ໃນຕອນເຊົ້າຂອງວັນທີ 02 ພະຈິກ 2023, ທີ່ກະຊວງການຕ່າງປະເທດ ທ່ານ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານພົວພັນຄົນເຊື້ອຊາດລາວຢູ່ຕ່າງປະເທດ, ໄດ້ໃຫ້ກຽດຕ້ອນຮັບຄະນະສະມາຄົມກ໊ອຟພີ່ນ້ອງເຊື້ອຊາດລາວຈາກ ສ. ອາເມຣິກາ, ອົດສະຕຣາລີ ແລະ ນູແວນເຊລັງ ຈຳນວນ 50 ທ່ານ, ເນື່ອງໃນໂອກາດທີ່ມາເຄື່ອນໄຫວຢ້ຽມຢາມ ແລະ ເຂົ້າຮ່ວມແຂ່ງຂັນກ໊ອຟມິດຕະ ພາບຢູ່ ສປປ ລາວ.
ໃນໂອກາດນີ້, ທ່ານ ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມປິຕິຍິນດີ ແລະ ຊົມເຊີຍຕໍ່ການມາເຄື່ອນໄຫວຢ້ຽມຢາມຢູ່ ສປປ ລາວ ໃນຄັ້ງນີ້, ພ້ອມທັງຢືນຢັນຄືນທັດສະນະຂອງ ພັກ-ລັດຖະ ບານເຮົາ ຍາມໃດກໍໃຫ້ຄວາມສໍາຄັນຕໍ່ພີ່ນ້ອງເຊື້ອຊາດລາວຢູ່ຕ່າງປະເທດ ແລະ ຖືເປັນພາກສ່ວນໜຶ່ງທີ່ບໍ່ສາ ມາດຕັດແຍກອອກຈາກວົງຄະນະຍາດແຫ່ງຊາດໄດ້, ຊຶ່ງເປັນການສະແດງໃຫ້ຮູ້ວ່າພີ່ນ້ອງເຊື້ອຊາດລາວຢູ່ຕ່າງປະເທດ, ຈະດຳລົງຊີວິດຢູ່ປະເທດໃດກໍຕາມຍັງມີຈິດໃຈຮັກເຊື້ອແພງຊາດ, ຮັກບ້ານເກີດເມືອງນອນຂອງຕົນ, ຮັກສາຮີດຄອງປະເພນີ, ວັດທະນະທໍາລາວ ແລະ ມີຄວາມເອກອ້າງທະນົງໃຈຕໍ່ຄວາມເປັນລາວຢູ່ຕະຫຼອດເວ ລາ. ທັງສອງຝ່າຍໄດ້ມີການປຶກສາຫາລື ແລະ ແລກປ່ຽນຄວາມຄິດເຫັນເຊິ່ງກັນ ແລະ ກັນ ໃນຫຼາຍບັນຫາຢ່າງກົງໄປກົງມາ, ທີ່ເຕັມໄປດ້ວຍໄມຕີຈິດ ແລະ ມິດຕະພາບອັນສະໜິດສະໜົມຕໍ່ກັນ.
ນອກຈາກນັ້ນ, ຄະນະດັ່ງກ່າວຈະສືບຕໍ່ໄປຢ້ຽມຢາມ ແລະ ເຂົ້າຢ້ຽມຂໍ່ານັບຄະນະນໍາສູນກາງແນວລາວສ້າງຊາດ, ຄະນະນໍາກະຊວງແຜນການ ແລະ ການລົງທຶນ ແລະ ຄະນະນໍາແຂວງຫຼວງພະບາງ. ໃນໂອກາດທີ່ຄະນະສະມາຄົມກ໊ອຟພີ່ນ້ອງເຊື້ອຊາດລາວມາເຄື່ອນໄຫວຢ້ຽມຢາມ ແລະ ແຂ່ງຂັນກ໊ອຟມິດຕະພາບ ຢູ່ ສປປ ລາວ ຄັ້ງນີ້, ແມ່ນຈະມີການຈັດກິດຈະກໍາຫຼາຍຢ່າງ ເຊັ່ນ: ກິດຈະກໍາການໄປມອບເຄື່ອງຊ່ວຍເຫຼືອດ້ານອຸປະ ກອນການສຶກສາໃຫ້ແກ່ໂຮງຮຽນຄົນພິການ 03 ແຫ່ງ ຄື: ໂຮງຮຽນພິເສດຄົນພິການ, ບ້ານໜອງໜ້ຽວ, ເມືອງສີໂຄດຕະບອງ, ນະຄອນຫຼວງວຽງຈັນ, ໂຮງຮຽນກິນນອນຊົນເຜົ່າ, ບ້ານສວນຫຼວງ, ເມືອງຊຽງເງິນ ແລະ ໂຮງຮຽນສຶກສາພິເສດ (ຫູໜວກ-ປາກກຶກ), ບ້ານພູໝອກ, ນະຄອນຫຼວງພະບາງ, ແຂວງຫຼວງພະບາງ ແລະ ກິດຈະກໍາການແຂ່ງຂັນກິລາກ໊ອຟມິດຕະພາບ ລະຫວ່າງ ນັກກິລາກ໊ອຟທີ່ຢູ່ພາຍໃນນະຄອນຫຼວງວຽງຈັນ ແລະ ຫຼວງພະບາງ ຈໍານວນ 03 ຄັ້ງ, ພ້ອມທັງມີແຜນຈະໄປທ່ຽວຊົມແຫຼ່ງທ່ອງທ່ຽວຫຼາຍແຫ່ງຢູ່ນະຄອນຫຼວງວຽງຈັນ ແລະ ຫຼວງພະບາງ ເຊັ່ນ: ວັດພຣະທາດຫຼວງ, ວັດສີເມືອງ, ວັດຊຽງຄວນ, ຕາດກວາງຊີ, ຕະຫຼາດກາງຄືນ ແລະ ແຫຼ່ງທ່ອງທ່ຽວອື່ນໆ.