ສະ​ຫາຍ ນາງ ສູນ​ທອນ ໄຊ​ຍະ​ຈັກ, ກຳ​ມະ​ການ​ສູນ​ກາງ​ພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ ​ພັກປະ​ຊາ​ຊົນ ປະ​ຕິ​ວັດ​ລາວ, ຜູ້​ຕາງ​ໜ້າ​ພິ​ເສດຂອງ​ ສະ​ຫາຍ​ ບຸນ​ຍັງ ວໍລະ​ຈິດ, ເລ​ຂາ​ທິ​ການ​ໃຫ​ຍ່​​ຄະ​ນະ​ບໍ​ລິ​ຫານ​ງານ​ສູນ​ກາງ ພັກ​ປະ​ຊາ​ຊົນ ປະ​ຕິ​ວັດ​ລາວ ພ້ອມ​ດວ້ຍຄະນະ ໄດ້​​ໄປ​ຢ້ຽມ​ຢາມ ​ແລະ ​ເຮັດ​ວຽກ​ຢູ່ ກຳປູ​ເຈຍ ແຕ່​ວັນ​ທີ 1-4 ກຸມພາ 2016.

ໃນ​ຕອນ​​​ແລງ​ຂອງ​ ວັນ​ທີ 2 ກຸມພາ 2016, ສະຫາຍ ນາງ ສູນ​ທອນ ໄຊ​ຍະ​ຈັກ ​ພ້ອມ​ດ້ວຍ​ຄະ​ນະ ໄດ້​​ເຂົ້າ​ຢ້ຽມ​ຄຳນັບ​ ສົມ​ເດັດ ອັກຄະມະຫາ ເສນາ​ບໍດີ ​ເຕ​ໂຈ ຮຸນ​​ແຊນ, ​ປະທານ​ພັກ ປະຊາຊົນ ກຳປູ​​ເຈຍ. ສະຫາຍ ນາງ ສູນ​ທອນ ​ໄຊ​ຍະ​ຈັກ ໄດ້​ສະ​ແດງ​ຄວາມ​ປິ​ຕິ​ຊົມ​ຊື່ນ ​ແລະ ​ເປັນ​ກຽດ​ຢ່າງສູງທີ່​ໄດ້​ຖືກ​ແຕ່ງ​ຕັ້ງ​ເປັນ​ຜູ້ຕາງໜ້າພິ​ເສດ​ຂອງ ​ສະຫາຍ ບຸນ​ຍັງ ວໍລະ​ຈິດ, ເລຂາທິການ​ໃຫຍ່ ​​​ໄປ​ແຈ້ງ​ຜົນ​ກອງ​ປະຊຸມ​ໃຫຍ່​ ຄັ້ງ​ທີ X ຂອງ ​ພັກ ປປ ລາວ ​ແລະ ​ໄດ້ມອບ​ໂທລະ​ເລກຂອບ​​ໃຈຂອງ​ສະຫາຍ​ ບຸນ​ຍັງ ວໍລະ​ຈິດ, ເລຂາທິການ​ໃຫຍ່ ​ໃຫ້​​ແກ່ສົມ​ເດັດ ອັກຄະມະຫາ ເສນາ​ບໍດີ ​ເຕ​ໂຈ ຮຸນ​​ແຊນ, ປະທານ​ພັກ ປະຊາຊົນ ກຳປູ​​ເຈຍ ​ແລະ ຄໍາ​ເຊື້ອ​ເຊີ​ນ ສົມ​ເດັດ ອັກຄະມະຫາ ເສນາ​ບໍດີ ​ເຕ​ໂຈ ຮຸນ​​ແຊນ, ປະທານ​ພັກ ປະຊາຊົນ ກຳປູ​ເຈຍ ມາ​ຢ້ຽມຢາມ ສປປ ລາວ.

