ໃນວັນທີ 07 ທັນວາ 2023, ທ່ານ ບຸນເຫລືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ກຽດເຂົ້າຮ່ວມ ແລະ ກ່າວເປີດກອງປະຊຸມເຜີຍແຜ່ກອງປະຊຸມເຜີຍແຜ່ຜົນຂອງກອງປະຊຸມສຸດຍອດອາຊຽນ ຄັ້ງທີ 42 ແລະ 43 ແລະ ການກະກຽມໃຫ້ແກ່ການເປັນປະທານອາຊຽນຂອງ ສປປ ລາວ ໃນປີ 2024 ທີ່ ເມືອງ ວັງວຽງ, ແຂວງ ວຽງຈັນ, ເຊິ່ງກອງປະຊຸມຄັ້ງນີ້ ເປັນໜື່ງໃນກິດຈະກຳທີ່ໄດ້ຮັບການຮ່ວມມື ແລະ ສະໜັບສະໜູນໂດຍສູນອາຊຽນ-ຍີ່ປຸ່ນ ປະຈຳສົກປີ 2023 ໂດຍມີຜູ້ຕາງຫນ້າຈາກເສົາຄໍ້າປະຊາຄົມເສດຖະກິດອາຊຽນ ແລະ ຫົວໜ້າເຈົ້າໜ້າທີ່ອາວຸໂສຈາກເສົາຄໍ້າວັດທະນະທໍາ-ສັງຄົມອາຊຽນ, ບັນດາກະຊວງຂະແໜງການຕ່າງໆອ້ອມຂ້າງຈາກສູນກາງ ກໍຄື ບັນດາຈຸດປະສານງານວຽກງານອາຊຽນຂອງ ສປປ ລາວ ຫຼາຍກວ່າ 75 ທ່ານ ເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່ກອງປະຊຸມເຜີຍແຜ່ຜົນຂອງກອງປະຊຸມສຸດຍອດອາຊຽນ ຄັ້ງທີ 42 ແລະ 43 ແລະ ການກະກຽມໃຫ້ແກ່ການເປັນປະທານອາຊຽນຂອງ ສປປ ລາວ ໃນປີ 2024 ໂດຍມີຜູ້ຕາງຫນ້າຈາກ 3 ເສົາຄໍ້າປະຊາຄົມອາຊຽນ ຂຶ້ນບັນລະຍາຍສະຫລຸບການເຄື່ອນໄຫວວຽກງານອາຊຽນຄື: ກົມອາຊຽນ, ກະຊວງການຕ່າງປະເທດ ໄດ້ຂຶ້ນເຜີຍແຜ່ສະຫລຸບວຽກງານເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ ລວມທັງ ຜົນກອງປະຊຸມສຸດຍອດອາຊຽນ ຄັ້ງທີ 42 ແລະ 43 ແລະ ກອງປະຊຸມທີ່ກ່ຽວຂ້ອງ, ການກະກຽມໃຫ້ແກ່ການເປັນປະທານອາຊຽນຂອງ ສປປ ລາວ ໃນປີ 2024, ເຊິ່ງໂອກາດນີ້, ທ່ານ ຮອງຫົວໜ້າກົມອາຊຽນ, ກະຊວງການຕ່າງປະເທດ ໃນນາມກອງເລຂາອາຊຽນແຫ່ງຊາດ ໄດ້ແຈ້ງໃຫ້ທີ່ປະຊຸມຊາບ ກ່ຽວກັບ ການກະກຽມຄວາມພ້ອມໃຫ້ແກ່ການເປັນປະທານອາຊຽນຂອງ ສປປ ລາວ ໃນປີ 2024, ເຊິ່ງ ສປປ ລາວ ໄດ້ຮັບກຽດເປັນປະທານອາຊຽນ ຄັ້ງທີ 3 ພາຍໃຕ້ຄໍາຂວັນ: ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ (ASEAN: Enhancing Connectivity and Resilience) ໂດຍ ການເປັນປະທານອາຊຽນຂອງ ສປປ ລາວ ຈະເລີ່ມຂຶ້ນຢ່າງເປັນທາງການໃນວັນທີ 01 ມັງກອນ 2024 ມີເປົ້າໝາຍສຸມໃສ່ຄວາມສາມັກຄີ ແລະ ຄວາມເປັນແກນກາງຂອງອາຊຽນ, ການຮ່ວມມືພາຍໃນອາຊຽນ, ອາຊຽນກັບບັນດາຄູ່ຮ່ວມມືພາຍນອກ, ເພີ່ມທະວີການເຊື່ອມໂຍງ-ເຊື່ອມຈອດ ແລະ ສ້າງຄວາມເຂັ້ມແຂງໃນອາຊຽນ. ພ້ອມນີ້, ກໍມີຜູ້ຕາງໜ້າຈາກເສົາຄໍ້າປະຊາຄົມເສດຖະກິດ ແລະ ເສົາຄໍ້າປະຊາຄົມວັດທະນະທຳ-ສັງຄົມອາຊຽນ ໄດ້ຂຶ້ນບັນລະຍາຍສະຫລຸບວຽກງານການເຄື່ອນໄຫວທີ່ຮັບຜິດຊອບພາຍໃຕ້ເສົາຄໍ້າຂອງຕົນ.
ໃນກອງປະຊຸມຄັ້ງນີ້, ຜູ້ຕາງໜ້າຈາກບັນດາກະຊວງຂະແໜງການກ່ຽວຂ້ອງ ກໍຄື ບັນດາຈຸດປະສານງານອາຊຽນ ໄດ້ແຈ້ງໃຫ້ກອງປະຊຸມຊາບ ກ່ຽວກັບ ການກະກຽມຄວາມພ້ອມຂອງພາກສ່ວນຕົນຮັບຜິດຊອບ ກໍຄື ໄດ້ປະກອບຄໍາຄິດເຫັນ ທັງຂໍ້ສະເໜີ, ຂໍ້ສະດວກ ແລະ ຂໍ້ຫຍຸ້ງຍາກຕ່າງໆ ໃຫ້ທີ່ປະຊຸມຊາບ ເພື່ອສືບຕໍ່ກະກຽມຄວາມພ້ອມຮອບດ້ານໃນການເປັນປະທານອາຊຽນຂອງ ສປປ ລາວ ໃນປີ 2024. ກອງປະຊຸມເຜີຍແຜ່ການເຄື່ອນໄຫວວຽກງານອາຊຽນ ແມ່ນເປັນກິດຈະກໍາໜຶ່ງທີ່ຈັດຂຶ້ນທຸກປີ ທີ່ໄດ້ຮັບການສະໜັບສະໜູນຈາກ ສູນອາຊຽນ-ຍີ່ປຸ່ນ.