ກອງປະຊຸມຫົວໜ້າກົມການສຶກສາຊັ້ນສູງ ບັນດາປະເທດອາຊຽນ ຄັ້ງທີ 9 ໄດ້ຈັດຂຶ້ນໃນວັນທີ 7 ກໍລະກົດ 2015 ທີ່ໂຮງແຮມລາວພລາຊານະຄອນຫຼວງວຽງຈັນ ເປັນປະທານຂອງທ່ານນາງ ແສງເດືອນ ຫຼ້າຈັນທະບູນ, ລັດຖະມົນຕີຊ່ວຍວ່າການກະຊວງສຶກສາທິການ ແລະ ກີລາ ໂດຍມີທ່ານ Dr. Gatol Hari Priowirijanto, ຜູ້ອຳນວຍການກອງເລຂາອົງການລັດຖະມົນຕີສຶກສາຂອງປະເທດອາຊີຕາເວັນອອກສຽງໃຕ້ ຫຼືຊີມີໂອ (SEAMEO Secretariat) ພ້ອມດ້ວຍຫົວໜ້າກົມເລຂາທິການຄະນະກຳມາທິການການສຶກສາຊັ້ນສູງຂອງ 10 ປະເທດອາຊຽນ ຜູ້ອຳນວຍການ ແລະ ເຈົ້າໜ້າທີ່ຂອງສູນເພື່ອການສຶກສາຊັ້ນສູງພ້ອມດ້ວຍແຂກທີ່ຖືກເຊີນທັງພາຍໃນ ແລະ ຕ່າງປະເທດເຂົ້າຮ່ວມ.
ກອງປະຊຸມຫົວໜ້າກົມການສຶກສາຊັ້ນສູງບັນດາປະເທດອາຊຽນໄດ້ຈັດຂຶ້ນທຸກໆປີ ນັບແຕ່ປີ 2005 ເປັນຕົ້ນມາໂດຍໄດ້ມີການໝູນວຽນກັນເປັນເຈົ້າພາບ ຢູ່ໃນບັນດາປະເທດອາຊຽນເຊິ່ງກອງປະຊຸມ ຄັ້ງທີ 8 ຜ່ານມາ ແມ່ນໄດ້ຈັດຂຶ້ນທີ່ນະຄອນໂຮຈີມິງ ສສຫວຽດນາມ ແລະ ກອງປະຊຸມຄັ້ງທີ 9 ນີ້ ສປປ ລາວ ໄດ້ຮັບກຽດເປັນເຈົ້າພາບໃນການຈັດກອງປະຊຸມດັ່ງກ່າວເປັນຄັ້ງທຳອິດຈຸດປະສົງຂອງກອງປະຊຸມໃນຄັ້ງນີ້ ກໍ່ເພື່ອສະໜອງເວທີທາງການໃຫ້ແກ່ບັນດາເຈົ້າໜ້າທີ່ລະດັບສູງດ້ານການສຶກສາຊັ້ນສູງຂອງພາກພື້ນ ໃນການປຶກສາຫາລືແລກປ່ຽນຂໍ້ມູນທົບທວນ ແລະ ຕິດຕາມຄວາມຄືບໜ້າຂອງບັນດາໂຄງການກ່ຽວຂ້ອງພ້ອມທັງຊອກຫາຊ່ອງທາງໃໝ່ໆ ໃນການພົວພັນຮ່ວມມືກັນດ້ານການສຶກສາຊັ້ນສູງຄາດໝາຍກໍ່ເພື່ອແກ້ໄຂບັນຫາດ້ານການສຶກສາຊັ້ນສູງທີ່ກຳລັງປະເຊີນຢູ່ໃນປັດຈຸບັນຢູ່ພາຍໃນພາກພື້ນ ເຊັ່ນ: ການປົກຄອງມະຫາວິທະຍາໄລ ການສ້າງຄວາມສາມາດ ແລະ ການພັດທະນາຊັບພະຍາກອນມະນຸດ ຄວາມສາມາດໃນການຄົ້ນຄວ້າການປະກັນຄຸນະພາບ ການຮັບຮູ້ ແລະ ການຮັບຮອງວຸດທິການສຶກສາ ແລະ ປະກາສະນີຍະບັດ ເຊິ່ງກັນ ແລະ ກັນ ການແລກປ່ຽນນັກສຶກສາ ແລະ ພະນັກງານລະບົບການໃຫ້ທຶນການສຶກສາຊັ້ນສູງ ແລະ ອື່ນໆ.
