ໃນລະຫວ່າງວັນທີ 15-16 ກຸມພາ 2017, ທີ່ ນະຄອນຢາງກຸງ, ຄະນະກໍາມະການຊາຍແດນ ແຫ່ງ ສປປ ລາວ ແລະ ສສ ມຽນມາ ໄດ້ດຳເນີນກອງປະຊຸມຄັ້ງທີ XII ຂອງຄະນະກໍາມະການຊາຍແດນ ລາວ-ມຽນມາ ຂັ້ນສູນກາງ ໂດຍໄດ້ສັງເກດຕີລາຄາ ກ່ຽວກັບ ການຈັດຕັ້ງປະຕິບັດຕາມບົດ​ບັນທຶກ​ກອງ​ປະຊຸມ​ຄັ້ງ​ທີ XI ຂອງ​ຄະນະ​ກໍາມະການ​ຊາຍ​ແດ​ນ ລາວ-ມຽນມາ ຂັ້ນສູນກາງ, ສະບັບລົງ​ວັນ​ທີ 22 ທັນວາ 2013 ແລະ ຕາມສັນຍາ​ວ່າດ້ວຍການ​ຄຸ້ມ​ຄອງ ​ແລະ ຮ່ວມມື​ຕາມ​ບໍລິ​ເວນ​ຊາຍ​ແດນ ລາວ-ມຽນມາ ທີ່​ທັງສອງຝ່າຍໄດ້​ລົງ​ນາມກັນໄວ້​ໃນ​ວັນ​ທີ 29 ມີນາ 1997.

ເຂົ້າຮ່ວມກອງປະຊຸມຄັ້ງນີ້ ມີຄະນະ​ຜູ້​ແທນ​ຝ່າຍລາວ ນໍາ​ໂດຍ ​ທ່ານ ສະ​ເຫຼີ​ມ​ໄຊ ກົມມະສິ​ດ, ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ສ​ປປ ລາວ, ຫົວໜ້າ​ຄະນະ​ກໍ​າມະ​ການ​ຊາຍ​​ແດນ ລາວ-ມຽນມາ ຂັ້ນ​ສູນ​ກາງ ​ແລະ ຄະນະ​ຜູ້​ແທນ​ຝ່າຍ​ມຽນມາ ນໍາ​ໂດຍ ​ທ່ານ ອູ ກໍ​ຕິນ, ລັດຖະມົນຕີ​ແຫ່ງ​ລັດ, ຮັບຜິດຊອບ​ວຽກ​ງານ​ການ​ຕ່າງປະ​ເທດ ​ແຫ່ງ ສສ ມຽນມາ, ຫົວໜ້າ​ຄະນະ​ກໍາມະການ​ຊາຍ​ແດນ ມຽນມາ-ລາວ ຂັ້ນ​ສູນ​ກາງ ພ້ອມດ້ວຍຕົວແທນຈາກຂະແຫນງການ ແລະ ແຂວງທີ່ກ່ຽວຂ້ອງຂອງທັງສອງຝ່າຍ ເຂົ້າຮ່ວມ.

ໃນໂອກາດກ່າວ​ເປີດ​ກອງ​ປະຊຸມ, ຫົວ​ໜ້າ​ຄະນະ​ຜູ້​ແທນທັງສອງ​ຝ່າຍ ​ໄດ້​ຕີລາຄາສູງຕໍ່​ການ​ພົວພັນ​ອັນ​ໃກ້ຊິດ ລະຫວ່າງ​ ປະຊາຊົນສອງ​ຊາດ ລາວ ​ແລະ ມຽນມາ ແລະ ການ​ພົວພັນ​ຮ່ວມ​ມື​ທີ່ດີ ໃນ​ຂົງ​ເຂດ​ວຽກ​ງານ​ຊາຍ​ແດນ ​ແລະ ການ​ພັດທະນາ​ທາງ​ດ້ານເສດຖະກິດ-ສັງຄົມ ຢູ່​ຕາມ​ບໍລິ​ເວນ​ຊາຍ​ແດນ ລາວ-ມຽນມາ. ນອກນັ້ນ, ຍັງໄດ້ກ່າວເນັ້ນຢໍ້າວ່າ ການ​ຂະຫຍາຍຕົວ​ຂອງ​ການພົວພັນ​​ຮ່ວມ​ມື​ລະຫວ່າງ ລາວ ​ແລະ ມຽນມາ ​ບໍ່​ພຽງ​ແຕ່ຈະ​ເປັນ​ການ​ສ້າງຜົນ​ປະ​ໂຫຍ​ດ​ທາງດ້ານເສດຖະກິດໃຫ້​ແກ່​ປະຊາຊົນ​ຂອງສອງ​ປະ​ເທດ​ເທົ່າ​ນັ້ນ ​ແຕ່​ຍັງ​ຈະເປັນ​ການ​ສົ່ງ​ເສີມ​ສັນຕິພາບ ແລະ ຄວາມກ້າວຫນ້າ​ຂອງທັງ​ສອງ​ປະ​ເທດ ກໍຄື​ພາກ​ພື້ນ.

