ໃນຕອນເຊົ້າວັນທີ 13 ສິງຫາ 2015, ທີ່ ຫ້ອງວ່າການປະທານປະເທດ, ທ່ານ ພົງສະຫວັດ ບຸບຜາ, ລັດຖະມົນຕີ, ຫົວໜ້າຫ້ອງວ່າການປະທານປະເທດ ໄດ້ຕ້ອນຮັບການເຂົ້າຢ້ຽມຄຳນັບຂອງ ທ່ານ ອັສກາມູຊິນັອບ (Askar MUSSINOV), ລັດຖະມົນຕີຊ່ວຍວ່າການກະຊວງການຕ່າງປະເທດ ແຫ່ງ ສາທາລະນະລັດ ກາຊັກສະຖານ. ໃນໂອກາດທີ່ທ່ານໄດ້ຮັບການແຕ່ງຕັ້ງຈາກ ປະທານາທິບໍດີສ.ກາ ຊັກສະຖານ ທີ່ເດີນທາງມາຢ້ຽມຢາມ ສປປ ລາວ ໃນຖານະທູດພິເສດມາຢືນຈົດໝາຍຕໍ່ປະທານປະເທດ ແຫ່ງ ສປປ ລາວ ເພື່ອຂໍສຽງສະໜັບສະໜູນຈາກ ສປປ ລາວ ໃນການລົງສະໝັກເຂົ້າເປັນສະມາ ຊິກບໍ່ຖາວອນ ຂອງສະພາຄວາມໝັ້ນຄົງ ສປຊ ສຳລັບສົກປີ 2017-2018 ເຊິ່ງຈະມີການເລືອກຕັ້ງຂຶ້ນໃນໄລຍະກອງປະຊຸມສະມັດຊາໃຫຍ່ ສປຊ ຄັ້ງທີ 71 ທີ່ ນິວຢອກ. ໃນໂອກາດດັ່ງກ່າວ, ສອງຝ່າຍ ໄດ້ແລກປ່ຽນທັດສະນະຕໍ່ການຮ່ວມມືເຂດພາກພື້ນ ແລະ ສາກົນເຊິ່ງໄລຍະຜ່ານມາ ສປປ ລາວ ແລະ ສ.ກາຊັກສະຖານ ໄດ້ໃຫ້ການຊ່ວຍເຫລືອສະໜັບສະໜູນເຊິ່ງກັນ ແລະ ກັນ ທັງໃນເວທີພາກພື້ນ ແລະ ສາກົນ, ສອງຝ່າຍຍັງໄດ້ທົບທວນຄືນການພົວພັນ ຮ່ວມມືກັນ ລະຫວ່າງ ສອງປະເທດ ທີ່ມີມາແຕ່ດົນນານ. ພ້ອມນີ້ສອງຝ່າຍຍັງໄດ້ແຈ້ງສະພາບການພັດທະນາເສດຖະກິດ-ສັງຄົມຂອງແຕ່ລະປະເທດໃຫ້ກັນຊາບ ພ້ອມທັງໄດ້ ຢືນຢັນຈະປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສ. ກາຊັກສະຖານ ໂດຍສະເພາະໃນຂົງເຂດຂະແໜງການຮ່ວມມືກັນທາງ ດ້ານເສດຖະກິດ-ການຄ້າ, ການລົງທຶນ, ການທ່ອງທ່ຽວ, ກະສິກຳ, ການສຶກສາ ແລະ ຂະແໜງການອື່ນໆທີ່ສອງຝ່າຍມີຄວາມ ສົນໃຈຮ່ວມກັນ ແລະ ມີບາງອັນ ສອງຝ່າຍກະກຽມທີ່ຈະເຊັນສັນຍານຳກັນ.

