ໃນວັນທີ 09 ມີນາ2017 ທີຜ່ານມາ, ທ່ານ ສະເຫຼີມ ໄຊກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ຮັບການເຊຶ້ອເຊີນໂດຍຕາງຫນ້າໃຫ້ບັນດາປະເທດໃນທະວີບອາຊີ ຂຶ້ນກ່າວຄໍາປາໄສ ຢູ່ໃນພາກເປີດຂອງກອງປະຊຸມບັນດາຜູ້ປະສານງານ ອົງການ ສປຊ ແລະ ບັນດາຜູ້ຕາງໜ້າອົງການ ສປຊ ເພື່ອການພັດທະນາ ປະຈຳ ປະເທດຕ່າງໆ ຢູ່ພາກພື້ນອາຊີ-ປາຊີຟິກ ຈັດຂຶ້ນພາຍໃຕ້ຫົວຂໍ້ “ການບັນລຸເປົ້າໝາຍການພັດທະນາແບບຍືນຍົງໃນຍຸກໃໝ່”. ໃນບົດກ່າວຄຳປາໄສຕໍ່ກອງປະຊຸມ, ທ່ານລັດຖະມົນຕີຕ່າງປະເທດ ສປປ ລາວ ໄດ້ຕີລາຄາຄືນ ກ່ຽວກັບ ສະພາບດ້ານການພັດທະນາເສດຖະກິດ-ສັງຄົມ ຢູ່ໃນພາກພື້ນ, ບັນດາກາລະໂອກາດ ແລະ ສິ່ງທ້າທາຍຕ່າງໆ ເພື່ອບັນລຸເປົ້າຫມາຍການພັດທະນາແບຍຍືນຍົງຂອງ ສປຊ ລວມທັງເນັ້ນໃຫ້ເຫັນເຖິງພາລະບົດບາດ ແລະ ຫນ້າທີ່ຂອງອົງການ ສປຊ ໂດຍສະເພາະ ອົງການ ສປຊ ດ້ານການພັດທະນາ (UNDP) ທີ່ໄດ້ໃຫ້ການຊ່ວຍເຫລືອບັນດາປະເທດຕ່າງໆ ໃນວຽກງານການພັດທະນາ ໃນທ່າມກາງທີ່ປະຊາຄົມໂລກພວມປະເຊີນໜ້າກັບສິ່ງທ້າທາຍ ແລະ ການປ່ຽນແປງໃໝ່ຫລາຍດ້ານ. ໃນໂອກາດດັ່ງກ່າວ, ທ່ານລັດຖະມົນຕີການຕ່າງປະເທດ ສປປ ລາວ ຍັງໄດ້ຍົກໃຫ້ເຫັນບັນຫາທີ່ພົ້ນເດັ່ນ ໃນລະດັບປະເທດພ້ອມທັງແລກປ່ຽນບົດຮຽນ ແລະ ປະສົບການ ຂອງ ສປປ ລາວ ໃນການສ້າງ ແລະ ປະຕິບັດຂອບການຮ່ວມມືດ້ານການພັດທະນາ ລະຫວ່າງ ສປປ ລາວ ແລະ ອົງການ ສປຊ ຕະຫລອດໄລຍະຜ່ານມາ ພ້ອມທັງໄດ້ແລກປ່ຽນຄຳຄິດຄຳເຫັນຕໍ່ກອງປະຊຸມ ກ່ຽວກັບ ນະໂຍບາຍແລະທິດທາງ ສຳລັບການຂະຫຍາຍການຮ່ວມມືກັບອົງການເຄືອຂ່າຍ ສປຊ ທີ່ເຮັດວຽກດ້ານການພັດທະນາໃນຊຸມປີຕໍ່ໜ້າ, ຊຶ່ງໃນນັ້ນ ທ່ານລັດຖະມົນຕີ ໄດ້ເນັ້ນຫນັກໃຫ້ ອົງການ ສປຊ ກໍານົດບັນດາເປົ້າຫມາຍຂອງແຜນງານຮ່ວມມືໃນລະດັບປະເທດ ໂດຍແທດເຫມາະກັບສະພາບການພັດທະນາເສດຖະກິດ-ສັງຄົມ ຂອງປະເທດ ໂດຍສະເພາະໃຫ້ສອດຄ່ອງກັບບັນດາບູລິມະສິດ ແລະ ຈຸດສຸມສຳລັບວຽກງານການພັດທະນາແຫ່ງຊາດ ເພື່ອສາມາດຊ່ວຍໃຫ້ບັນດາປະເທດເຫລົ່ານັ້ນ ສາມາດບັນລຸເປົ້າໝາຍການພັດທະນາແບຍືນຍົງຂອງສາກົນ.
