ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕອບຄຳຖາມສຳພາດຂອງສື່ມວນຊົນ ກ່ຽວກັບ ທັດສະນະຂອງ ສປປ ລາວ ຕໍ່ເຫດການທາງປະຫວັດສາດ ຂອງການພົບປະສຸດຍອດ ລະຫວ່າງ ສອງຜູ້ນຳ ສປປ ເກົາຫລີ ແລະ ສ. ອາເມຣິກາ ໃນວັນທີ 12 ມິຖຸນາ 2018, ທີ່ ປະເທດ ສິງກະໂປ, ໂດຍທ່ານໄດ້ກ່າວວ່າ ກະຊວງການຕ່າງປະເທດ ກໍໄດ້ອອກຖະແຫຼງການໃນນາມລັດຖະບານໄປແລ້ວ, ເຊິ່ງໃນນີ້, ທ່ານກໍໄດ້ຢ້ຳຄືນຕື່ມວ່າ: ລັດຖະບານລາວ ສະ​ແດງ​ຄວາມ​ຍິນ​ດີ ຕໍ່​ຜົນ​ສຳ​ເລັດ​ຂອງການ​ພົບ​ປະສຸດຍອດ ຄັ້ງ​ປະ​ຫວັດ​ສາດ ລະ​ຫວ່າງ ຜູ້​ນຳຂອງສອງປະເທດນີ້, ເຊິ່ງຜົນ​ການ​ພົບ​ປະ​ຄັ້ງ​ນີ້ ​ຈະເປັນ​ບາດ​ລ້ຽວ​ໃໝ່​ແຫ່ງ​ການ​ພົວ​ພັນ​ ລະ​ຫວ່າງ ສະຫະລັດ ອາເມຣິກາ ແລະ ສປປ ເກົາຫລີ ແລະ ​ຈະປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ​ປົກ​ປັກ​ຮັກ​ສາ​ສັນ​ຕິ​ພາບ ແລະ ສະ​ຖຽນ​ລະ​ພາບ​ ໃນ​ແຫລມ​ເກົາ​ຫລີ ແລະ ໃນໂລກ, ກ້າວໄປສູ່ການ​ສ້າງ​ແຫລມ​ເກົາ​ຫລີ ໃຫ້​ເປັນ​ເຂດປອດ​ອາ​ວຸດ​ນິວ​ເຄ​ລຍ, ທ່ານໄດ້ຢືນ​ຢັນຄືນ​ທັດ​ສະ​ນະ​ອັນ​ສະ​ເຫມີ​ຕົ້​ນ​ສະ​ເຫມີປາຍຂອງ​ ສປປ ລາວ ໃນ​ການ​ສະ​ຫນັບ​ສະ​ຫນູນ​​ການ​ສ້າງ​ແຫລມ​ເກົາ​ຫລີ​ ໃຫ້​ປອດ​ອາ​ວຸດ​ນິວ​ເຄ​ລຍດ້ວຍ​ສັນ​ຕິ​ວິ​ທີ ​ເພື່ອ​ຜົນ​ປະ​ໂຫຍດ ​ກໍຄື​ ສັນ​ຕິ​ພາບ, ສະ​ຖຽນ​ລະ​ພາບ ແລະ ການ​ຮ່ວມມື ໃນ​ແຫລມ​ເກົາຫລີ, ໃນ​ພາກ​ພື້ນ ແລະ ໃນ​ໂລກ​ໂດຍ​ລວມ.

ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະສອງຝ່າຍກັບ ທ່ານ ຊັງ ອາແຊນບອນ, ລັດຖະມົນຕີກະຊວງການຕ່າງປະເທດ ແລະ ວຽກງານເອີຣົບ ແຫ່ງ ຣາຊະອານາຈັກ ລຸກຊໍາບວກ, ຊຶ່ງຈັດຂຶ້ນໃນວັນທີ 13 ມິຖຸນາ ນີ້, ທີ່ ໂຮງແຮມ ລາວພລາຊາ, ໃນໂອກາດທີ່ ທ່ານ ຊັງ ອາແຊນບອນ ດຳເນີນການຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 12-13 ມິຖຸນາ 2018, ເພື່ອຊຸກຍູ້ສົ່ງເສີມການພົວພັນ ແລະ ຮ່ວມມື ສອງຝ່າຍ.

ໃນວັນທີ 13 ມິຖຸນາ 2018, ທີ່ ສຳນັກງານນາຍົກລັດຖະມົນຕີ, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານຊັງ ອາແຊນບອນ (Jean ASSELBORN), ລັດຖະມົນຕີກະຊວງການຕ່າງປະເທດ ແລະ ວຽກງານເອີຣົບ ແຫ່ງ ຣາຊະອານາຈັກ ລຸກຊຳບວກ ພ້ອມດ້ວຍຄະນະ, ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນລະຫວ່າງວັນທີ 12-13 ມິຖຸນາ 2018.