ໃນ ວັນທີ 10 ມິຖຸນາ 2015, ທີ່ສຳນັກງານບໍລິຫານ ເຂດເສດຖະກິດພິເສດ ສະຫວັນ-ເຊໂນ ໄດ້ຈັດໃຫ້ມີພິທີເປີດ ບໍລິສັດລົງທຶນ ຈາກປະເທດຍີປຸ່ນ ຈຳນວນ 4 ບໍລິສັດ ທີ່ໄດ້ເຂົ້າມາສ້າງຕັ້ງ ບໍລິສັດພາຍໃນ ເຂດເສດຖະກິດພິເສດ ສະຫວັນ-ເຊໂນ ແຂວງສະຫວັນນະເຂດ, ໂດຍມີ ທ່ານ ນາງ ບົວທາ ຂັດຕິຍະ, ລັດຖະມົນຕີຊ່ວຍວ່າການຫ້ອງວ່າການລັດຖະບານ, ຮອງປະທານ, ຫົວໜ້າກອງເລຂາ ຄຂພສ, ແລະ ພາກສ່ວນກ່ຽວຂ້ອງ ເຂົ້າຮ່ວມ.
4 ບໍລິສັດ ທີ່ໄດ້ຮ່ວມເປີດ ຢ່າງເປັນທາງການ ໃນຄັ້ງນີ້ລວມມີ: ບໍລິສັດ ສະຫວັນ ທີວີເອັສ ຄອນຊາຕັນ ຈຳກັດ (Savan TVS Consultant Co.,LTD) ເຊິ່ງມີມູນຄ່າການລົງທຶນ 300.000 ໂດລາສະຫະລັດ ແລະ ທຶນຈົດທະບຽນ 50.000 ໂດລາສະຫະລັດ ເປັນບໍລິສັດ ໃຫ້ບໍລິການທີ່ປຶກສາ ທາງດ້ານກົດໝາຍ, ການລົງທຶນ, ການບັນຊີ, ອອກແບບ ແລະ ຕິດຕາມການກໍ່ສ້າງອາຄານ. ບໍລິສັດ ລາວນິຊິນ ມັສຊຶກໍ່ສ້າງຈຳກັດ(Lao NISHIMATSU Contruction Co.,LTD) ມີມູນຄ່າການລົງທຶນ 1 ລ້ານໂດລາສະຫະລັດ ແລະ ທຶນຈົດທະບຽນ 500.000 ໂດລາສະຫະລັດ ເພື່ອສ້າງຕັ້ງເປັນບໍລິສັດ ທີ່ໃຫ້ບໍລິການອອກແບບ ແລະ ຮັບເໝົາກໍ່ສ້າງ, ສ້ອມແປງ ບຳລຸງຮັກສາອາຄານ ແລະ ລະບົບໂຮງງານ. ຫ້ອງການ ຜູ້ຕາງໜ້າຂອງບໍລິສັດ ໂຕໂຢໂຣໄຊ(TOYOROZAI Co., LTD) ມີມູນຄ່າການລົງທຶນ ແລະ ທຶນຈົດທະບຽນ 30.000 ໂດລາສະຫະລັດ ໂດຍສ້າງຕັ້ງ ເປັນຫ້ອງການຜູ້ຕາງໜ້າ ເພື່ອສຶກສາ ແລະ ເກັບກຳຂໍ້ມູນການລົງທຶນ ຢູ່ເຂດເສດຖະກິດພິເສດ ສະຫວັນ-ເຊໂນ ສະໜອງໃຫ້ບໍລິສັດແມ່ ຢູ່ປະເທດຍີປຸ່ນ ພ້ອມທັງສົ່ງເສີມ ການສົ່ງອອກ ຜະລິດຕະພັນໄມ້ ຂອງລາວເຂົ້າສູ່ຕະຫລາດຍີປຸ່ນ. ບໍລິສັດ ນິປົນ ຄອຍ ຈຳກັດ(NIPPON KOEI Co.,LTD) ແມ່ນບໍສັດ ທີ່ຈົດທະບຽນຢູ່ນອກເຂດ ເຊິ່ງເປັນບໍລິສັດທີ່ປຶກສາໂຄງການສາຍສົ່ງ 115 KV ແຂວງສະຫວັນນະເຂດ ຫາ ແຂວງສາລະວັນ.