ສະຫາຍ ນາງ ສູນ​ທອນ ​ໄຊ​ຍະ​ຈັກ ໄດ້ສະແດງຄວາມຂອບອົກຂອບໃຈ ແລະ ຮູ້ບຸນຄຸນຕໍ່ພັກ ປະຊາຊົນ ກຳປູເຈຍ ທີ່ໄດ້ສົ່ງ​ສານຊົມ​ເຊີຍກອງປະຊຸມໃຫຍ່ ຄັ້ງທີ X ຂອງ​ພັກ ປປ ລາວ ເຊິ່ງ​ເປັນ​ການສະ​ແດງ​ໃຫ້​ເຫັນ​ເຖິງ​ມິດ​ຈິດ​ມິດ​​ໃຈ ​ແລະ ການ​ຮ່ວມ​ມື​ອັນ​ເປັນ​ມູນ​ເຊື້ອ​ທີ່​ດີງາມ ລະຫວ່າງ ສອງ​ພັກ, ​ເປັນກຳລັງ​ໃຈ​ອັນ​ແຮງ​ກ້າ​ໃຫ້​ແກ່ພັກ, ລັດຖະບານ ​ແລະ ປະຊາຊົນ ລາວ​ບັນດາ​ເຜົ່າ.

ສະຫາຍ ຜູ້ຕາງໜ້າພິເສດ ​ໄດ້​ສະ​ແດງ​ຄວາມ​ເພິ່ງ​ພໍ​ໃຈຕໍ່​ສາຍ​ພົວພັນ​ມິດຕະພາບອັນ​ເປັນ​ມູນ​ເຊື້ອ​ທີ່​ດີງາມ ລະ​ຫ່ວາງ ລາວ- ກໍາປູ​ເຈຍ ສືບ​ຕໍ່ໄດ້​ຮັບ​ການ​ເສີມ​ຂະຫຍາຍ​ຂື້ນ​ຢ່າງ​ບໍ່​ຢຸດ​ຢັ້ງ, ນຳ​ເອົາ​ຜົນ​ປະ​ໂຫຍ​ດ​ຕົວ​ຈິງ​ມາ​ໃຫ້ປະຊາຊົນ​ສອງ​ປະ​ເທດ, ປະກອບສ່ວນ​ເຂົ້າ​​ໃນ​ພາລະກິດ​ສັນຕິພາບ, ສະຖຽນ​ລະ​ພາບ, ການ​ຮ່ວມ​ມື​ ​ເພື່ອ​ການ​ພັດທະນາ​ໃນ​ພາກ​ພື້ນ ​ແລະ ໃນ​ໂລກ. ​ພ້ອມ​ທັງ​ສະ​ແດງ​ຄວາມ​ຂອບ​ໃຈ ​ແລະ ຮູ້​ບຸນ​ຄຸນ ​ເປັນ​ຢ່າງ​ສູງຕໍ່​ພັກ ປະຊາຊົນ ກຳປູ​ເຈຍ ແລະ ປະຊາຊົນ ​ກໍາປູ​​ເຈຍ ທີ່​ໄດ້​ໃຫ້ການ​ສະໜັບສະໜູນ, ຊ່ວຍ​ເຫລືອ​ອັນ​ໃຫຍ່​ຫລວງ, ລໍ້ຳຄ່າ​ໃຫ້​ແກ່​ພັກ, ລັດ ​ແລະ ປະຊາຊົນ​ ລາວ ​​ຕະຫລອດ​ໄລຍະ​ທີ່​ຜ່ານ​ມາ ​ແລະ ​ໄດ້​ຢືນຢັນ​ວ່າ ພັກ, ລັດຖະບານ ​ແລະ ປະຊາຊົນ ລາວ ຈະ​ເຮັດ​ສຸດ​ຄວາ​ມສາມາດ​ຂອງ​ຕົນ ​ເພື່ອ​ຮ່ວມ​ກັບ ປະຊາຊົນ ກຳປູ​ເຈຍ ອ້າຍ​ນ້ອງ ​ໃນ​ການ​ປົກ​ປົກ​ຮັກສາ ​ແລະ ​ເພີ່ມ​ພູນ​ຄູນ​ສ້າງສາ​ຍພົວພັນ​ມິດຕະພາບ​ ທີ່ເປັນ​ມູນ​ເຊື້ອອັນ​ດີງາມ ລະຫວ່າງ ​ລາວ- ກໍາປູ​ເຈຍ ​ໃຫ້​ແຕກ​ດອກ​ອອກ​ຜົນຍິ່ງ​ໆ​ຂື້ນ.