ກອງປະຊຸມ​ ໄດ້​ປຶກສາ​ຫາລື​ບັນຫາ​ທີ່​ພົວພັນ​ເຖິງ​ການ​ພັດທະນາ​ການ​ພົວພັນ​ຮ່ວມ​ມື ລະຫວ່າງ​ ເຈົ້າ​ໜ້າ​ທີ່​ຊາຍ​ແດນ​ຂອງ​ທັງ​ສອງ​ປະ​ເທດ ​ເຊັ່ນ: ການ​ນໍ້າ​ໃຊ້​ບັດ​ຜ່ານ​ແດນ, ດ່ານ​ຊາຍ​ແດນ, ການ​ຄ້າ​ຊາຍ​ແດນ, ກາ​ນກວດກາຫຼັກ​ໝາຍ​ຊາຍ​ແດນ, ການ​ຄວບ​ຄຸມ​ຢາ​ເສບ​ຕິດ, ການ​ເດີນ​ເຮືອ​ຕາມ​ລໍາ​ແມ່​ນໍ້າຂອງ ​ແລະ ບັນ​ຫາ​ອື່ນໆ​ທີ່​ສ້າງຜົນ​ປະ​ໂຫຍ​ດຮ່ວມ​ກັນ.

ຄະນະ​ຜູ້​ແທນ​ທັງສອງຝ່າຍ ໄດ້ທົບ​ທວນ​ຄືນ ​ແລະ ຕີ​ລາຄາ​ສູງ ​ຕໍ່​ຜົນສຳເລັດຈາ​ກການຈັດ​ຕັ້ງ​ປະຕິບັດ​ບົດ​ບັນທຶກ​ກອງ​ປະຊຸມ​ຄັ້ງ​ທີ XI ຂອງ​ຄະນະ​ກໍາມະການ​ຊາຍ​ແດນ ລາວ-ມຽນມາ ຂັ້ນ​ສູນ​ກາງ ​ວ່າ ການພົວພັນຮ່ວມມືລະຫວ່າງເຈົ້າໜ້າທີ່ຊາຍແດນຂອງທັງສອງປະເທດ ໄດ້ປະສົບຜົນສໍາເລັດອັນໃໝ່ໃນການແລກປ່ຽນຂໍ້ມູນຂ່າວສານ ແລະ ການແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເກີດຂື້ນຢູ່ຕາມບໍລິເວນຊາຍແດນ, ເຊິ່ງລວມທັງການສະກັດກັ້ນການຄ້າຂາຍຢາເສບຕິດ ແລະ ການກໍ່ອາຊະຍາກໍາອື່ນໆ.

ທັງສອງຝ່າຍ ໄດ້ເຫັນດີຊຸກຍູ້ໃຫ້ເຈົ້າໜ້າທີ່ຊາຍແດນທ້ອງຖິ່ນຂອງຕົນ ເອົາໃຈໃສ່ເພີ່ມທະວີການແລກປ່ຽນຂໍ້ມູນຂ່າວສານໃຫ້ວ່ອງໄວຂຶ້ນ ເພື່ອຮັບປະກັນຄວາມສະຫງົບສຸກ, ປ້ອງກັນການກໍ່ອາຊະຍາກໍາຂ້າມແດນ, ການຄ້າຂາຍຢາເສບຕິດ ແລະ ສິ່ງທີ່ຜິດກົດໝາຍອື່ນໆ. ນອກນັ້ນ, ໄດ້​ເຫັນ​ດີໃຫ້​ເຈົ້າ​ໜ້າ​ທີ່​ທ້ອງ​ຖິ່ນ ເຜີຍແຜ່ຄວາມຮູ້​ຄວາມເຂົ້າໃຈໃຫ້​ແກ່ປະຊາຊົນຕາມເຂດຊາຍແດນ ກ່ຽວກັບ ການເຂົ້າອອກຊາຍແດນໃຫ້ຖືກຕ້ອງຕາມກົດຫມາຍຂອງສອງປະເທດ.

ກອງປະຊຸມ​ ໄດ້​ໃຫ້ຄວາມສຳຄັນໃນການຊຸກຍູ້​ເຊິ່ງກັນ ​ແລະ ກັນ ​ເພື່ອ​ອະນຸຍາດ​ໃຫ້​ພົນລະ​ເມືອງ​ປະ​ເທດ​ທີ​ສາມ ສາມາດນໍາ​ໃຊ້​ດ່ານ​ສາກົນ ​ເພື່ອ​ສົ່ງ​ເສີມ​ການທ່ອງທ່ຽວ​, ການ​ຄ້າ ​ແລະ ​ເສດຖະກິດ ຂອງ​ສອງ​ປະ​ເທດ.