ໃນວັນທີ 10 ພຶດສະພາ 2024, ທ່ານ ທອງຜ່ານ ສະຫວັນເພັດ,​ ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ-ຈີນ ຄັ້ງທີ 30 ທີ່ ຈາກາກຕາ, ອິນໂດເນເຊຍ ພາຍໃຕ້ການເປັນປະທານຮ່ວມ ມຽນມາ ແລະ ສປ ຈີນ.

ກອງປະຊຸມຄັ້ງນີ້ ໄດ້ທົບທວນຄືນການຮ່ວມມື ອາຊຽນ-ຈີນ ໃນຊຸມປີຜ່ານມາ ແລະ ໄດ້ປຶກສາຫາລື ກ່ຽວກັບທິດທາງໃນການເສີມຂະຫຍາຍການພົວພັນຮ່ວມມື ໃນຖານະເປັນຄູ່ຮ່ວມຍຸດທະສາດຮອບດ້ານ ອາຊຽນ-ຈີນ ໃນຊຸມປີຕໍ່ໜ້າ.

ໃນວັນທີ 09 ພຶດສະພາ 2024 ທີ່ ກອງເລຂາອາຊຽນ, ຈາກາກຕາ,​ ອິນໂດເນເຊຍ, ທ່ານ ທອງຜ່ານ ສະຫວັນເພັດ,​ ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມ ກອງປະຊຸມປະສານງານສຳລັບເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 16.

ໃນວັນທີ 8 ພຶດສະພາ 2024, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ໄດ້ລົງເຄື່ອນໄຫວພົບປະເຮັດວຽກຮ່ວມກັບ ທ່ານ ຄໍາເຫຼັກ ໃຈອີສານ, ຮອງເຈົ້າແຂວງໆຜົ້ງສາລີ, ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງແຂວງຜົ້ງສາລີ, ເພື່ອຮ່ວມກັນລົງກວດກາ, ເກັບກຳຂໍ້ມູນ ແລະ ປະຊຸມປຶກສາຫາລື ກ່ຽວກັບ ຄວາມພ້ອມຂອງດ່ານສາກົນລານຕຸ້ຍ, ເມືອງຍອດອູ, ແຂວງຜົ້ງສາລີ ເພື່ອກະກຽມຄວາມພ້ອມໃນການເປີດເປັນດ່ານສາກົນຢ່າງສົມບູນແບບ.