ກອງປະຊຸມສາມັນປະຈຳປີ ຄັ້ງທີ XXVI ຄະນະຜູ້ແທນຊາຍແດນ ລາວ-ຫວຽດນາມ ໄດ້ຈັດຂຶ້ນຢາງເປັນທາງການ ໃນລະຫວ່າງວັນທີ 5 - 6 ມັງກອນ 2017, ທີ່ ນະຄອນຫຼວງວຽງຈັນ, ສປປ ລາວ. ຄະນະຜູ້ແທນຊາຍແດນຝ່າຍລາວນຳໂດຍທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນ ລາວ-ຫວຽດນາມ ແລະ ຝ່າຍຫວຽດນາມນຳໂດຍທ່ານ ເລ ຮວ່າຍ ຈູງ, ກຳມະການສູນກາງພັກ, ຮອງລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນຫວຽດນາມ-ລາວ. ເຂົ້າຮ່ວມກອງປະຊຸມຄັ້ງນີ້ຍັງມີຜູ້ຕາງໜ້າຈາກບັນດາກະຊວງ, ຂະແໜງການທີ່ກ່ຽວຂ້ອງຈາກສູນກາງ ແລະ ຮອງເຈົ້າແຂວງຈາກບັນດາແຂວງຊາຍແດນຕິດຈອດກັນຂອງສອງປະເທດ.
ກອງປະຊຸມຄັ້ງນີ້, ໄດ້ຈັດຂຶ້ນໃນທ່າມກາງບັນຍາກາດ ແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວເຂົ້າສູ່ລວງເລິກ ແລະ ລວງກວ້າງຢ່າງບໍ່ຢຸດຢັ້ງ, ຊຶ່ງສະແດງອອກຜູ້ນຳສູງສຸດຂອງສອງປະເທດ ກໍໄດ້ໄປມາຫາສູ່, ຢ້ຽມຢາມກັນຢ່າງເປັນປົກກະຕິ; ໂດຍສະເພາະຢ່າງຍິ່ງປີນີ້ ແມ່ນປີແຫ່ງການສະເຫຼີມສະຫຼອງ 2 ວັນປະຫັວດສາດຄື: ວັນເຊັນສົນທິສັນຍາມິດຕະພາບ ແລະ ການຮ່ວມມືສອງປະເທດ ຄົບຮອບ 40 ປີ ຍັງເປັນວັນດຽວກັນກັບວັນເຊັນສົນທິສັນຍາວ່າດ້ວຍການກຳນົດເສັ້ນຊາຍແດນປະເທດ ລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດຄົບຮອບ 55 ປີ ຢ່າງເປັນຂະບວນຟົດຟື້ນ.
ກອງປະຊຸມໄດ້ທົບທວນຄືນການຈັດຕັ້ງປະຕິບັດສັນຍາ ວ່າດ້ວຍລະບຽບການຊາຍແດນປະເທດ ລາວ-ຫວຽດນາມ ແລະ ບົດບັນທຶກກອງປະຊຸມຄະນະຜູ້ແທນຊາຍແດນ ລາວ-ຫວຽດນາມ ຄັ້ງທີ XXV ໃນໜຶ່ງປີຜ່ານມາ, ຊຶ່ງສອງຝ່າຍໄດ້ສະຫຼຸບ, ສັງເກດຕີລາຄາຢ່າງຮອບດ້ານ ກ່ຽວກັບວຽກງານການຄຸ້ມຄອງຊາຍແດນ, ການພັດທະນາເສດຖະກິດ, ການຄ້າ, ວັດທະນະທຳ ແລະທ່ອງທ່ຽວຊາຍແດນ, ການເຊື່ອມຕໍ່ເສັ້ນຄົມມະນາຄົມ, ການກວດກາປະຕູດຽວ ຄັ້ງດຽວ, ການປະຕິບັດຂໍ້ຕົກລົງຂັ້ນລັດຖະບານກ່ຽວກັບການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນ ລາວ-ຫວຽດນາມ, ຊຶ່ງໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານຄວາມໝັ້ນຄົງ, ການເມືອງ, ປ້ອງກັນຊາດ, ຄວາມເປັນລະບຽບຮ້ອຍຂອງສັງຄົມຢູ່ຕາມບໍລິເວນຊາຍແດນລະຫວ່າງສອງປະເທດ, ການຮ່ວມມືທາງດ້ານເສດຖະກິດ, ການຄ້າ, ທ່ອງທ່ຽວ ແລະວັດທະນະທຳ, ຊຶ່ງໄດ້ປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບທີ່ເປັນມູນເຊື້ອແບບພິເສດ ແລະ ການຮ່ວມມືຍຸດທະສາດຮອບດ້ານ ລາວ-ຫວຽດນາມ, ທັງນີ້ເພື່ອສ້າງຊາຍແດນຂອງສອງປະເທດໃຫ້ກາຍເປັນຊາຍແດນແຫ່ງສັນຕິພາບມິດຕະພາບ ແລະ ການຮ່ວມມືພັດທະນາແບບຍືນຍົງ.
ໃນກອງປະຊຸມນີ້, ສອງຝ່າຍໄດ້ເປັນເອກະພາບກັນວາງທິດທາງແຜນການປະຕິບັດວຽກງານໃນຕໍ່ໜ້າກ່ຽວກັບວຽກງານການຄຸ້ມຄອງຊາຍແດນລະຫວ່າງສອງປະເທດໂດຍຈະສຸມໃສ່ວຽກງານໂຄສະນາເຜີຍແຜ່ລະບຽບການຄຸ້ມຄອງຊາຍແດນ, ການປົກປັກຮັກເສັ້ນຊາຍແດນ ແລະ ຫັຼກໝາຍຊາຍແດນປະເທດ ໃຫ້ປະຊາຊົນຢູ່ຕາມບໍລິເວນຊາຍແດນເຂົ້າໃຈແຈ້ງກ່ຽວກັບເຂດອຳນາດອະທິປະໄຕ ແລະ ຜືນແຜນດິນອັບຄົບຖ້ວນຂອງຊາດ; ສອງຝ່າຍຈະເພີ່ມທະວີບັນດາມາດຕະການຊຸກຍູ້ໃຫ້ເສດຖະກິດ, ການຄ້າ, ວັດທະນະທຳ, ການທ່ອງທ່ຽວຢູ່ຕາມບໍລິເວນຊາຍແດນໃຫ້ມີການຂະຫຍາຍຕົວ, ຂຶ້ນແຜນ ແລະ ພັດທະນາດ່ານ, ການພັດທະນາລະບົບເສັ້ນທາງຄົມມະນາຄົມ; ເພີ່ມທະວີການຈັດຕັ້ງປະຕິບັດຂໍ້ຕົກລົງລະດັບລັດຖະບານວ່າດ້ວຍການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນລາວ-ຫວຽດນາມ ໃຫ້ບັນລຸຕາມເປົ້າໝາຍທີ່ວາງໄວ້.