ພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບການສຳຫລວດ ແລະ ສຶກສາ ຄວາມເປັນໄປໄດ້  ໃນການສ້າງເຂື່ອນໄຟຟ້ານ້ຳຕົກ 4A ຕອນລຸ່ມ ແລະ 4B ຕອນເທິງ ຢູ່ແຂວງເຊກອງ ໄດ້ມີຂຶ້ນໃນວັນທີ 6 ພະຈິກ 2015 ຢູ່ ນະຄອນຫລວງວຽງຈັນ ລະຫວ່າງລັດຖະບານ ແຫ່ງ ສປປ ລາວ ກັບ ບໍລິສັດລາວເວີນວິສະວະກຳ ແລະ ກໍ່ສ້າງຂົວທາງ ຈຳກັດ ໂດຍການລົງນາມສັນຍາ ລະຫວ່າງທ່ານ ດຣ.ບຸນທະວີ ສີສຸພັນທອງ ລັດຖະມົນຕີຊ່ວຍວ່າການ  ກະຊວງແຜນການ ແລະການລົງທຶນ ແລະ ທ່ານ ສະຕີເວັນ ຈັນ ປະທານບໍລິສັດລາວເວີນ ວິສະວະກຳ ແລະກໍ່ສ້າງຂົວທາງຈຳກັດ, ​​ເປັນ​ກຽດ​ເຂົ້າ​ຮ່ວມ​ ເປັນ​ສັກຂີ​ພິຍານ​ຂອງ ທ່ານສົມສະຫວາດ ເລັ່ງສະຫວັດ ຮອງນາຍົກ ລັດຖະມົນຕີ, ຜູ້ຊີ້ນຳວຽກງານຂົງເຂດ ເສດຖະກິດ ການຜະລິດ ແລະ ຈໍລະຈອນ ພ້ອມ​ດ້ວຍທ່ານ ໄຊປະເສີດ ພົມສຸພາ ຫົວໜ້າກົມທຸລະກິດພະລັງງານ ກະຊວງພະລັງງານ ແລະ ບໍ່ແຮ່, ທ່ານ ວັນນະວົງ ພົນສະລາດ ຮອງຫົວໜ້າ ພະແນກແຜນການ ແລະ ການລົງທຶນ ແຂວງເຊກອງ, ທ່ານ ຮົວ ແສງອາ ລຸນ ແລະ ທ່ານ ສຸດທະເສນ  ບູລົມ ທີ່ປຶກສາ ບໍລິສັດລາວເວີນ ວິສະວະກຳ ແລະ ກໍ່ສ້າງຂົວທາງ ຈຳກັດ​ເຂົ້າ​ຮ່ວມ.

ໃນ​ວັນ​ທີ 08 ກັນຍາ 2015, ທ່ານ ມີ​ຄາຍ​ອິນ ບາຣານົບ, ​ເອກ​ອັກຄະ​ລັດຖະທູດ ​ແຫ່ງ ສ. ລັດ​ເຊຍ ປະ​ຈຳລາວ​ໄດ້ຈັດ​ງານ​ສົ່ງ​ນັກ​ສຶກສາລາວ ທີ່​ໄດ້​ຮັບ​ທຶນ​ການ​ສຶກສາ​ຈາກ​ລັດ​ເຊຍຈຳນວນທັງ​ໝົດ 37 ທຶນ. ​ໃນ​ນີ້, ​ມີທຶນ​ປະລິນຍາ​ຕີ 26 ທຶນ ​ແລະທຶນ​ປະລິນຍາ​ໂທ 11 ​ໃນ​ຂະ​ແໜງ​ການ​ຕ່າງໆ​ເຊັ່ນ: ​ໄອ​ທີ, ການ​ປົກຄອງ​ລັດ, ການ​ພົວພັນ​ສາກົນ, ວິທະຍາສາດ​ການ​ເມືອງ, ​ເສດຖະກິດ ​ແລະ ພາສາ​ສາດ​ເປັນ​ຕົ້ນ. ​​ໃຫ້​ກຽດ​ເຂົ້າ​ຮ່ວມຝ່າຍ​ລາວ​​ໂດຍ ທ່ານ ກອງ​ສີ ​ແສງ​ມະນີ, ລັດຖະມົນ​ຕີ​ຊ່ວຍ​ວ່າການກະ ຊວງ​ສຶກສາ ​ແ​ລະ ກິລາ, ມີຜູ້ຕາງໜ້າ​ງຈາກກະຊວງ​ການ​ຕ່າງປະ​ເທດ, ມະຫາວິທະຍາ​ໄລ​ແຫ່ງ​ຊາດ ແລະພາກສ່ວນ​ທີ່​ກ່ຽວຂ້ອງ​ ເຂົ້າ​ຮ່ວມ.

