ໃນວັນທີ 18 ມີນາ 2019, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານFrancisco de Assis Morais e Cunha Vaz Patto, ເອກອັກຄະລັດຖະທູດແຫ່ງສາທາລະນະລັດປອກຕຸຍການ ປະຈຳສປປລາວ, ຊຶ່ງມີສຳນັກງານຕັ້ງຢູ່ບາງກອກ.
ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດໄດ້ສະແດງຄວາມຍິນດີຕ້ອນຮັບອັນອົບອຸ່ນຕໍ່ ທ່ານທູດພ້ອມທັງຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ, ນັບແຕ່ ສປປລາວແລະປອກຕຸຍການໄດ້ຕັ້ງສາຍພົວພັນການທູດນຳກັນໃນວັນທີ 31 ພຶດສະພາ 1995 ເປັນຕົ້ນ, ພ້ອມກັນນັ້ນ ກໍ່ສະແດງຄວາມຍິນດີທີ່ທ່ານທູດໄດ້ກັບມາເຮັດວຽກຢູ່ ສປປ ລາວ ແລະ ເປີດຫ້ອງການກົງສຸນກິດຕິມະສັກຂອງປອກຕຸຍການ ປະຈຳ ສປປ ລາວ, ຊຶ່ງຈະເຮັດໃຫ້ການພົວພັນລະຫວ່າງ 2 ປະເທດ ໄດ້ຮັບການຂະຫຍາຍຕົວຍິ່ງໆຂຶ້ນ. ໃນປັດຈຸບັນ ສປປລາວແລະສາທາລະນະລັດປອກຕຸຍການໄດ້ມີການພົວພັນຮ່ວມມືໃນຂອບສອງຝ່າຍແລະຫຼາຍຝ່າຍຢ່າງເປັນປົກກະຕິເປັນຕົ້ນແມ່ນໃນຂອບEU ແລະASEAN – EU, ກໍຄືສປຊແລະ ທັງສອງປະເທດໄດ້ມີການແລກປ່ຽນຄະນະຜູ້ແທນລະດັບສູງນຳກັນ ແລະ ໃຫ້ການສະໜັບສະໜູນເຊິ່ງກັນແລະກັນໃນເວທີດັ່ງກ່າວ ຕະຫຼອດມາ. ນອກຈາກນີ້,ທ່ານລັດຖະມົນຕີ ສະເຫຼີມໄຊ ກົມມະສິດ ຍັງໄດ້ສະແດງຄວາມຂອບໃຈແລະຕີລາຄາສູງຕໍ່ການຊ່ວຍເຫຼືອຂອງລັດຖະບານປອກຕຸຍການໃຫ້ແກ່ສປປລາວ ໃນໄລຍະຜ່ານມາໂດຍສະເພາະການຊ່ວຍເຫຼືອປຸກສ້າງໂຮງຮຽນໃຫ້ແກ່ສປປລາວ ຈຳນວນ 03ແຫ່ງ ທີ່ ນະຄອນຫຼວງວຽງຈັນ, ແຂວງຈຳປາສັກ ແລະ ແຂວງອັດຕະປື ຊຶ່ງເປັນການປະກອບສ່ວນອັນສຳຄັນເຂົ້າໃນການສ້າງສາພັດທະນາປະເທດຊາດ. ພ້ອມກັນນັ້ນ, ທ່ານລັດຖະມົນຕີ ສະເຫຼີມໄຊ ກົມມະສິດ ຍັງໄດ້ສະເໜີໃຫ້ປອກຕຸຍການ ພິຈາລະນາເພີ່ມທະວີການຊ່ວຍເຫຼືອ ໃຫ້ແກ່ສປປລາວໃນຂະແໜງການທີ່ ປະເທດປອກຕຸຍການມີທ່າແຮງແລະສະເໜີໃຫ້ທ່ານທູດຊ່ວຍໂຄສະນາແລະ ຊຸກຍູ້ຂົນຂວາຍນັກລົງທຶນ, ນັກທຸລະກິດ ແລະ ນັກທ່ອງທ່ຽວ ຂອງ ປອກຕຸຍການເຂົ້າມາຊອກໂອກາດລົງທຶນແລະທ່ອງທ່ຽວຢູ່ສປປລາວໃຫ້ນັບມື້ຫຼາຍຂື້ນ. ໃນຕອນທ້າຍ, ທ່ານລັດຖະມົນຕີສະເຫຼີມໄຊ ກົມມະສິດ ຍັງໄດ້ອວຍພອນໄຊໃຫ້ທ່ານເອກອັກຄະລັດຖະທູດ ຈົ່ງປະສົບຜົນສໍາເລັດອັນຈົບງາມໃນການປະຕິບັດໜ້າທີ່ການທູດຂອງຕົນ ຢູ່ ສປປ ລາວ.
ໃນໂອກາດດຽວກັນ, ທ່ານFrancisco de Assis Morais e Cunha Vaz Pattoກໍໄດ້ສະແດງຄວາມຂອບໃຈຕໍ່ ທ່ານລັດຖະມົນຕີກະຊວງການຕ່າງປະເທດ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະຕີລາຄາສູງຕໍ່ການພົວພັນຮ່ວມມືອັນດີງາມ ລະຫວ່າງສອງປະເທດໃນໄລຍະຜ່ານມາ ແລະ ຢືນຢັນທີ່ຈະປະຕິບັດໜ້າທີ່ຂອງຕົນສຸດຄວາມສາມາດ ເພື່ອສືບຕໍ່ເຮັດໃຫ້ການພົວພັນຮ່ວມມືຂອງສອງຝ່າຍໄດ້ຮັບການເສີມຂະຫຍາຍໃຫ້ເຂັ້ມແຂງ ແລະ ເກີດດອກອອກຜົນຍິ່ງໆຂຶ້ນໃນຕໍ່ໜ້າ.
***************