ໃນຕອນເຊົ້າຂອງວັນທີ 12 ມັງກອນ 2017, ທີ່ ທຳນຽບປະທານປະເທດ (ຫໍຄຳ), ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ໄດ້ຈັດພິທີຕ້ອນຮັບຢ່າງເປັນທາງການຂຶ້ນ ຢ່າງສົມກຽດໃຫ້ແກ່ ການເດີນທາງມາຢ້ຽມຢາມທາງລັດຖະກິດ ຢູ່ ສປປ ລາວ ຂອງ ພະນະທ່ານ ດຣ. ໂທນີ ທານ ເກັງ ຢຳ, ປະທານາ ທິບໍດີ ແຫ່ງ ສ. ສິງກະໂປ ພ້ອມດ້ວຍພັນລະຍາ ແລະ ຄະນະ ໃນລະຫວ່າງວັນທີ 11-14 ມັງກອນ 2017.
ພາຍຫລັງສຳເລັດພິທີຕ້ອນຮັບ, ຜູ້ນຳທັງສອງ ແລະ ຄະນະຜູ້ແທນຂັ້ນສູງ ໄດ້ສືບຕໍ່ດຳເນີນການພົບປະສອງຝ່າຍ ຊຶ່ງໄດ້ຈັດຂຶ້ນທີ່ ທຳນຽບປະທານປະເທດ. ໃນການພົບປະຄັ້ງນີ້, ທັງສອງຝ່າຍໄດ້ແຈ້ງສະພາບການພັດທະນາພາຍໃນປະເທດຂອງຕົນ ໃນໄລຍະຜ່ານມາ ໃຫ້ຕ່າງຝ່າຍຊາບ ໂດຍແຈ້ງໃຫ້ຮູ້ໄດ້ ຜົນສຳເລັດໃນການພັດທະນາປະເທດ. ສຳລັບວຽກງານພົວພັນສອງຝ່າຍ, ຜູ້ນຳທັງສອງໄດ້ຕີລາຄາສູງຕໍ່ກັບໝາກຜົນການຮ່ວມມືຂອງສອງປະເທດ ນັບແຕ່ໄດ້ສ້າງຕັ້ງສາຍພົວພັນການທູດ ໃນປີ 1974 ເປັນຕົ້ນມາ, ເຫັນໄດ້ວ່າ ສາຍພົວພັນມິດຕະພາບ ແລະ ການຮ່ວມມືຢ່າງໃກ້ຊິດຂອງສອງປະເທດ ນັບມືຶ້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ, ຝ່າຍສິງກະໂປ ໄດ້ຕີລາຄາສູງຕໍ່ບົດບາດການເປັນປະທານອາຊຽນຂອງ ສປປ ລາວ ແລະ ການເປັນເຈົ້າພາບຈັດກອງປະຊຸມສຸດຍອດອາຊຽນ ໃນປີ 2016 ສຳເລັດດ້ວຍດີ, ຝ່າຍລາວ ໄດ້ຕີລາຄາສູງ ການປະກອບສ່ວນຂອງສິງກະໂປ ໃນວຽກງານອາຊຽນ ແລະ ຂອບໃຈຕໍ່ການຊ່ວຍເຫຼືອຂອງສິງກະໂປ ຕໍ່ ສປປ ລາວ ຕະຫຼອດໄລຍະການເປັນປະທານອາຊຽນ ໃນປີ 2016. ໃນຊຸມປີມໍ່ໆມານີ້, ການພົວພັນສອງຝ່າຍໄດ້ມີໝາກຜົນຕົວຈິງອັນສຳຄັນ ໂດຍສະເພາະໃນດ້ານຕ່າງໆເຊັ່ນ: ການເປີດຖ້ຽວບິນ ຈາກ ສິງກະໂປ-ວຽງຈັນ-ຫຼວງພະບາງ ຂອງບໍລິສັດ ຊິວແອ ຂອງ ສິງກະໂປ ແລະ ການລົງນາມໃນສັນຍາຮ່ວມເສັ້ນທາງບິນນຳກັນ ແລະ ຫວ່າງ ບໍລິສັດ ຊິວແອ ແລະ ບໍລິສັດ ການບິນລາວ; ແລະ ຜົນສຳເລັດໃນການບັງຄັບໃຊ້ ສັນຍາວ່າດ້ວຍການຫຼີກເວັ້ນການເກັບອາກອນຊຳ້ຊ້ອນ ແລະ ສະກັດກັ້ນການຫຼົບຫຼີກການເສຍອາກອນລາຍໄດ້ ລະຫວ່າງ ສອງລັດຖະບານ.
ໃນໄລຍະຜ່ານມາ, ສິງກະໂປ ໄດ້ໃຫ້ການສະໜັບສະໜູນຊ່ວຍເຫລືອ ສປປ ລາວ ໃນດ້ານການພັດທະນາຊັບພະຍາກອນມະນຸດ, ໂດຍການໃຫ້ທຶນການສຶກສາໄລຍະຍາວ ແລະ ຝຶກອົບຮົມໄລຍະສັ້ນ ທັງຢູ່ປະເທດ ສິງກະໂປ ແລະ ຢູ່ ສູນລາວ-ສິງກະໂປ ທີ່ນະຄອນຫລວງວຽງຈັນ; ສົ່ງອາສາສະໝັກຊາວໜຸ່ມຈາກສິງກະໂປ ເຂົ້າມາຊ່ວຍເຫຼືອບັນດາໂຮງຮຽນ ແລະ ຊຸມຊົນຕ່າງໆ ເພື່ອສອນພາສາອັງກິດ, ຄອມພິວເຕີ, ການຮັກສາສິ່ງແວດລ້ອມ ແລະ ປະກອບສ່ວນທຶນຮອນເພື່ອກໍ່ສ້າງໂຮງຮຽນ ເຊິ່ງມີຈຳນວນຫຼາຍກວ່າ 1.500 ຄົນ ນັບແຕ່ປີ 2008 ເຖິງປັດຈຸບັນ; ພ້ອມນັ້ນຍັງມີອາສາສະໝັກແພດ ທີ່ເປັນຊ່ຽວຊານດ້ານຕ່າງໆ ຈຳນວນຫຼາຍຮ້ອຍຄົນເຂົ້າມາຊ່ວຍເຫຼືອປິ່ນປົວ ໃນຫຼາຍຂົງເຂດ; ແລະ ການລົງທຶນຂອງບັນດານັກທຸລະກິດ ສິງກະໂປ ຢູ່ລາວ ຍັງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ. ນອກຈາກນີ້, ສອງຝ່າຍຍັງໄດ້ແລກປ່ຽນຄຳຄິດຄຳເຫັນ ຕໍ່ກັບສະພາບການສາກົນ ແລະ ພາກພື້ນ ທີ່ມີຄວາມຄວາມສົນໃຈຮ່ວມກັນ.
ໃນວັນດຽວກັນ, ພະນະທ່ານ ດຣ. ໂທນີ ທານ ເກັງ ຢຳ ພ້ອມດ້ວຍຄະນະ ຍັງໄດ້ເດີນທາງໄປວາງພວງມາລາ ທີ່ ອານຸສາວະລີນັກຮົບນິລະນາມ ແລະ ຢ້ຽມຊົມພະທາດຫຼວງວຽງຈັນ.