ໂດຍຕອບສະໜອງຕາມການເຊື້ອເຊີນຂອງລັດຖະບານແຫ່ງ ສປປ ລາວ, ທ່ານ ນາງ Armida Salsiah Alisjahbana, ຜູ້​ຊ່ວຍ​ເລ​ຂາ​ທິ​ການ​ໃຫ​ຍ່ ອົງການສະຫະປະຊາຊາດ (ສ​ປ​ຊ) ແລະ ທັງເປັນເລ​ຂາ​​ບໍ​ລິ​ຫານ​ງານ​ຂອງ​ຄະ​ນະ​ກຳ​ມາ​ທິ​ການ​ເສດ​ຖະ​ກິດ-ສັງ​ຄົມ ສປຊ ປະ​ຈຳ ພາກ​ພື້ນ​ອາ​ຊີ-ປາ​ຊີ​ຟິກ (UNESCAP) ພ້ອມດ້ວຍຄະນະໄດ້ເດີນ​ທາງ​ມາຢ້ຽມຢາມ ສ​ປ​ປ ລາວ ຢ່າງ​ເປັນທາງການໃນໄລຍະວັນທີ 21-23 ເມສາ 2019, ຊຶ່ງເປັນການຢ້ຽມຢາມ ສປປ ລາວ ຄັ້ງທໍາອິດພາຍຫຼັງ​ທີ່​ທ່ານ​ໄດ້​ຖືກ​ເລືອກຕັ້ງ​ເປັນ​ເລ​ຂາ​ບໍ​ລິ​ຫານ​ງານ​ຄົນ​ໃໝ່​ຂອງ​ UNESCAP. ໃນ​ໂອ​ກາດ​ມາຢ້ຽມຢາມລາວໃນຄັ້ງນີ້, ທ່ານ​ Armida Salsiah Alisjahbana ໄດ້​ມີໂອກາດເຂົ້າ​ຢ້ຽ​ມ​ຂໍ່າ​ນັບບັນດານຳ​ຂັ້ນ​ສູງ​ຂອງ ສ​ປ​ປ ລາວ​ ​ເປັນຕົ້ນ ​ທ່ານ ສົມ​ດີ ດວງ​ດີ, ຮອງ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ມົນ​ຕີ​ກະ​ຊ​ວງ​ການ​ເງິນ; ທ່ານ ສຸ​ພັນ ແກ້ວ​ມີ​ໄຊ, ລັດ​ຖະ​ມົນ​ຕີ​ກະ​ຊວງ​ແຜນ​ການ ແລະ ການ​ລົງ​ທຶນ ແລະ ທ່ານ ສະ​ເຫຼີມ​ໄຊ​ ກົມ​ມະ​ສິດ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ເພື່ອເປັນການຮັດແໜ້ນສາຍພົວພັນການຮ່ວມມືລະຫວ່າງ ສປປ ລາວ ແລະ UNESCAP ໃຫ້ແໜ້ນແຟ້ນຂຶ້ນກວ່າເກົ່າ.

ໃນຕອນບ່າຍຂອງວັນທີ 22 ເມສາ 2019, ຄະນະ​ໂຄສະນາ ​ອົບຮົມ​ສູນ​ກາງ​ພັກໄດ້ຈັດພິທີ​ປາຖະກະຖາ ກ່ຽວກັບ ສະພາບການພາກພື້ນ ແລະ ສາກົນ ແລະ ການຈັດຕັ້ງປະຕິບັດ ນະໂຍບາຍການຕ່າງປະເທດ ໃນໄລຍະໃໝ່, ໂດຍ​ການເປັນ​ກຽດ​ປາຖະກະຖາ​ຂອງ ​ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງ​ການ​ຕ່າງປະ​ເທດ, ມີ​ບັນດາຮອງເລຂາຄະນະພັກ, ຄະນະນຳຂອງບັນດາກະຊວງ-ອົງການຂັ້ນສູງກາງ, ບັນດາຫົວໜ້າ-ຮອງຫົວໜ້າສື່ມວນຊົນ, ພະນັກງານທີ່ເຮັດວຽກງານການເມືອງ-ແນວຄິດຂອງອົງການພັກ ແລະ ລັດ ​ເຂົ້າ​ຮ່ວມຢ່າງພ້ອມພຽງ.