ທ່ານລັດຖະມົນຕີຊ່ວຍກະຊວງສຶກສາທິການ ແລະ ກີລາ ໄດ້ກ່າວວ່າ:ອົງການຊີມີໂອໄຣເຣດ ແລະ ປະເທດສະມາຊິກໄດ້ທຸ້ມເທຄວາມພະຍາຍາມສະເໜີມາທັງດ້ານທຶນຮອນ ແລະ ຊັບພະຍາກອນມະນຸດໃນການພັດທະນາການສຶກສາຊັ້ນສູງໃນພາກພື້ນເຊິ່ງເຮັດໃຫ້ໄດ້ຮັບຜົນສຳເລັດໃນ 4 ຂົງເຂດບຸລິມະສິດຄື:ການສົ່ງເສີມການແລກປ່ຽນນັກສຶກສາ ການພັດທະນາຄວາມເປັນຜູ້ນຳການຮຽນຜ່ານສື່ເອເລັກໂຕຣນິກ ແລະ ການສ້າງກຸ່ມຄົ້ນຄວ້າ ແລະ ດັດສະນີອ້າງອີງການຄົ້ນຄວ້າ ສຳລັບ ສປປ ລາວໄດ້ຮ່ວມມືກັບອົງການຊີມີໂອໄຣເຣດ ແລະ ບັນດາປະເທດສະມາຊິກ ກະຊວງ ແລະ ອົງການກ່ຽວຂ້ອງ ໃນການສ້າງຄວາມກົມກຽວດ້ານລະບົບການສຶກສາຊັ້ນສູງເຊິ່ງພາໃຫ້ໄດ້ຮັບຜົນສຳເລັດໃນຫຼາຍດ້ານ ເປັນຕົ້ນແມ່ນໄດ້ມີການປັບປຸງນິຕິກຳໃຫ້ສອດຄ່ອງ ແລະ ສ້າງດຳລັດຂອງນາຍົກລັດຖະມົນຕີວ່າດ້ວຍການສຶກສາຊັ້ນສູງຢູ່ ສປປລາວ.
ພິທີລົງນາມສັນຍາໂຄງການຊ່ວຍເຫຼືອກໍ່ສ້າງຂົວຂ້າມນ້ຳງື່ມ, ບ້ານນາບົງຫາບ້ານທ່າກົກໄຮ, ເມືອງ ປາກງື່ມ ແລະ ກໍ່ສ້າງເສັ້ນທາງພ້ອມດ້ວຍຂົວຂ້າມຮ່ອງແຊງ, ເມືອງໄຊເສດຖາ, ນະຄອນຫຼວງວຽງຈັນ ມີຂຶ້ນເມື່ອວັນທີ 11 ມີຖຸນາຜ່ານມາ, ຢູ່ສູນການຄ້າລາວ - ໄອເຕັກ ລະຫວ່າງ ທ່ານ ດຣ. ສິນລະວົງ ຄຸດໄພທູນ, ເຈົ້າຄອງນະຄອນຫຼວງວຽງຈັນ, ກັບ ທ່ານ ສັກໄຊ ວົງມາລາສິດ (ປີເຕີຈັນ), ປະທານ ບໍລິສັດ ລາວ ເວີນ ວິສະວະກຳກໍ່ສ້າງຂົວທາງ ຈຳກັດ ໂດຍໃຫ້ກຽດເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ແລະ ຈໍລະຈອນ, ທ່ານ ດຣ. ບຸນຈັນ ສິນທະວົງ, ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ, ທ່ານ ສອນໄຊ ສີພັນດອນ, ລັດຖະມົນຕີ, ຫົວໜ້າຫ້ອງວ່າການລັດຖະບານພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ ເປັນຈຳນວນຫຼາຍ.
ໃນ ວັນທີ 10 ມິຖຸນາ 2015, ທີ່ສຳນັກງານບໍລິຫານ ເຂດເສດຖະກິດພິເສດ ສະຫວັນ-ເຊໂນ ໄດ້ຈັດໃຫ້ມີພິທີເປີດ ບໍລິສັດລົງທຶນ ຈາກປະເທດຍີປຸ່ນ ຈຳນວນ 4 ບໍລິສັດ ທີ່ໄດ້ເຂົ້າມາສ້າງຕັ້ງ ບໍລິສັດພາຍໃນ ເຂດເສດຖະກິດພິເສດ ສະຫວັນ-ເຊໂນ ແຂວງສະຫວັນນະເຂດ, ໂດຍມີ ທ່ານ ນາງ ບົວທາ ຂັດຕິຍະ, ລັດຖະມົນຕີຊ່ວຍວ່າການຫ້ອງວ່າການລັດຖະບານ, ຮອງປະທານ, ຫົວໜ້າກອງເລຂາ ຄຂພສ, ແລະ ພາກສ່ວນກ່ຽວຂ້ອງ ເຂົ້າຮ່ວມ.