ໃນວັນທີ 19 ມີນາ 2016 ທີ່ຜ່ານມາ, ທີ່ ສໍານັກງານສະຖານເອກອັກຄະລັດຖະທູດ ແຫ່ງ ສປປ ​ລາວ ປະຈໍາປະເທດຍີ່ປຸ່ນ ໄດ້ດໍາເນີນການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ VIII, ເຂດ 1 ນະຄອນຫຼວງວຽງຈັນຂຶ້ນ.

ທ່ານ ນາງ ສົມສະໜຸກ ວົງສັກ, ໃນນາມອຸບປະທູດຊົ່ວຄາວ ແລະ ປະກອບມີຄະນະ 4 ທ່ານ ໄດ້ຖືກແຕ່ງຕັ້ງໃຫ້ເປັນ ຄະນະກໍາມະການຮັບຜິດຊອບການເລືອກຕັ້ງ ສະມາຊິກສະພາແຫ່ງຊາດ ຊຸດທີ VIII ຢູ່ໜ່ວຍເລືອກຕັ້ງຂອງສະຖານທູດລາວ ທີ່ໂຕກຽວ. ພົນລະເມືອງລາວຜູ້ມີສິດປ່ອນບັດເລືອກຕັ້ງທັງໝົດມີ 192 ຄົນ, ຍິງ 71 ຄົນ, ໃນທົ່ວປະເທດຍີ່ປຸ່ນ. ສໍາລັບຜູ້ທີ່ມີຽໜ້າປ່ອນບັດເລືອກຕັ້ງຕົວຈິງມີທັງໝົດ 37 ຄົນ ໃນນັ້ນມີຍິງ 15 ຄົນ.

ໃນເວລາ 9 ໂມງເຊົ້າຂອງວັນດຽວກັນ, ທ່ານ ນາງ ສົມສະໜຸກ ວົງສັກ, ຫົວໜ້າຮັບຜິດຊອບການເລືອກຕັ້ງ ໄດ້ໃຫ້ກຽດກ່າວເປີດພີທີຢ່າງເປັນທາງການ ໂດຍໄດ້ຊີ້ໃຫ້ເຫັນເຖິງ ຄວາມໝາຍຄວາມສໍາຄັນຂອງການເລືອກຕັ້ງໃນຄັ້ງນີ້, ພ້ອມທັງໄດ້ເນັ້ນໜັກໃຫ້ທຸກໆຄົນສຶກສາຫາຂໍ້ມູນຜູ້ເຂົ້າສະໝັກເລືອກຕັ້ງ ສະມາຊິກສະພາແຫ່ງຊາດ ຊຸດທີ VIII ໃຫ້ຄົບຖ້ວນ, ເພື່ອຈະໄດ້ເລືອກເອົາຄົນດີ ປະກອບດ້ວຍຄວາມສາມາດມາເປັນຕົວແທນໃຫ້ແກ່ປະຊາຊົນ ຢ່າງແທ້ຈິງ. ຫຼັງຈາກນັ້ນ, ບັນດາພະນັກງານສະຖານທູດ, ນັກສຶກສາ ກໍໄດ້ທະຍອຍກັນມາເລືອກຕັ້ງຢ່າງເປັນ ຂະບວນຟົດຟື້ນ.

ການເລືອກຕັ້ງດັ່ງກ່າວໄດ້ດໍາເນີນໄປຈົນເຖິງເວລາ 17:00 ໂມງ, ທ່ານຫົວໜ້າຄະນະກໍາມະການຮັບຜິດຊອບການເລືອກຕັ້ງໄດ້ກ່າວປິດງານ ແລະ ສັງເກດເຫັນວ່າການດໍາເນີນການປ່ອນບັດເລືອກຕັ້ງຄັ້ງທໍາອິດ ຢູ່ສະຖານທູດລາວ ທີ່ໂຕກຽວ ຄັ້ງນີ້ ມີຄວາມເປັນເອກະພາບໃນການເຮັດວຽກ, ການເຮັດວຽກເປັນໝູ່ຄະນະ, ການກວດກາບັດລະອຽດ, ມີຄວາມຊື່ສັດຕໍ່ການປະຕິບັດໜ້າທີ່, ການນັບຄະແນນສຽງບໍ່ມີບັດຕາຍ ແລະ ໄດ້ຮັບຜົນສໍາເລັດຢ່າງຈົບງາມ.