ສະຖາບັນການຕ່າງປະເທດ ຮ່ວມກັບສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໄດ້ຈັດກອງປະຊຸມສໍາມະນາພາຍໃຕ້ຫົວຂໍ້ “ເພີ່ມທະວີການສ້າງຄູ່ຮ່ວມຊາຕາກໍາ ລາວ-ຈີນ ແລະ ຄູ່ຮ່ວມຊາຕາກໍາຂອງມວນມະນຸດ ເພື່ອເສີມຂະຫຍາຍ 5 ຫຼັກການແຫ່ງການຢູ່ຮ່ວມກັນໂດຍສັນຕິ” ເພື່ອເປັນການລະນຶກເຖິງ ແລະ ສະເຫຼີມສະຫຼອງຜົນສໍາເລັດຂອງການຈັດຕັ້ງປະຕິບັດ 5 ຫຼັກການດັ່ງກ່າວ ຄົບຮອບ 70 ປີ, ໂດຍສະເພາະ ໃນການສົ່ງເສີມການພົວພັນຮ່ວມມືລະຫວ່າງ ສປປ ລາວ ແລະ ສປ ຈີນ, ຊຶ່ງຈັດຂຶ້ນໃນຕອນເຊົ້າຂອງວັນທີ 23 ພຶດສະພາ 2024, ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ໃນກອງປະຊຸມສໍາມະນາຄັ້ງນີ້ ໄດ້ຮັບກຽດຈາກ ທ່ານ ສົມສະຫວາດ ເລັ່ງສະຫວັດ, ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ ແລະ ອະດີດລັດຖະມົນຕີກະຊວງການຕ່າງປະເທດ ເຂົ້າຮ່ວມເປັນປະທານກິດຕິມະສັກ ແລະ ກ່າວເປີດກອງປະຊຸມໂດຍ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີ ກະຊວງການຕ່າງປະເທດ, ໂດຍມີຄະນະນໍາກະຊວງ, ທູດອາວຸໂສບໍານານ, ບັນດາຄະນະກົມ, ຄະນະພະແນກ, ພະນັກງານຈາກກະຊວງການຕ່າງປະເທດ ແລະ ສະຖານເອກອັກຄະລັດຖະທູດ ສປ ຈີນ ແລະ ແຂກຖືກເຊີນເຂົ້າຮ່ວມ.
ໃນວັນທີ 21 ພຶດສະພາ 2024, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ-ການາດາ ຄັ້ງທີ 21 ທີ່ ອົດຕາວາ, ການາດາ ພາຍໃຕ້ການເປັນປະທານຮ່ວມຂອງ ມາເລເຊຍ ແລະ ການາດາ.
ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ ໄດ້ນຳພາຄະນະທູຕານຸທູດ ຈາກ 7 ປະເທດຄື: ບູນກາລີ, ອິນເດຍ, ຍີ່ປຸ່ນ, ສ.ເກົາຫລີ, ຕວັກເກຍ, ສສ. ຫວຽດນາມ ແລະ ຊຳບີ, ເຊິ່ງເປັນສະມາຊິກຄະນະກຳມະການມໍຣະດົກໂລກ (World Heritage Committee) ຂອງອົງການ ອຸຍແນັສໂກ ປະຈຳຢູ່ ປາຣີ, ທີ່ເດີນທາງມາຈາກປະເທດຝຣັ່ງ, ບູນກາລີ ແລະ ນະຄອນຫລວງວຽງຈັນ ເພື່ອຢ້ຽມຢາມ ແລະ ເຮັດວຽກ ຢູ່ ນະຄອນຫຼວງພະບາງ ເມືອງມໍຣະດົກໂລກ ແລະ ເຂດໂຄງການກໍ່ສ້າງເຂື່ອນໄຟຟ້າ ໃນວັນທີ 20-22 ພຶດສະພາ 2024.