ໃນ​ຕອນ​ຄ່ຳ​ວັນ​ທີ 20​ ສິງຫາ 2015 ນີ້,  ທ່ານ ກວນ ຮວາ ປິງ, ​ເອກ​ອັກຄະ​ລັດຖະທູດ​ວິສາມັນ​ຜູ້​ມີ​ອຳນາດ​ເຕັມ ​ແຫ່ງ ສປ ຈີນ ປະຈຳ​ລາວໄດ້​ເປັນ​ເຈົ້າ​ພາບຈັດ​ງານ​ລ້ຽງສົ່ງ​ນັກ​ສຶກສາ​ລາວ ທີ່​ສະຖານທູດ​ຈີນນະຄອນຫລວງ​ວຽງຈັນ, ​ໂດຍ​ມີ ທ່ານ ລີ​ຕູ້ ບົວ​ປາວ, ລັດຖະມົນຕີ​ຊ່ວຍ​ວ່າກາ​ນກະຊວງ​ສຶກ ສາ​ທິການ ​ແລະ ກິລາ, ຮອງ​ປະທານ​ສະມາຄົມ​ມິດຕະພາບ​ລາວ-ຈີນ, ບັນດາ​ຫົວໜ້າ​ກົມ, ຮອງ​ກົມ ​ແລະ ພະນັກງານ​ກ່ຽວຂ້ອງ​ ເຂົ້າ​ຮ່ວມ.

ທ່ານ ກວນ ຮວາ ປີງ ກ່າວ​ວ່າ: ​​ປີນີ້ ລັດຖະບານ​ ສປ ຈີນ​ ໄດ້​ສະໜອງທຶນ​ການ​ສຶກສາ ​ຫລາຍ​ປະ​ເພດ​​ໃຫ້ແກ່ ສປປ ລາວ, ຈຳນວນ 82 ຄົນ​​ໄປ​ສຶກສາຕໍ່ຢູ່​ປະ​ເທດ​ຈີນ ໃນນັ້ນ ​ຈະ​ໄປ​ສຶກສາຕໍ່​ໃນ​ລະດັບປະລິນຍາ​ເອກ 10 ຄົນ, ຍິງ 3 ຄົນ, ​ປະລິນຍາ​ໂທ 35 ຄົນ, ຍິງ 12 ຄົນ ​ແລະ ປະລິນຍາ​ຕີ 37 ຄົນ, ຍິງ 14 ຄົນ​. ເຊິ່ງເປັນເງື່ອນໄຂທີ່ດີເຮັດໃຫ້​ນັກ​ສຶກສາລາ​ວຈຳນວນດັ່ງກ່າວໄດ້ມີໂອກາດ ສຶກສາຮ່ຳຮຽນເອົາວິຊາຄວາມຮູ້ ແລະ ປະສົບການຈາກ ສປຈີນ ຢ່າງຕັ້ງໜ້າ ແລະ ຮຽນຮູ້ກ່ຽວ ກັບປະເທດຈີນຢ່າງຮອບດ້ານ, ຮຽນຮູ້​ວັດທະນະທຳ​ຈີນ ​ທີ່​ມີ​ປະຫວັດສາດ​ຍາວ​ນານ, ອຸດົມສົມບູນ ​ແລະການ​ປ່ຽນ​ແປງ​ຢ່າງ​ຫລວງຫລາຍ​ ທາງ​ດ້ານ​ເສດຖະກິດ-ສັງຄົມ​ຂອງ ສປ ​ຈີນ.ການສະໜອງທຶນ ການສຶກສາດັ່ງກ່າວເປັນ​ການ​ປະກອບສ່ວນສໍາຄັນ​ເຂົ້າໃນ​ການ​ເສີມຂະຫຍາຍສາຍ ພົວພັນມິດຕະ ພາບ​ຈີນ-ລາວ ​ພ້ອມ​ທັງ​ເພີ່ມ​ທະວີຄວາມ​ເຂົ້າ​ອົກ​ເຂົ້າ​ໃຈ​ ລະຫວ່າງ​​ປະຊາຊົນ​ສອງ​ຊາດ​ ຈີນ-ລາວ ​ໃຫ້​ແໜ້ນ​ແຟ້ນຍິ່ງໆ​ຂຶ້ນ.

ໃນໂອກາດ​ນີ້ ທ່ານ ລີ​ຕູ້ ບົວ​ປາວ ​ໄດ້​ຮຽກຮ້ອງ​ໃຫ້​ນັກ​ສຶກສາທີ່​ໄດ້​ຮັບ​ທຶນ​ໃນ​ຄັ້ງນີ້ ​ເພີ່ມທະວີ​ຄວາມ​​ສາມັກຄີ ​ແລະ​ເສີມ​ສ້າງສາ​ຍພົວພັນ​ມິດຕະພາບ ລະຫວ່າງ ສອງປະເທດ ດ້ວຍ​ຄວາມ​ຮັບຜິດຊອບ​ສູງ​ເອົາ​ໃຈ​ໃສ່​ໃນ​ການ​ສຶກສາ​ຮ່ຳຮຽນ, ຄົ້ນ​ຄວ້າໃຫ້​ສົມ​ກັບ​ຄວາມເອົາ​ໃຈ​ໃສ່​ຂອງ​ພັກ-ລັດຖະບານ ​ຂອງ​ສອງ​ປະ​ເທດ, ​ເປັນ​ຕົວ​ແທນ​ເຜີຍ​ແຜ່​ສິລະປະ, ວັນນະຄະດີ ​ແລະ ວັດທະນະທຳ ​ອັນ​ດີງາມ​ຂອງ​ຊາດ ໃນ​ວັນ​ສຳຄັນ​ ຕ່າ​ງໆຂອງ​ລາວ ​ແລະ ຈີນ.