ທ່ານ ພົງສະຫວັດ ບຸບຜາ ໄດ້ສະແດງຄວາມຍິນດີທີ່ ທ່ານ ອັສກາ ມູຊິນັອບໄດ້ຖືກແຕ່ງຕັ້ງເປັນທູດ ພິເສດ ມາປະຕິບັດພາລະກິດຢູ່ ສປປ ລາວເຊິ່ງຈະເປັນການປະກອບສ່ວນຊຸກຍູ້ການພົວພັນ ຮ່ວມມືສອງຝ່າຍ ໃນອະນາຄົດ. ພ້ອມນີ້ທ່ານຍັງໄດ້ອວຍພອນໃຫ້ ທ່ານ ອັສກາ ມູຊິນັອບ ປະສົບຜົນສຳເລັດໃນການປະຕິບັດພາລະກິດຂອງຕົນ ຢູ່ ສປປ ລາວ ໃນຄັ້ງນີ້.

ກອງ​ປະຊຸມ​ໜ່ວຍ​ງານ​ ຜູ້​ຊ່ຽວຊານ​ດ້ານ​ການ​ຊ່ວຍ​ເຫລືອ​ມະນຸດສະທຳ ​ແລະບັນ​ເທົາ​ທຸກ​ໄພພິບັດ​ໃນ​ຂອບ​ຂອງ​ກອງ​ປະຊຸມ​ລັດຖະມົນຕີ​ປ້ອງ​ກັນ​ປະ​ເທດ​ອາ​ຊຽນ+ ຄັ້ງທີ 6 ​ໄດ້​ຈັດ​ຂຶ້ນ​ຢ່າງ​ເປັນ​ທາງ​ການ​ ໃນ​ວັນ​ທີ 5 ສິງຫາ 2015 ທີ່​ນະຄອນຫລວງ​ວຽງ​ຈັນ, ​ໂດຍ​ການ​ເປັນ​ປະທານ​ຮ່ວມ​ ຂອງ​ກອງທັບ​ປະຊາຊົນ​ລາວ​ແລະ ກຳລັງ​ປ້ອງ​ກັນ​ຕົວ​ຍີ່ປຸ່ນ ​ເຊິ່ງນຳ​ໂດຍ ທ່ານ​ ພັນ​ໂທ ​ໄພ​ວັນຈັນທະ​ພົມມາ ຮອງ​ຫົວໜ້າ​ກົມ​ພົວພັນ​ຕ່າງປະ​ເທດ, ຫົວໜ້າ​ກອງ​ເລຂາ​ອາ​ຊຽນກະຊວງ​ປ້ອງ​ກັນ​ປະ​ເທດ ​ແຫ່ງ ສປປ ລາວ ​ແລະ ທ່ານ ​ເຄນ​ໂກະ ຊາ​ໂຕະ, ຫົວໜ້າ​ຫ້ອງການ​ນະ​ໂຍບາຍ​ສາກົນ ​ແລະ ປ້ອງ​ກັນຊາ​ດຂອງ​ກະຊວງ​ປ້ອງ​ກັນ​ປະ​ເທດ​ຍີ່ປຸ່ນ, ກອງ​ປະຊຸມ​ ຍັງ​ໄດ້​ຮັບ​ກຽດ​ຕ້ອນຮັບທ່ານ ພົນ​ຈັດຕະວາ ປະສິດ ທ່ຽງ​ທຳ, ຮອງ​ຫົວໜ້າ​ກົມ​ໃຫຍ່​ ເສນາ​ທິການ​ກອງທັບ, ຫົວໜ້າ​ຄະນະ​ກຳມະການ​ ຄວບ​ຄຸມ​ໄພພິບັດ​ ຂອງ​ກອງທັບ​ປະຊາຊົນ​ລາວ, ມີຄະນະ​ຜູ້​ແທນ​ຈາກ 10 ​ປະ​ເທດ ​ສະມາຊິກ​ອາ​ຊຽນ ​ແລະ ອີກ 8 ປະ​ເທດ+  ຄື:ອົດ​ສະ​ຕຣາ​ລີ, ຈີນ, ອິນ​ເດຍ, ຍີ່ປຸ່ນ, ​ສ ເກົາຫລີ, ນິວຊີ​ແລນ, ຣັດ​ເຊຍ​ແລະ ສະຫະລັດ​ອາ​ເມ​ຣິ​ກາ.

