ໃນໂອກາດສົ່ງທ້າຍປີເກົ່າ ພ.ສ 2561 ແລະ ຕ້ອນຮັບວັນຂຶ້ນປີໃໝ່ ພ.ສ 2562, ສະຖານເອກອັກຄະລັດຖະທູດ ແຫ່ງສປປ ລາວ ປະຈໍາ ຣາຊະອານາຈັກໄທ ທີ່ ບາງກອກ ໄດ້ຈັດງານພິທີສະເຫຼີມສະຫຼອງປີໃໝ່ລາວຂຶ້ນ​ ໃນວັນທີ 11 ເມສາ 2019,​ ໂດຍເປັນກຽດເຂົ້າຮ່ວມຂອງ ສົມເດັດ ພະເທບພະຣັດຣາຊະສຸດາ ສະຫຍາມບໍຣົມຣາຊະກຸມາຣີ; ທ່ານສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ; ທ່ານ ດອນ ປຣະມັດວິໄນ, ລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກໄທ; ປະທານສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ; ທ່ານ ແສງສຸຂະທິວົງ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ຣາຊະອານາຈັກໄທ ແລະ ທ່ານ ກຽດຕິຄຸນ ຊາດປຣະເສີດ, ເອກອັກຄະລັດຖະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ພ້ອມດ້ວຍພັນລະຍາ; ກົງສຸນໃຫຍ່ ແຫ່ງ ສປປ ລາວ ທີ່ ຂອນແກ່ນ;ເຈົ້າໜ້າທີ່ສໍານັກພະຣາຊະວັງ; ບັນດາແຂກທີ່ມີກຽດ ທັງພາກລັດ ແລະ ເອກະຊົນ ລວມທັງຊຸມຊົນ ລາວ-ໄທ ເຂົ້າຮ່ວມຢ່າງຫລວງຫລາຍ.

          ໃນໂອກາດອັນເປັນສິລິມົງຄຸນ ແລະ ສະຫງ່າລາສີນີ້, ສະຖານເອກອັກຄະລັດຖະທູດ ໄດ້ຈັດພິທີບາສີສູ່ຂວັນຕາມຮີດຄອງປະເພນີ ໂດຍຈັດພິທີຕັກບາດ, ບາສີສູ່ຂວັນໃຫ້ ສົມເດັດ ພະເທບພະຣັດຣາຊະສຸດາ ສະຫຍາມບໍຣົມຣາຊະກຸມາຣີ ແລະ ອວຍໄຊໃຫ້ພອນໂຊກດີປີໃໝ່ເຊິ່ງກັນ ແລະ ກັນ.ພິທີດັ່ງກ່າວທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຮັບກຽດຂຶ້ນກ່າວອວຍພອນປີໃໝ່ ແລະ ອວຍພອນວັນຄ້າຍວັນເກີດແດ່ ສົມເດັດ ພະເທບພະຣັດຣາຊະສຸດາ ສະຫຍາມບໍຣົມຣາຊະກຸມາຣີ ຈົ່ງມີພະກະເສມສຳຣານຍິ່ງຍືນນານ, ພ້ອມທັງອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ-ໄທໃຫ້ຈະເລີນງອກງາມຍິ່ງຂຶ້ນເລື້ອຍໆ ແລະ ຮ່ວມກັນຊົມການສະແດງສິລະປະຕ່າງໆ ຈາກຄະນະສິລະປະທັງ ລາວ ແລະ ໄທ.

     ໃນໄລຍະການສະເຫຼີມສະຫຼອງປີໃໝ່ລາວ ພ.ສ 2562, ສະຖານກົງສຸນໃຫຍ່ ແຫ່ງ ສປປ ລາວ ປະຈໍາ ຈັງຫວັດຂອນແກ່ນ ກໍໄດ້ຈັດງານພິທີອວຍພອນປີໃໝ່ລາວຂຶ້ນເຊັ່ນດຽວກັນ, ໂດຍການເປັນກຽດເຂົ້າຮ່ວມຂອງ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ; ທ່ານ ສົມສັກ ຈັງຕະກຸນ, ຜູ້ວ່າການຈັງຫວັດຂອນແກ່ນ; ມີບັນດາພະນັກສະຖານກົງສຸນໃຫຍ່ ແລະ ບັນດາແຂກທີ່ມີກຽດທັງ ລາວ ແລະ ໄທ ເຂົ້າຮ່ວມ.