ສົມ​ເດັດ ອັກຄະມະຫາ ເສນາ​ບໍດີ ​ເຕ​ໂຈ ຮຸນ​​ແຊນ ​ຕີ​ລາຄາ​ສູງ​ຕໍ່​ຜົນສຳ​ເລັດ​ຂອງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ X ຂອງ​ພັກ ປປ ລາວ, ​ເຊິ່ງ​ເປັນ​ເຫດການ​ການ​ເມືອງ​ທີ່​ສຳ​ຄັນ​ໃນ​ຊີວິດ​ການ​ເມືອງ​-ສັງຄົມ​ຂອງ​ ລາວ, ​​​ເປັນ​ຂີດ​ໝາຍ​​​ແຫ່ງ​ການ​ພັດທະນາ​ໃໝ່ ​ໃນ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ປະ​ເທດ ລາວ ​ໃຫ້​ນັບ​ມື້​ມີ​ຄວາມ​ວັດທະນາ​ຖາ​ວອນ, ປະຊາຊົນ​ນັບ​ມື້​ມີ​ຄວາມ​ອີ່ມໝຳສຳລານ ​ແລະ ມີຄວາມ​ຜາ​ສຸກ. ສົມ​ເດັດ ຮຸນ​​ແຊ​ນ ​ໄດ້​ສະ​ແດງ​ຄວາມຊົມ​ເຊີຍ​ຕໍ່​ຜົນສຳ​ເລັດ​ອັນ​ໃຫຍ່​ຫລວງ​ທີ່​ພັກ, ລັດ ​ແລະ ປະຊາຊົນ ລາວ ຍາດ​ມາ​ໄດ້ໃນ​ການ​ປະຕິບັດ​ແນວທາງ​ປ່ຽນ​ແປງ​ໃໝ່ຕະ ຫລອດ​ໄລຍະ​ 30 ປີ​ທີ່​ຜ່ານ​ມາ ​ ​ໂດຍ​ສະ​ເພາະ​ແມ່ນ​ໄລຍະ 5 ປີ​ ​ແຫ່ງ​ການຈັດ​ຕັ້ງ​ປະຕິບັດ​ມະຕິ​ຂອງ​ກອງ​ປະຊຸມ​ໃຫຍ່​ຄັ້ງ​ທີ IX ຂອງ​ພັກ ປະຊາຊົນ ປະຕິວັດ​ລາວ ​ແລະ ສະ​ແດງ​ຄວາມ​ເຊື່ອ​ໝັ້ນຢ່າ​ງໜັກ​ແໜ້ນ​​ວ່າ ພາຍ​ໃຕ້​ການ​ນຳພາ​​ຂອງ​ພັກ ປະຊາຊົນ ປະຕິວັດ ລາວ ​ໂດ​ຍມີ​ ສະຫາຍ ບຸນ​ຍັງ ວໍລະ​ຈິດ ​ເປັນ​ຜູ້ນຳ​ນັ້ນ​, ພັກ, ລັດຖະບານ ​ແລະ ປະຊາຊົນ ລາວ ບັນດາ​ເຜົ່າ​ ​ຈະບັນລຸ​ຜົນສຳ​ເລັດ​ໃນ​ການຈັດ​ຕັ້ງຜັນ​ຂະຫຍາຍ​​ມະຕິ​ຂອງ​ກອງ​ປະຊຸມ​ໃຫຍ່​ ຄັ້ງ​ທີ X ຂອງ​ພັກ ປປ ລາວ.

