ໃນຕອນເຊົ້າຂອງວັນທີ 6 ສິງຫາ 2019 ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີຕ່າງປະເທດ ແຫ່ງ ສປປ ລາວ ໄດ້ເປັນປະທານໃນພິທີ​​ເອົາ​ທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງອາຊຽນ ຄົບຮອບ 52 ປີ (8 ສິງຫາ 1967-8 ສິງຫາ 2019) ແລະ ສປປ ລາວ ເຂົ້າເປັນສະມາຊິກອາຊຽນ ຄົບຮອບ 22 ປີ (23 ກໍລະກົດ 1997-23 ກໍລະກົດ 2019). ເຂົ້າຮ່ວມໃນພິທີສຳຄັນຄັ້ງນີ້ ມີບັນດາລັດຖະມົນຕີທັງສາມເສົາຄໍ້າປະຊາຄົມອາຊຽນ, ບັນດາຮອງລັດຖະມົນຕີ, ເອກອັກຄະລັດຖະທູດປະເທດສະມາຊິກອາຊຽນ ແລະ ປະເທດຄູ່ເຈລະຈາອາຊຽນ ປະຈຳ ສປປ ລາວ, ຕາງໜ້າຈາກອົງການຈັດຕັ້ງສາກົນ, ຄະນະກົມ ແລະ ພະນັກງານລັດຖະກອນເຂົ້າຮ່ວມຢ່າງພ້ອມພຽງ.

ໃນວັນທີ 3 ສິງຫາ 2019, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ສ.ເກົາ​ຫລີ ຄັ້ງທີ 9 ແລະ ຂອບ​ການ​ຮ່ວມ​ມືແມ່ນໍ້າຂອງ-ຍີ່​ປຸ່ນ ຄັ້ງທີ 12ທີ່ ບາງກອກ, ປະ​ເທດ ໄທ, ຊຶ່ງມີບັນດາລັດຖະມົນຕີ ແລະ ຄະນະຜູ້ແທນ ຈາກປະເທດແມ່ນໍ້າຂອງ (ກໍາປູເຈຍ, ລາວ, ມຽນມາ, ໄທ, ຫວຽດນາມ) ແລະ ບັນດາຄູ່ຮ່ວມພັດທະນາ (ສ. ເກົາ​ຫລີ ແລະ ຍີ່​ປຸ່ນ) ເຂົ້າ​ຮ່ວມ​ຢ່າງພ້ອມພຽງ.

ໃນ​ວັນ​ທີ 2 ສິງຫາ 2019, ທີ່ ບາງກອກ, ປະເທດ ໄທ, ທ່ານ ສະ​ເຫຼີ​ມ​ໄຊ ກົມ​ມະ​ສິດ, ລັດ​ຖະ​ມົນ​ຕີ​​ຕ່າງ​ປະ​ເທດ ໄດ້​ສືບ​ຕໍ່ນໍາພາຄະນະຜູ້ແທນລາວເຂົ້າ​ຮ່ວມ ກອງ​ປະ​ຊຸມລັດ​ຖະ​ມົນ​ຕີ​​ຕ່າງ​ປະ​ເທດອາຊຽນບວກສາມ ຄັ້ງທີ 20 ແລະ ກອງປະຊຸມລັດຖະມົນຕີຕ່າງປະເທດ ຂອງກອງປະຊຸມສຸດຍອດອາຊີຕາເວັນອອກຄັ້ງທີ 9 ແລະ ກອງປະຊູມເວທີປືກສາຫາລືພາກພື້ນອາຊຽນ ຫຼື ອີເອເອັຟ ຄັ້ງທີ່ 26.