          ການສະເຫຼີມສະຫຼອງປີໃໝ່ລາວ ພ.ສ 2562 ທີ່ ສະຖານເອກອັກຄະລັດຖະທູດ ແຫ່ງສປປ ລາວ ປະຈໍາ ບາງກອກ ແລະ ສະຖານກົງສຸນໃຫຍ່ ແຫ່ງ ສປປ ລາວ ປະຈໍາ ຈັງຫວັດຂອນແກ່ນ ໃນຄັ້ງນີ້ ແມ່ນເຕັມໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະ ເບີກບານມ່ວນຊື່ນ ຕາມຮີດຄອງປະເພນີ ແລະ ວັດທະນະທຳອັນດີງາມ ຂອງປະຊາຊົນສອງຊາດ ລາວ ແລະ ໄທ ທີ່ໄດ້ປະຕິບັດຮ່ວມກັນມາຕັ້ງແຕ່ບູຮານນະການ.

ໃນວັນທີ 06 ເມສາ 2019, ກະຊວງການຕ່າງປະເທດ ຮ່ວມກັບ ບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ໄດ້ຈັດພິທີບາສີສູ່ຂວັນສະເຫຼີມສະຫຼອງບຸນປີໃໝ່ລາວ ທີ່ ສວນພຶກສາ, ບ້ານໃໝ່ດ່ານຊີ, ເມືອງນາຊາຍທອງ, ນະຄອນຫຼວງວຽງຈັນ, ເພື່ອເປັນການສົ່ງທ້າຍປີເກົ່າ ພ.ສ 2561 ແລະ ຕ້ອນຮັບປີໃໝ່ ພ.ສ 2562. ໃນພິທີສະເຫຼີມສະຫຼອງບຸນປະເພນີປີໃໝ່ລາວໃນຄັ້ງນີ້ ເປັນກຽດເຂົ້າຮ່ວມໂດຍ ທ່ານ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ, ຄະນະພັກ-ຄະນະນໍາກະຊວງ ພ້ອມດ້ວຍຄອບຄົວ, ພະນັກງານອາວຸໂສບໍານານ, ບັນດາຄະນະຫ້ອງການ-ຄະນະກົມ, ຄະນະພະແນກ, ອົງການຈັດຕັ້ງມະຫາຊົນ ແລະ ພະນັກງານ ກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ. ພ້ອມດຽວກັນນັ້ນ ບັນດາທູຕານຸທູດ, ກົງສູນ-ກົງສູນກິດຕິມະສັກ, ຜູ້ຕາງໜ້າອົງການຈັດຕັ້ງສາກົນ ປະຈໍາ ສປປ ລາວ ພ້ອມດ້ວຍຄອບຄົວ ແລະ ແຂກ ກໍໄດ້ຮັບກຽດເຊື້ອເຊີນເຂົ້າຮ່ວມ.

 ໃນ​ຕອນ​ບ່າຍ​ຂອງ​ວັນ​ທີ 29 ມີ​ນາ 2019, ທີ່ ໂຮງແຮມ ລາວພລາຊາ, ທ່ານ ສະ​ເຫຼີມ​ໄຊ ກົມ​ມະ​ສິດ,  ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ສ​ປ​ປ ລາວ ໄດ້​ຕ້ອນ​ຮັບ​ ທ່ານ ດັກອິນ ອຸນສະເຕນ (Dag-Inge Ulstein), ລັດ​ຖະ​ມົນ​ຕີວຽກງານ​ພັດ​ທະ​ນາ​ສາ​ກົນ, ກະ​ຊວງ​ການ​ຕ່າງ​ປະ​ເທດ ແຫ່ງ ຣາ​ຊະ​ອາ​ນາ​ຈັກ ນອກ​ແວ ພ້ອມດ້ວຍຄະນະ, ໃນໂອກາດທີ່ເດີນທາງມາຢ້ຽມ​ຢາມ ສ​ປ​ປ ລາວ ຢ່າງເປັນທາງການ.