ໃນວັນທີ 17 ມີນາ 2024 ທີ່ ໂຮງຮຽນມິດຕະພາບ T80 ໃນນະຄອນຫຼວງ ຮ່າໂນ້ຍ ສສ ຫວຽດນາມ ໄດ້ມີພິທີ ມອບ-ຮັບ ຄອບຄົວເບິ່ງແຍງນັກຮຽນລາວ ຊຸດທີ VIII. ໃນໂອກາດນີ້, ທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ໄດ້ເຂົ້າຮ່ວມ ແລະ ມອບໃບຍ້ອງຍໍໃຫ້ບັນດາຄອບຄົວຄົນຫວຽດນາມຜູ້ທີ່ໄດ້ຮັບເອົານັກຮຽນ, ນັກສຶກສາລາວໄປເບິ່ງແຍງຢູ່ໃນຄອບຄົວຂອງຕົນໃນໄລຍະຜ່ານມາ.
ມີຄຳເຫັນໃນພິທີ, ທ່ານທູດໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈຕໍ່ຄະນະອຳນວຍການ, ຄູອາຈານ, ພະນັກງານຂອງໂຮງຮຽນ ຕະຫຼອດຮອດພໍ່ແມ່, ລຸງປ້າ, ອາວອາຫວຽດນາມ ທີ່ໄດ້ເອົາໃຈໃສ່ສິດສອນ, ສຶກສາອົບຮົມ, ສົ່ງຄວາມຮູ້ຄວາມສາມາດ ແລະ ອຳນວຍຄວາມສະດວກທຸກຢ່າງໃຫ້ແກ່ນ້ອງນັກຮຽນລາວຕະຫຼອດໄລຍະ 40 ປີຜ່ານມາ. ນັບແຕ່ປີ 1980 ຮອດປັດຈຸບັນ ໂຮງຮຽນແຫ່ງນີ້ໄດ້ກໍ່ສ້າງ ແລະ ສິດສອນນັກຮຽນລາວລວມທັງໝົດ 5.000 ນ້ອງ ເຊິ່ງໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍສາຍພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ - ຫວຽດນາມ ກໍຄືການພົວພັນຮ່ວມມື ລະຫວ່າງສະຖານທູດກັບໂຮງຮຽນ T80 ແຫ່ງນີ້.
ພ້ອມດຽວກັນນີ້, ທ່ານທູດຍັງໄດ້ຕີລາຄາສູງຕໍ່ການເສຍສະຫຼະ, ການປະກອບສ່ວນຂອງບັນດາພໍ່ແມ່ປະຊາຊົນ, ລຸງປ້າ, ອາວອາຢູ່ໃນສະມາຄົມມິດຕະພາບ ຫວຽດນາມ-ລາວ ສາຂາເມືອງ ເຊີນເຕິຍ ຕະຫຼອດໄລຍະ 7 ປີຜ່ານມາ. ຊຶ່ງໄດ້ກາຍເປັນບັນດາຄອບຄົວທີ່ໄດ້ຮັບນັກຮຽນ, ນັກສຶກສາລາວໄປເບິ່ງແຍງ, ລ້ຽງດູ ຢູ່ໃນຄອບຄົວຂອງຕົນ.
ໂຮງຮຽນມິດຕະພາບ T80 ເປັນໂຮງຮຽນໜຶ່ງທີ່ຂຶ້ນກັບກະຊວງສຶກສາ ແລະ ກໍ່ສ້າງຂອງຫວຽດນາມ. ປັດຈຸບັນ, ມີນັກສຶກສາລາວ ຈຳນວນ 163 ຄົນ ກຳລັງຮຽນກຽມພາສາຫວຽດ ແລະ 40 ຄົນກຳລັງຮຽນຊັ້ນມັດທະຍົມຢູ່ໂຮງຮຽນແຫ່ງນີ້ ທຸກຄົນລ້ວນແຕ່ໄດ້ຮັບການເບິ່ງແຍງ, ລ້ຽງດູຈາກບັນດາພໍ່ແມ່, ລຸງປ້າ, ອາວອາຢູ່ໃນສາຂາສະມາຄົມມິດຕະພາບ ແລະ ບັນດາຄູອາຈານ, ພະນັກງານຂອງໂຮງຮຽນດ້ວຍຄວາມອົບອຸ່ນ, ສະໜິດສະໜົມຄືກັບສະມາຊິກໃນຄອບຄົວຂອງຕົນ.