ໃນວັນທີ 17 ກໍລະກົດ 2023, ໜ່ວຍສະຫະພັນແມ່ຍິງສະຖານທູດ ແຫ່ງ ສປປ ລາວ ປະຈຳ ຮົງກາຣີ ທີ່ ບູດາແປສ ໄດ້ຈັດພິທີປາຖະກະຖາ ເພື່ອເຜີຍແຜ່ເອກະສານມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955 - 20 ກໍລະກົດ 2023). ພາຍໃຕ້ການເປັນປະທານຂອງ ສະຫາຍ ນາງ ບົວແກ້ວ ສູນນະລາດ, ອຸປະທູດຊົ່ວຄາວ, ຕາງໜ້າໜ່ວຍແມ່ຍິງສະຖານທູດໃຫ້ກຽດຂຶ້ນບັນຍາຍ, ໂດຍມີຕົວແທນບັນດາຈຸແມ່ຍິງນັກສຶກສາລາວ ທີ່ສຶກສາຢູ່ ຮົງກາຣີ ເຂົ້າຮ່ວມຢ່າງພ້ອມພຽງ.

ໃນລະຫວ່າງ ວັນທີ 2-3 ກໍລະກົດ 2023, ທີ່ແຂວງນິງບິ່ງ,  ທ່ານ ແສງເພັດ  ຮຸ່ງບຸນຍວງ,  ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ  ປະຈຳ ສສ ຫວຽດນາມ ໄດ້ເຂົ້າຮ່ວມ ກອງປະຊຸມສາກົນ ກ່ຽວກັບການເສີມຂະຫຍາຍຄຸນຄ່າ ບັນດານາມມະຍົດຂອງອົງການ  UNESCO ເພື່ອຮັບໃຊ້ ໃຫ້ແກ່ການພັດທະນາແບບຍືນຍົງຢູ່ຫວຽດນາມ ຊຶ່ງຈັດໂດຍ ກະຊວງການຕ່າງປະເທດຫວຽດນາມ ສົມທົບກັບ ອຳນາດການປົກຄອງແຂວງນິງບິ່ງ ແລະ ຄະນະກຳມະການແຫ່ງຊາດ UNESCO ຫວຽດນາມ ໂດຍການເຂົ້າຮ່ວມ ກອງປະຊຸມມີທ່ານ ຫງວຽນ ວັນ ຮຸ່ງ, ກຳມະການສູນກາງພັກ, ລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ, ທ່ານ ດວານ ມິງ ຫ້ວນ, ກຳມະການສູນກາງພັກ, ເລຂາພັກແຂວງນິງບິ່ງ, ທ່ານ ຟ້າມ ກວາງ ຫງອກ, ຮອງເລຂາພັກແຂວງ, ເຈົ້າແຂວງນິງບິ່ງ, ຕາງໜ້າອົງການ UNESCO, ບັນດາສະຖານທູດອາຝຣິກາໃຕ້, ນີເຈີເລຍ, ກໍາປູເຈຍ, ອາເມຣິກາ, ອິນໂດເນເຊຍ, ໄທ,  ອັງກິດ ນອກນີ້ຍັງມີບັນດາກະຊວງ,  ຂະແໜງການ, ຕາງໜ້າ ຈາກບັນດາແຂວງ,  ນະຄອນ ທົ່ວປະເທດ ທີ່ມີມໍລະດົກໂລກຂອງອົງການ UNESCO ພ້ອມດ້ວຍນັກຊ່ຽວຊານ ຕ່າງປະເທດ ຢ່າງພ້ອມພຽງ.

​ໃນວັນທີ 27 ມິຖຸນາ 2023, ໂດຍ​ໄດ້​ຮັບການ​ມອບສິດ​ຈາກ​ ກະຊວງສຶກສາ ແລະ ກິລາ ແຫ່ງ ສປປ ລາວ, ສະຖານ​ເອກ​ອັກຄະ​ລັດຖະທູດ​ແຫ່ງ ສປປ ລາວ ປະຈຳ ສສ ຫວຽດນາມ ສົມທົບ​ກັບ​ ພາກສ່ວນທີ່ກ່ຽວຂ້ອງ ຂອງຫວຽດນາມ ໄດ້​ຈັດ​ພິທີ​ປະດັບ​ຫຼຽນ​ໄຊ, ຫຼຽນກາ​ໃຫ້ແກ່ກົມກອງ ແລະ ບຸກຄົນມະຫາວິທະຍາໄລແພດສາດ ຖ້າຍບິງ ຊຶ່ງຝ່າຍ​ລາວ​ນຳໂດຍ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວປະຈຳ ສສ ຫວຽດນາມ ພ້ອມ​ຄະນະ​ນຳ, ຝ່າຍ​ຫວຽດນາມ​ ມີ ສະຫາຍ ນາງ ເຈີນ ທິ ບິກ ຮັງ,  ກຳມະການພັກແຂວງ, ຮອງປະທານຄະນະກຳມະການ ປະຊາຊົນແຂວງ ( ຮອງເຈົ້າແຂວງ); ສະຫາຍ ພົນຕີ ຫງວຽນ ຕ່ຽນ ລອງ, ຮອງປະທານສະມາຄົມມິດຕະພາບຫວຽດນາມ-ລາວ; ສະຫາຍ ຮອງສາດສະດາຈານ ດຣ ຫງວຽນ ກວັ່ນ ຕຽນ, ປະທານສະພາບໍລິຫານໂຮງຮຽນມະຫາວິທະຍາໄລແພດສາດຖ້າຍບີງ ນອກຈາກນີ້, ຍັງມີຜູ້ຕາງໜ້າຈາກ ສະມາຄົມມິດຕະພາບຫວຽດນາມ-ລາວແຂວງຖ້າຍບິ່ງ  ພ້ອມດ້ວຍຄະນະອຳນວຍການ, ພະນັກງານ ຄູອາຈານ ​ແລະ ​ພາກສ່ວນ ກ່ຽວຂ້ອງຂອງຫວຽດນາມ​ເຂົ້າ​ຮ່ວມ ​ຢ່າງ​ພ້ອມພຽງ.