ການ​ຈັດ​ກອງ​ປະຊຸມ​ຄັ້ງນີ້ ​ເພື່ອ​ຜັນ​ຂະຫຍາຍ​ ແຜນ​ງານ​ຮ່ວມ​ມື​ຂອງ​ກອງທັບ​ປະຊາຊົນ​ລາວ ​ແລະ ກອງທັບ​ຍີ່ປຸ່ນ ​ເຊັ່ນ: ທົບ​ທວນ ​ແລະ ຕີ​ລາຄາກ່ຽວ​ກັບ​ການຈັດຕັ້ງ ປະຕິບັດ​ກອງ​ປະຊຸມ​ໜ່ວຍ​ງານ​ຜູ້​ຊ່ຽວຊານ​ດ້ານ​ການ​ຊ່ວຍ​ເຫລືອ ມະນຸດສະທຳ ​ແລະບັນ​ເທົາ​ທຸກ​ໄພພິບັດ ​ໃນ​ຂອບ​ຂອງ​ກອງ​ປະຊຸມ ​ລັດຖະມົນຕີ​ປ້ອງ​ກັນ​ປະ​ເທດ​ອາຊຽນ+ ​ໃນ​ໄລຍະ​ຜ່ານ​ມາ, ພ້ອມ​ທັງ​ກວດ​ສອບ​ບັນດາ​ນິຕິ​ກຳ​ກ່ຽວ​ກັບຫລັກການ​ພື້ນຖານ​​ ການ​ຮ່ວມ​ມື​​ຊ່ວຍ​ເຫລືອ​ ມະນຸດສະທຳ ​ແລະບັນ​ເທົາ​ທຸກ​ໄພພິບັດ; ການ​ວາງ​ແຜນ​ຝຶກ​ຊ້ອມ​ເທິງ​ແຜ່ນ​ທີ່-​ແຜ່ນ​ຮ່າງ ​ແລະ ການ​ຝຶກ​ຊ້ອມ​ພາກ​ສະໜາມ ​ໃນ​ການ​ຊ່ວຍ​ເຫລືອ​ ມະນຸດ​ສະ​ທຳ ​ແລະ ບັນ​ເທົາ​ທຸກ​ໄພພິບັດ ​ແລະ ຜ່ານ​ແຜນ​ງານ​ການ​ຮ່ວມ​ມື​ຊ່ວຍ​ເຫລືອ​ມະນຸດ​ສະ​ທຳ ​ແລະ ບັນ​ເທົາ​ທຸກ​ໄພພິບັດຂອງ​ກອງທັບ​ລາວ ​ແລະ ກອງທັບຍີ່ປຸ່ນ ​ໃນ​ປີ 2015-2016.

ໃນ​ກອງ​ປະຊຸມ ​ຍັງ​ໄດ້​ຄົນຄວ້າ, ປຶກສາ​ຫາລື​ກ່ຽວ​ກັບ ​ແຜນການ​ຝຶກ​ຊ້ອມ​ເທິງ​ແຜນ​ທີ່-​ແຜນ​ຮ່າງ ​ແລະ ການ​ຝຶກ​ຊ້ອມ​ ພາກ​ສະໜາມ​ຕົວ​ຈິງ​ໃນ​ການ​ຊ່ວຍ​ເຫລືອ​ມະນຸດສະທຳ ​ແລະ ບັນ​ເທົາ​ທຸກ​ໄພພິບັດ​ເຊິ່ງຄາດ​ວ່າ​ຈະ​ມີກອງທັບ 4 ຝ່າຍ ຄື: ລາວ, ຍີ່ປຸ່ນ, ​ໄທ ​ແລະ ຣັດ​ເຊຍ​ເຂົ້າຮ່ວມ​ເປັນ​ເຈົ້າພາບ​ ຈັດຢູ່​ແຂວງ​ຊົນ​ບູລີ ປະ​ເທດ​ໄທ ​ໃນ​ເດືອນ​ກັນຍາ 2016, ຜູ້​ເຂົ້າຮ່ວມ​ກອງ​ປະຊຸມ​ ຈະ​ໄດ້​ສຶກສາ​ບັນດາ​ຂໍ້​ສົມ​ມຸດ​ຖານ ຫລື​ເຫດການ​ຈຳລອງ​ຕ່າງໆ​ ກ່ຽວ​ກັບ​ບັນຫາ​ ໄພພິບັດ​ທີ່​ເກີດ​ຂຶ້ນຢູ່​ໃນ​ພາກ​ພື້ນ​ອາ​ຊຽນ ຈາກ​ນັ້ນ ຈະ​ໄດ້​ປຶກສາ​ຫາລື ​ແລະຄົ້ນຄວ້າ​ມາດ​ຕະການ​ ທີ່​ສາມາດ​ຊົມ​ໃຊ້​ເຂົ້າ​ໃນ​ການ​ປະຕິບັດ​ການ​ຊ່ວຍ​ເຫລືອ​ດ້ານ​ ມະນຸດສະທຳ ​ແລະ ບັນ​ເທົາ​ທຸກ​ໄພພິບັດ, ​ໂດຍ​ສະເພາະ​ແມ່ນ​ແຜນ​ຝຶກ​ຊ້ອມ​ ພາກ​ສະໜາມ ທີ່​ຈະ​ຈັດ​ຂຶ້ນ​ທີ່​ປະ​ເທດ​ໄທ

ກະຊວງ​ອຸດສາຫະກໍາ-ການ​ຄ້າ​ ຮ່ວມ​ກັບ​ກອງ​ເລຂາ​ອາ​ຊຽນ​ໄດ້​ຈັດ​ກອງ​ປະຊຸມ​ປຶກສາ​ຫາລື ລະຫວ່າງ ​ພາກ​ລັດ ​ແລະ ພາກ​ເອກະ​ຊົນ, ສະ​ຖາ​ບັນ ​ແລະ ອົງການ​ຈັດ​ຕັ້ງ​ສາກົນ, ​ໃນ​ວັນ​ທີ 28 ກໍລະກົດ 2015 ນີ້ຢູ່​ໂຮງ​ແຮມ​ແລນ​ມາກ​ແມ່​ຂອງຣີ​ເວີ​ໄຊ ນະຄອນຫລວງ​ວຽງ​ຈັນ.

ໃນ​ກອງປະຊຸມ​ແມ່ນ​ຈະ​ໄດ້​ກໍາ​ນົດ​ແນວ​ຄວາມ​ຄິດ​ໃນ​ການ​ກໍານົດ​ແຜນ​ງານ​ບູລິ​ມະ​ສິດ ​ຂອງ​ເສົາ​ຄໍ້າ​ເສດຖະກິດ​ໃນ​ໄລຍະ​ການ​ເປັນ​ປະທານ​ອາ​ຊຽນ​ ໃນ​ປີ 2016 ຂອງ ສປປ ລາວ ​ໂດຍ​ການ​ເປັນ​ປະທານ​ຂອງ​ທ່ານ ນາງ ​ເຂັມ​ມະນີ ພົນ​ເສນາ, ລັດຖະມົນຕີ​ວ່າການ​ກະຊວງ​ອຸດສາຫະກໍາ-ການ​ຄ້າ, ມີ​ບັນດາ​ລັດຖະມົນຕີ​ຊ່ວຍ​ວ່າການ, ຫົວໜ້າ​ກົມ, ຮອງ​ກົມ ​ແລະ ຜູ້ຕາ​ງໜ້າຈາກ​ອົງການ​ຈັດ​ຕັ້ງ​ສາກົນ ພ້ອມ​ດ້ວຍ​ພະນັກງານ​ກ່ຽວຂ້ອງ​ເຂົ້າ​ຮ່ວມ.