ສປປ ລາວ ໄດ້ກໍານົດບັນດາບູລິມະສິດດ້ານການພັດທະນາໃນໄລຍະໃຫມ່ ຢູ່ໃນແຜນພັດທະນາເສດຖະກິດ-ສັງຄົມ ສະບັບປັດຈຸບັນ ໂດຍສອດຄ່ອງກັບເປົ້າຫມາຍການພັດທະນາແບຍືນຍົງຂອງສາກົນ ເຊິ່ງສຸມໃສ່ສ້າງປັດໃຈທີ່ເປັນພື້ນຖານ ໃຫ້ແກ່ການຫລຸດພົ້ນອອກຈາກສະຖານະພາບດ້ອຍພັດທະນາ. ລັດຖະບານ ສປປ ລາວ ໄດ້ເພີ້ມການລົງທຶນ ແລະ ງົບປະມານ ໃຫ້ແກ່ຂະແຫນງການທີ່ເປັນພື້ນຖານ ເຊິ່ງລວມທັງຂະແໜງການສຶກສາ, ສາທາລະນະສຸກ, ການກໍ່ສ້າງພື້ນຖານໂຄງລ່າງຢູ່ເຂດຊົນນະບົດ ໄປຄຽງຄູ່ກັບການປັບປຸງຍົກລະດັບ ແລະ ສ້າງຄວາມເຂັ້ມແຂງດ້ານຊັບພະຍາກອນມະນຸດ. ທ່ານຍັງໄດ້ກ່າວວ່າ ການລົງທຶນເຂົ້າໃສ່ການພັດທະນາພື້ນຖານໂຄງລ່າງ ແມ່ນມີຄວາມຈຳເປັນເພື່ອສົ່ງເສີມການຄ້າ, ການລົງທຶນ, ການໄປມາຫາສູ່ກັນຂອງປະຊາຊົນຢູ່ພາຍໃນປະເທດ, ລະຫວ່າງປະເທດ ແລະ ສົ່ງເສີມການເຊື່ອມໂຍງໃນພາກພື້ນ ເພື່ອຈະນຳໄປສູ່ການຊຸກຍູ້ການເຕີບໃຫຍ່ຂະຫຍາຍຕົວຂອງເສດຖະກິດໃນພາກພື້ນ ອາຊີ-ປາຊີຟິກ ຢ່າງຫມັ້ນທ່ຽງ ແລະ ຕາມທິດຍືນຍົງ. ທ່ານຍັງໄດ້ເນັ້ນໜັກຕື່ມວ່າ ອົງການ ສປຊ ເວົ້າລວມ, ໂດຍສະເພາະ ອົງການ UNDP ຈະສືບຕໍ່ມີບົດບາດສໍາຄັນໃນການເປັນຄູ່ຮ່ວມມືທີ່ດີກັບລັດຖະບານ ເພື່ອຊ່ວຍໃຫ້ບັນດາປະເທດກຳລັງພັດທະນາສາມາດບັນລຸເປົ້າໝາຍແຫ່ງຊາດຂອງຕົນ ກໍຄືປະກອບສ່ວນໃຫ້ແກ່ການບັນລຸເປົ້າຫມາຍຮ່ວມກັນຂອງພາກພື້ນ ແລະ ສາກົນ. ຂຶ້ນກ່າວປົດປາໄສໃນພາກເປີດກອງປະຊຸມດັ່ງກ່າວຍັງມີ ທ່ານລັດຖະມົນຕີການຕ່າງປະເທດໄທ, ໃນນາມປະເທດເຈົ້າພາບ, ລັດຖະມົນຕີຕ່າງປະເທດ ໂຊໂລມອນ ໄອແລນ, ຕາງຫນ້າໃຫ້ບັນດາປະເທດໃນພາກພື້ນປາຊີຟິກ ແລະ ຜູ້ອໍານວຍການໃຫຍ່ອົງການ UNDP.