ໃນຕອນເຊົ້າຂອງວັນທີ 08 ທັນວາ 2023, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີ ກະຊວງການຕ່າງປະເທດ ໄດ້ໃຫ້ກຽດເຂົ້າຮ່ວມ ແລະ ກ່າວເປີດກອງປະຊຸມປຶກສາຫາລືຮ່ວມ ສປປ ລາວ-ສ.​ເກົາຫຼີ ກ່ຽວ​ກັບ​ການ​ເຊື່ອມ​ຈອດ: ພື້ນຖານ​ໂຄງ​ລ່າງແບບ​ຍືນ​ຍົງ ​ແລະ ຕາ​ຂ່າຍ​ໄຟຟ້າ​ໃນ​ອາ​ຊຽນ ທີ່ ນະຄອນຫລວງວຽງຈັນ, ເຊິ່ງກອງປະຊຸມຄັ້ງນີ້ເປັນກິດຈະກຳຮ່ວມລະຫວ່າງສໍານັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອາຊຽນ ແລະ ສໍານັກງານຜູ້ຕາງໜ້າຖາວອນ ແຫ່ງ ສ. ເກົາຫຼີ ປະຈໍາອາຊຽນ ທີ່ ຈາກາກຕາ, ໂດຍລັດຖະບານ ສ. ເກົາຫຼີ ໃຫ້ການສະໜັບສະໜູນໃນການຈັດກອງປະຊຸມ ເຊິ່ງຈັດຂຶ້ນໃນຮູບແບບປະສົມ (ແບບເຊິ່ງໜ້າ ແລະ ແບບທາງໄກ), ມີຜູ້ເຂົ້າຮ່ວມຈາກບັນດາກະຊວງຂະແໜງການຕ່າງໆ ພ້ອມທັງຜູ້ຕາງໜ້າຈາກບັນດາສຳນັກງານປະຈໍາອາຊຽນ ທີ່ຈາກາກຕາ ແລະ ກອງເລຂາອາຊຽນຫຼາຍກວ່າ 50 ທ່ານ.

ໃນວັນທີ 07 ທັນວາ 2023, ທ່ານ ບຸນເຫລືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ກຽດເຂົ້າຮ່ວມ ແລະ ກ່າວເປີດກອງປະຊຸມເຜີຍແຜ່ກອງປະຊຸມເຜີຍແຜ່ຜົນຂອງກອງປະຊຸມສຸດຍອດອາຊຽນ ຄັ້ງທີ 42 ແລະ 43 ແລະ ການກະກຽມໃຫ້ແກ່ການເປັນປະທານອາຊຽນຂອງ ສປປ ລາວ ໃນປີ 2024 ທີ່ ເມືອງ ວັງວຽງ, ແຂວງ ວຽງຈັນ, ເຊິ່ງກອງປະຊຸມຄັ້ງນີ້ ເປັນໜື່ງໃນກິດຈະກຳທີ່ໄດ້ຮັບການຮ່ວມມື ແລະ ສະໜັບສະໜູນໂດຍສູນອາຊຽນ-ຍີ່​ປຸ່ນ ປະຈຳສົກປີ 2023 ໂດຍມີ​ຜູ້ຕາງ​ຫນ້າຈາກເສົາຄໍ້າປະຊາຄົມເສດຖະກິດອາຊຽນ ແລະ ຫົວໜ້າເຈົ້າໜ້າທີ່ອາວຸໂສຈາກເສົາຄໍ້າວັດທະນະທໍາ-ສັງຄົມອາຊຽນ, ບັນດາກະຊວງຂະແໜງການຕ່າງໆອ້ອມຂ້າງຈາກສູນກາງ ກໍຄື ບັນດາຈຸດປະສານງານວຽກງານອາຊຽນຂອງ ສປປ ລາວ ຫຼາຍກວ່າ 75 ທ່ານ ເຂົ້າ​ຮ່ວມ.

ໃນວັນທີ 29 ພະຈິກ 2023, ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໄປເຄື່ອນໄຫວຢ້ຽມຢາມເຮັດວຽກຢູ່ແຂວງບໍລິຄຳໄຊ ໂດຍສະເພາະ ການລົງຕິດຕາມກວດກາ ແລະ ຊຸກຍູ້ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 (ບໍລິຄໍາໄຊ-ບຶງການ) ໂດຍມີພາກສ່ວນທີ່ກ່ຽວຂ້ອງ ຈາກກະຊວງໂຍທາທິການ ແລະ ຂົນສົ່ງ, ແຂວງບໍລິຄໍາໄຊ ແລະ ຜູ້ຮັບຜິດຊອບໂຄງການ ໃຫ້ການຕ້ອນຮັບ. ໃນໂອກາດດັ່ງກ່າວ, ທ່ານ ວັດທະນາ ພັນດານຸວົງ, ຮອງຫົວໜ້າໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ໄດ້ລາຍງານກ່ຽວກັບຄວາມຄືບຫນ້າຂອງການຈັດປະຕິບັດໂຄງການດັ່ງກ່າວ, ຊຶ່ງພາຍຫລັງທີ່ການນຳຂັ້ນສູງຂອງສອງປະເທດ ລາວ-ໄທ ໄດ້ເປັນປະທານຮ່ວມໃນພິທີວາງສີລາລຶກໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ໃນວັນທີ 28 ຕຸລາ 2022 ຜ່ານມາ, ບັນດາຫນ້າວຽກຕ່າງໆ ເປັນຕົ້ນ ວຽກງານການກໍ່ສ້າງພື້ນຖານໂຄງລ່າງ, ເສັ້ນທາງ, ສິ່ງອໍານວຍຄວາມສະດວກ ແລະ ຕຶກອາຄານບໍລິຫານ ແມ່ນສາມາດປະຕິບັດໄດ້ຕາມແຜນ ແລະ ມີຜົນສໍາເລັດຕາມຄາດໝາຍກວມເອົາ 93%, ສໍາລັບບັນດາໜ້າວຽກກໍ່ສ້າງຂົວ ໄດ້ຈັດຕັ້ງປະຕິບັດສໍາເລັດແລ້ວ 69% ໂດຍລວມແລ້ວ ເຫັນວ່າ ທັງສອງໜ້າວຽກດັ່ງກ່າວ ສາມາດຈັດຕັ້ງປະຕິບັດສໍາເລັດ 81%.