ໃນຕອນເຊົ້າຂອງວັນທີ 08 ທັນວາ 2023, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີ ກະຊວງການຕ່າງປະເທດ ໄດ້ໃຫ້ກຽດເຂົ້າຮ່ວມ ແລະ ກ່າວເປີດກອງປະຊຸມປຶກສາຫາລືຮ່ວມ ສປປ ລາວ-ສ.ເກົາຫຼີ ກ່ຽວກັບການເຊື່ອມຈອດ: ພື້ນຖານໂຄງລ່າງແບບຍືນຍົງ ແລະ ຕາຂ່າຍໄຟຟ້າໃນອາຊຽນ ທີ່ ນະຄອນຫລວງວຽງຈັນ, ເຊິ່ງກອງປະຊຸມຄັ້ງນີ້ເປັນກິດຈະກຳຮ່ວມລະຫວ່າງສໍານັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອາຊຽນ ແລະ ສໍານັກງານຜູ້ຕາງໜ້າຖາວອນ ແຫ່ງ ສ. ເກົາຫຼີ ປະຈໍາອາຊຽນ ທີ່ ຈາກາກຕາ, ໂດຍລັດຖະບານ ສ. ເກົາຫຼີ ໃຫ້ການສະໜັບສະໜູນໃນການຈັດກອງປະຊຸມ ເຊິ່ງຈັດຂຶ້ນໃນຮູບແບບປະສົມ (ແບບເຊິ່ງໜ້າ ແລະ ແບບທາງໄກ), ມີຜູ້ເຂົ້າຮ່ວມຈາກບັນດາກະຊວງຂະແໜງການຕ່າງໆ ພ້ອມທັງຜູ້ຕາງໜ້າຈາກບັນດາສຳນັກງານປະຈໍາອາຊຽນ ທີ່ຈາກາກຕາ ແລະ ກອງເລຂາອາຊຽນຫຼາຍກວ່າ 50 ທ່ານ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອນໍາໃຊ້ເວທີດັ່ງກ່າວແລກປ່ຽນຄໍາຄິດເຫັນຮ່ວມກັນ ກ່ຽວກັບການສົ່ງເສີມການເຊື່ອມຈອດໃນອາຊຽນ ໂດຍການເຊື່ອມສານຂໍ້ລິເລີ່ມເພື່ອຄວາມສາມັກຄີ ອາຊຽນ-ສ. ເກົາຫຼີ ແລະ ຂໍ້ລິເລີ່ມການເຊື່ອມຈອດອາຊຽນ ດ້ານຕາຂ່າຍພະລັງງານ ແລະ ໂຄງລ່າງພື້ນຖານທີ່ຍືນຍົງ, ແນໃສ່ການຍົກລະດັບການເຊື່ອມຈອດໃນຫຼາຍຂົງເຂດພາຍໃນອາຊຽນ ຜ່ານແຜນແມ່ບົດ ວ່າດ້ວຍການເຊື່ອມຈອດອາຊຽນ (MPAC) 2025 ແລະ ບັນດາຂໍ້ລິເລີ່ມອື່ນໆຂອງອາຊຽນ. ໂອກາດນີ້, ທ່ານ ຮອງລັດຖະມົນຕີ ໂພໄຊ ໄຂຄໍາພິທູນ ໄດ້ໃຫ້ກຽດເຂົ້າຮ່ວມພົບປະສອງຝ່າຍ ກັບທ່ານ ລີ ຈັງ ກຶນ, ເອກອັກຄະລັດຖະທູດ ແຫ່ງ ສ. ເກົາຫຼີ ປະຈໍາ ອາຊຽນ, ໂດຍໄດ້ຕີລາຄາສູງຕໍ່ບົດບາດຂອງ ສ. ເກົາຫຼີ, ເຊິ່ງເປັນໜຶ່ງໃນຄູ່ຮ່ວມມືທີ່ສຳຄັນຂອງອາຊຽນ ທີ່ໄດ້ໃຫ້ການສະໜັບສະໜູນຢ່າງສະເໜີຕົ້ນ ສະເໝີປາຍຕໍ່ຄວາມເປັນແກນກາງຂອງອາຊຽນ. ການພົວພັນ ອາຊຽນ-ສ.ເກົາຫຼີ ໄດ້ປະກອບສ່ວນສຳຄັນເຂົ້າໃນຂະບວນການສ້າງປະຊາຄົມອາຊຽນ ເພື່ອສ້າງພາກພື້ນໃຫ້ມີສັນຕິພາບ, ສະຖຽນລະພາບ ແລະ ການພັດທະນາ.
ກອງປະຊຸມຄັ້ງນີ້, ມີຜູ້ບັນຍາຍຈາກກະຊວງພະລັງງານ ແລະ ບໍ່ແຮ່, ກະຊວງໂຍທາທິການ ແລະ ຂົນສົ່ງ, ສ. ເກົາຫລີ ແລະ ກອງເລຂາອາຊຽນ ຂື້ນນໍາສະເໜີບົດບັນຍາຍ ເພື່ອຖ່າຍທອດຄວາມຮູ້, ຄວາມເຂົ້າໃຈ ແລະ ປະສົບການ ກ່ຽວກັບຂະແໜງພະລັງງານ ແລະ ໂຄງລ່າງພື້ນຖານແບບຍືນຍົງ, ເຊິ່ງບັນດາຜູ້ເຂົ້າຮ່ວມຮັບຟັງທີ່ມາຈາກກະຊວງຂະແໜງການກ່ຽວຂ້ອງ ໄດ້ປະກອບຄໍາຄິດເຫັນແລກປ່ຽນ ຕໍ່ຫົວຂໍ້ທີ່ນຳສະເໜີຢ່າງກົງໄປກົງມາ ແລະ ມີເນື້ອໃນ ອັນໄດ້ເປັນການກະຕຸກຊຸກຍູ້ເພີ່ມທະວີການຮ່ວມມືລະຫວ່າງ ສ. ເກົາຫຼີ ແລະ ອາຊຽນ ກໍຄື ສປປ ລາວ ໃນຂະແໜງພະລັງງານ ແລະ ໂຄງລ່າງພື້ນຖານທີ່ຍືນຍົງໃຫ້ມີທ່າແຮງຂະຫຍາຍໂຕສູງຍິ່ງຂຶ້ນ.