ທ່ານນາງ ​ເຂັມ​ມະນີ ພົນ​ເສນາ ​ໄດ້​ກ່າວ​ວ່າ ການຈັດ​ຕັ້ງກອງ​ປະຊຸມ​ໃນ​ຄັ້ງ​ນີ້​​​ເປັນ​ການ​ປະຊຸມ​​ໃນ​ລະດັບ​ເປີດ​ກ້ວາງ​ ໂດຍ​ຈະ​ມີ​ຜູ້​ຊຽວຊານ​ມາ​ຈາກ​ພາກ​ພື້ນ​ອາ​ຊຽນ ​ແລະ ຈາກ​ພາຍ​ໃນ​ຂອງ ສປປ ລາວ ຈະ​ໃຫ້​ກຽດ​ຂື້ນ​ບັນ​ລະ​ຍາຍ​ໃນ​ຫົວ​ຂໍ້​ຕ່າງໆ ​ເຊັ່ນ: ການ​ເຂົ້າ​ຮ່ວມ​ປະຊາ​ຄົມ​ເສດຖະກິດ​ອາ​ຊຽນ​ໃນ​ປີ 2015  ​ແລະ ​ແຜນ​ວຽກ​ພາຍຫລັງ​ການເຂົ້າ​ເປັນ​ປະຊາ​ຄົມ ​ເສດຖະກິດ​ອາ​ຊຽນ​ໃນ​ປີ 2016 ພ້ອມ​ນີ້​ໄດ້​ແລກປ່ຽນ​ບົດຮຽນ​ປະສົບ​ການ ​ເພື່ອ​ກໍານົດ​ເອົາໜ້າ​ວຽກ​ຫລັກ, ທິດ​ທາງ​ໃນ​ການ​ພັດທະນາ ​ເສດຖະກິດ​ໃນ ສປປ ລາວ ​ເພື່ອ​ເປັນ​ເງື່ອນ​ໄຂ​ໃນ​ການ​ສ້າງ ​ສິ່ງ​ອໍານວຍ​ຄວາມ​ສະດວກ​ທີ່​ຕິດ​ພັນ​ກັບ 3 ​ເຂດ​ບູລິ​ມະ​ສິດ​ເຊັ່ນ: ການ​ພິຈາລະນາ​ເປີດ​ດ່ານ​ຊາຍ​​ແດນ ຢູ່​ຈຸດ​ສໍາຄັນ​ຂອງ ສປປ ລາວ ຕະຫລອດ 24 ຊົ່ວ​ໂມງ ​ເພື່ອ​ເປັນ​ການ​ອໍານວຍ​ຄວາມ​ສະດວກ ​ໃຫ້​ແກ່​ການ​ນໍາ​ເຂົ້າ ​ແລະ ສົ່ງອອກ​ສິນຄ້າ ​ລວມທັງ​ການຈັດ​ຕັ້ງ​ປະຕິບັດ​ ນະ​ໂຍບາຍ​ການ​ເປີດ​ນ່ານຟ້າ, ການ​ເຂົ້າ​ເຖິງ​ແຫ​ລ່ງທຶນ ຂອງ​ພາກ​ທຸລະ​ກິດ​ໃຫ້​ມີ​ຄວາມ​ສະດວກ​ວ່ອງ​ໄວ​ຂຶ້ນ, ປັບປຸງ​ການ​ຊໍາລະສະ​ສາງ​ ດ້ານ​ການ​ເງິນ, ຄວາມ​ເປັນ​ໄປ​ໄດ້​ ໃນ​ການ​ຍົກ​ເວັ້ນວີ​ຊາ​ໃຫ້​ແກ່​ນັກ​ທ່ອງ​ທ່ຽວ​ທົ່ວ​ໄປ​ໂດຍ​ບໍ່​ຈໍາກັດ ແຕ່​ພາຍ​ໃນ​ອາຊຽນ, ການ​ສົ່ງ​ເສີມ​ການທ່ອງທ່ຽວ​ຕາມ​ຊາຍ​ແດນ, ຫລື​ ວັດທະນະ​ທໍາ​ ຊົນ​ເຜົ່າ ​ແລະ ອື່ນໆ.