ໃນລະຫວ່າງວັນທີ 15-18 ທັນວາ 2022 ນີ້ ທີ່ນະຄອນຫລວງພະບາງ, ແຂວງຫລວງພະບາງ ໄດ້ມີກອງປະຊຸມຄະນະອະນຸກຳມະການເຕັກນິກຊາຍແດນຮ່ວມລາວ-ໄທ ຄັ້ງທີ່ 15, ຫົວໜ້າຄະນະຝ່າຍລາວນຳໂດຍ ທ່ານ ອານຸສິນ ຂັດຕິຍະລາດ, ຫົວໜ້າຫ້ອງການຄະນະກໍາມະການຊາຍແດນແຫ່ງຊາດ ກະຊວງການຕ່າງປະເທດ, ປະທານຄະນະອະນຸກໍາມະການເຕັກນິກຊາຍແດນຮ່ວມ ລາວ-ໄທ ແລະ ຫົວໜ້າຄະນະຝ່າຍໄທ ນຳໂດຍ ທ່ານ ພົນໂທ ໄຊຍະສິດ ປຣິນຍານຸພາບ, ເຈົ້າກົມແຜນທີ່ທະຫານ ກອງບັນຊາການກອງທັບໄທ, ປະທານຄະນະອະນຸກໍາມະການເຕັກນິກຊາຍແດນຮ່ວມໄທ-ລາວ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງເຂົ້າຮ່ວມ.

ໃນວັນທີ 8 ທັນວາ 2022, ທີ່ ສໍານັກງານປະທານາທິບໍດີ ແຫ່ງ ສາທາລະນະລັດ ໄຊປຣັດສ (Presidential Palace), ທ່ານ ລັດສະຫມີ ແກ້ວມະນີ ໄດ້ເຂົ້າຍື່ນສານຕາຕັ້ງ ຕໍ່ພະນະທ່ານ ນິໂກສ ອານາສະຕາຊີອາເດັສ (Nicos Anastasiades), ປະທານາທິບໍດີ ແຫ່ງ ສາທາລະນະລັດ ໄຊປຣັດສ ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສາທາລະນະລັດ ໄຊປຣັດສ, ເຊິ່ງມີສຳນັກງານຕັ້ງຢູ່ນະຄອນ ເຊີແນວ, ສະວິດເຊີແລນ.

ໃນວັນທີ 05 ທັນວາ 2022 ທີ່ ມາລາກັນນັງ (Malacañan) ທຳນຽບປະທານາທິບໍດີ ແຫ່ງ ສາທາລະນະລັດ ຟິລິບປິນ, ນະຄອນຫຼວງ ມະນິລາ, ທ່ານ ສອນໄຊ ວັນນະໄຊ ໄດ້ຍື່ນສານຕາຕັ້ງຕໍ່ ພະນະທ່ານ ເຟີດີນານ ໂຣມູນເດັດສ໌ ມາກ໋ອດ ຈູເນຍ (H.E. Ferdinand Romualdez Marcos Jr.), ປະທານາທິບໍດີ ແຫ່ງ ສາທາລະນະລັດ ຟິລິບປິນ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ສາທາລະນະລັດ ຟິລິບປິນ.