ສົມ​ເດັດ ຮຸນ​​ແຊນ ​ໄດ້ຢືນຢັນ​ວ່າ ພັກ, ລັດ ​ແລະ ປະຊາຊົນ ກໍາປູ​ເຈຍ ຈະ​​ເຮັດ​ສຸດ​ຄວາມ​ສາມາດ​ຂອງ​ຕົນ​ຮ່ວມ​ກັບ​ພັກ, ລັດ ​ແລະ ປະຊາຊົນ ລາວ ບັນດາ​ເຜົ່າ ປົກ​ປັກ​ຮັກສາ ​ແລະ ​ເສີມ​ຂະຫຍາຍສາຍ​ພົວພັນ​ມິດຕະພາບທີ່​ເປັນ​ມູນ​ເຊື້ອ​ອັນ​ດີງາມ ລະຫວ່າງ ກຳປູ​ເຈຍ - ລາວ ​​ໃຫ້​ຍືນ​ຍົງ​ຄົງ​ຕົວຕະຫລອດ​ໄປ; ພ້ອມ​ກັນ​ນັ້ນ, ສົມ​ເດັດ ຮຸນ​​ແຊນ ​ໄດ້​ຝາກ​ຄຳ​ຢື້ຢາມ​ຖາມ​ຂ່າວ ອັນ​ສະໜິດສະໜົມ ​ເຖິງ​ສະຫາຍ ​ເລຂາທິການ​ໃຫຍ່ ບຸນ​ຍັງ ວໍລະ​ຈິດ ​ແລະ ບັນດາ​ສະຫາຍ​ການ​ນຳ​ຂອງ ພັກ, ລັດ ລາວ ແລະ ຕອບ​ຮັບ​ຄຳ​ເຊື້​ອເຊີນ​ຂອງ ​ສະຫາຍ ບຸນ​ຍັງ ວໍລະ​ຈິດ, ເລຂາທິການ​ໃຫຍ່ ​ມາ​ຢ້ຽມຢາມ ລາວ ​ໃນ​ເວລາ​ທີ່​ເໝາະ​ສົມ​.

ໃນ​ວັນ​ດຽວ​ກັນ, ສະຫາຍ ນາງ ສູນ​ທອນ ​ໄຊ​ຍະ​ຈັກ ໄດ້​ພົບ​ປະ ​ແລະ ​ເຮັດ​ວຽກ​ກັບ​ສະຫາຍ ຢົວະຊົນ, ກຳມະການ​ສູນ​ກາງ​ພັກ, ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນກາງ​ພັກ ປະຊາຊົນ ກຳປູ​ເຈຍ. ​ໃນ​ການ​ພົບ​ປະ​ຄັ້ງ​ນີ້, ສອງ​ຝ່າຍ​ໄດ້​ແຈ້ງ​ໃຫ້​ກັນຊາ​ບກ່ຽວ​ກັບ​ສະພາບ​ພົ້ນ​ເດັ່ນພາຍ​ໃນ​ຂອງ​ແຕ່​ປະ​ເທດ, ຕີ​ລາຄາ​ການ​ພົວພັນ​ຮ່ວມ​ມື​ສອງ​ຝ່າຍ​ໃນ​ໜື່ງປີທີ່​ຜ່ານ​ມາ ແລະ ແລກປ່ຽນ​ຄຳ​ຄິດ​ເຫັນ​ຕໍ່​ສະພາບ​ການ​ພາກ​ພື້ນ​ ​ແລະ ສາກົນ ທີ່​ສອງ​ຝ່າຍ​ມີ​ຄວາມ​ສົນ​ໃຈ.

ໃນ​ໄລຍະ​ຢ້ຽມຢາມ ຣາຊະ​ອານາຈັກ ກຳປູ​ເຈຍ ນອກ​ຈາກ​ຢ້ຽມຢາມ ​ແລະ ​ເຮັດ​ວຽກ​ຢູ່ ພະນົມ​ເປັນ​ ​ແລ້ວຄະນະ​ຍັງ​ໄດ້​​ໄປຢ້ຽມຢາມ ​ແລະ ທ່ຽວ​ຊົມ​ສະຖານ​ທີ່​ທ່ອງທ່ຽວ​ທາງ​ປະຫວັດສາດ​ ​ແລະ ວັດທະນະທຳ ຂອງແຂວງ ສຽມ​ຣຽບ ​ອີກ​ດ້ວຍ.