວາມພະຍາຍາມ ລວມທັງວັດຖຸ ແລະ ປັດໃຈ ເພື່ອສ້າງດ່ານແຫ່ງນີ້ ຈົນສຳເລັດ. ການເປີດດ່ານສາກົນນີ້ ແມ່ນມີຄວາມໝາຍຄວາມສໍາຄັນສູງ ເພາະແມ່ນເຫດການປະຫວັດສາດໜຶ່ງທີ່ສໍາຄັນ ທີ່ເກີດຂື້ນໃນທ່າມກາງບັນຍາກາດທີ່ສອງປະເທດ ໄດ້ສະເຫຼີມສະຫຼອງວັນສ້າງຕັ້ງສາຍພົວພັນການທູດສອງປະເທດ ລາວ-ກໍາປູເຈຍ; ກໍາປູເຈຍ-ລາວ ຄົບຮອບ 60 ປີ ແລະ ທັງເປັນການຕອບສະໜອງຄວາມມຸ້ງມາດປາດຖະໜາຂອງປະຊາຊົນສອງປະເທດ ທີ່ຢາກຮັດແໜ້ນສາຍພົວພັນມິດຕະພາບ ທີ່ເປັນມູນເຊື້ອມາແຕ່ດົນນານ ແລະ ການຮ່ວມມືອັນດີ ລະຫວ່າງ ປະຊາຊົນສອງປະເທດ ໃຫ້ແໜ້ນແຟ້ນຍິ່ງໆຂື້ນ ໂດຍຜ່ານການໄປມາຫາສູ່ກັນຕາມບໍລິເວນຊາຍແດນ ແລະ ເພື່ອຊຸກຍູ້ສົ່ງເສີມການທ່ອງທ່ຽວ ລະຫວ່າງປະຊາຊົນສອງຊາດ ກໍຄືຕ່າງປະເທດ.
ດ່ານດັ່ງກ່າວ ຈະເປັນເສັ້ນທາງເຊື່ອມຕໍ່່ ລະຫວ່າງ ແຂວງຈຳປາສັກ ກັບ ແຂວງຊຽງແຕງ ແລະ ບັນດາແຂວງ ຂອງຣາຊະອານາຈັກກຳປູເຈຍ, ຊຶ່ງຈະຊ່ວຍອຳນວຍຄວາມສະດວກໃນການຄ້າຂາຍ ຢູ່ຕາມບໍລິເວນຊາຍແດນ, ສົ່ງເສີມການທ່ອງທ່ຽວຂອງແຂວງຈຳປາສັກ ແລະ ການລົງທືນໃນຂົງເຂດຕ່າງໆ ທີ່ແຂວງມີທ່າແຮງ, ຊຶ່ງຈະເປັນການປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງແຂວງຈຳປາສັກ ໃຫ້ມີຜົນສຳເລັດຕົວຈິງ ແລະ ເຮັດໃຫ້ຊີວິດການເປັນຢູ່ຂອງປະຊາຊົນ ນັບມື້ນັບດີຂື້ນເທື່ອລະກ້າວ. ນອກນີ້, ຍັງຈະຊ່ວຍຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ລາວ-ກຳປູເຈຍ, ໂດຍສະເພາະ ແຂວງຈຳປາສັກ ກັບ ແຂວງຊຽງແຕງ, ປະກອບສ່ວນເຂົ້າໃນການສົ່ງເສີມມູນຄ່າການຄ້າ ແລະ ການໄປມາຫາສູ່ກັນຂອງນັກທ່ອງທ່ຽວ ກໍຄືປະຊາຊົນສອງຊາດ ຢູ່ຕາມບໍລິເວນຊາຍແດນ ລາວ-ກຳປູເຈຍ ໃຫ້ມີຈໍານວນເພີ່ມຂຶ້ນ ທັງມີຄວາມສະດວກ, ວ່ອງໄວ, ຂະຫຍາຍຕົວ ແລະ ເປັນລະບົບຍິ່ງຂື້ນ.
ນອກຈາກນີ້, ດ່ານແຫ່ງນີ້ ຍັງຈະປະກອບສ່ວນອັນສຳຄັນເຂົ້າໃນການເຊື່ອມໂຍງພາຍໃນພາກພື້ນ, ສົ່ງເສີມການເຊື່ອມຈອດ ກັບແລວທາງເສດຖະກິດຕາເວັນອອກ-ຕາເວັນຕົກ ອັນຈະເປັນການປະກອບສ່ວນເຂົ້າໃນການປະຕິບັດສັນຍາ ວ່າດ້ວຍການສົ່ງເສີມ ແລະ ອໍານວຍຄວາມສະດວກດ້ານການຄ້າ ຢູ່ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ກໍຄືການເຊື່ອມຈອດອາຊຽນ ແລະ ພາກພື້ນອື່ນ.
ພິທີເປີດດ່ານສາກົນ ໜອງນົກຂຽນ-ຕຣາປຽງກຣຽນ ໄດ້ຮັບການຈັດຕັ້ງຂຶ້ນພາຍໃຕ້ບັນຍາກາດອັນເບີກບານມ່ວນຊື່ນ ໃນຂະນະທີ່ສອງພັກ, ສອງລັດ ແລະ ປະຊາຊົນສອງຊາດ ໄດ້ສະແດງຄວາມປິຕິຍິນດີຢ່າງສູງ ທີ່ເຫັນວ່າ ການຮ່ວມມືດ້ານວຽກງານປັກຫຼັກໝາຍຊາຍແດນ ລະຫວ່າງ ສອງປະເທດ ມີຄວາມຄືບໜ້າຢ່າງຕໍ່ເນື່ອງ. ນັບແຕ່ປີ 2000 ມາເຖິງປະຈຸບັນ, ສອງປະເທດ ສາມາດສຳຫລວດ ແລະ ປັກຫຼັກໝາຍ ໄດ້ທັງໝົດ126 ຫຼັກ, ລວມມີຄວາມຍາວ 465 ກິໂລແມັດ, ກວມເອົາ 87% ຂອງຄາດໝາຍທີ່ວາງໄວ້. ຜົນສໍາເລັດອັນມີຄວາມໝາຍທາງປະຫວັດສາດນີ້ ແມ່ນໄດ້ຕອບສະໜອງຕາມຄວາມມຸ້ງມາດປາດຖະໝາ ແລະ ເຈດຕະນາລົມອັນແຮງກ້າ ຂອງການນຳຂອງສອງພັກ, ສອງລັດ ກໍຄືຂອງປະຊາຊົນສອງຊາດ ລາວ-ກໍາປູເຈຍ ທີ່ຢາກເຮັດໃຫ້ເສັ້ນຊາຍແດນຂອງສອງປະເທດ ເປັນເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື ເພື່ອຄວາມສົມບູນ-ພູນສຸກ ແລະ ໃຫ້ກາຍເປັນມູນມໍລະດົກອັນລໍ້າຄ່າ ໃຫ້ແກ່ອະນຸຊົນລຸ້ນຫຼັງຂອງສອງປະເທດ ໄດ້ສືບທອດ ແລະ ດຳລົງຄົງຕົວຢູ່ຮ່ວມກັນຢ່າງມີສັນຕິພາບ ແລະ ສັນຕິສຸກໄປຊົ່ວກາລະນານ.