ກອງປະຊຸມເຈົ້າໜ້າທີ່ອາວຸໂສຂອບການຮ່ວມມືແມ່ນໍ້າຂອງຕອນລຸ່ມ - ສ. ອາເມລິກາ ( Lower Mekong Initiative Senior Officials’ Meeting ) ໄດ້ຈັດຂຶ້ນໃນຕອນເຊົ້າຂອງວັນທີ 7 ພຶດສະພາ 2015, ທີ່ ໂຮງແຮມ ຫຼວງພະບາງວິວ, ແຂວງ ຫຼວງພະບາງ ພາຍໃຕ້ການເປັນປະທານຮ່ວມຂອງ ທ່ານ ສົງການ ຫຼວງມຸນິນທອນ, ຫົວໜ້າກົມເສດຖະກິດ, ກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ເດນຽວ ຣັດໂຊ, ຜູ້ຊ່ວຍລັດຖະມົນຕີກະຊວງການຕ່າງປະເທດ ສະຫະລັດ ອາເມລິກາ ແລະ ມີຄະນະຜູ້ແທນຈາກບັນດາປະເທດແມ່ນໍ້າຂອງຕອນລຸ່ມ ຄື: ກໍາປູເຈຍ, ມຽນມາ, ໄທ, ສສ. ຫວຽດນາມ ​ແລະ ຜູ້ຕາງໜ້າຈາກກອງເລຂາອາຊຽນ ເຂົ້າຮ່ວມຢ່າງພ້ອມພຽງ.

ກອງປະຊຸມດັ່ງກ່າວ ໄດ້ທົບທວນຄວາມ​ຄືບ​ຫນ້າ​ຂອງການຈັດຕັ້ງປະຕິບັດບັນດາແຜນງານ ແລະ ໂຄງການຕ່າງໆຂອງຂອບການຮ່ວມມືແມ່ນໍ້າຂອງຕອນລຸ່ມ-ສ.ອາເມລິກາ ໃນໄລຍະຜ່ານມາ ແລະ ປຶກສາຫາລື ກ່ຽວກັບ ທິດທາງການຮ່ວມມືໃນຕໍ່ໜ້າ ໂດຍສະເພາະ ​ໄດ້​ພ້ອມກັນຊອກ​ຫາ​ວິທີ​ທາງ​ໃນ​ການ​ເລັ່ງລັດຈັດຕັ້ງປະຕິບັດແຜນປະຕິບັດງານຂອງຂອບຮ່ວມມືດັ່ງກ່າວ ໃນໄລຍະໃໝ່ 2016-2020 ​ແລະ ເອກະສານແນວຄວາມຄິດ ກ່ຽວກັບ ການເສີມຂະຫຍາຍການຮ່ວມມືຜ່ານໂຄງການຝຶກອົບຮົມ ໂດຍສົມທົບກັບບັນດາປະເທດເພື່ອນແມ່ນໍ້າຂອງຕອນລຸ່ມ ຄື: ອົດສະຕາລີ, ຍີ່ປຸ່ນ, ສ. ເກົາຫລີ, ນິວຊີແລນ, ສະຫະພາບເອີຣົບ, ທະນາຄານ ພັດທະນາອາຊີ ແລະ ທະນາຄານໂລກ. ທັງໝົດນີ້ ກໍເພື່ອກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງຕອນລຸ່ມ - ສ. ອາເມລິກາ ຄັ້ງທີ 9, ຊຶ່ງ ສປປລາວ ຈະ​ເປັນ​ເຈົ້າພາບຈັດຂຶ້ນໃນເດືອນ ກໍລະກົດ 2016 ທີ່ ນະຄອນຫຼວງວຽງຈັນ.