ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ສໍາເລັດການເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດຂອງອາຊີ ຄັ້ງທີ 24 ພາຍໃຕ້ຫົວຂໍ້: ສືບຕໍ່ເປີດກວ້າງອາຊີ - ຈະເຮັດແນວໃດ ເພື່ອໃຫ້ກ້າວໄປສູ່ ຄວາມວັດທະນາຖາວອນ ແລະ ມີສະຖຽນລະພາບ (Keeping Asia Open How to achieve Prosperity and Stability), ເຊິ່ງຈັດຂຶ້ນໂດຍ ສໍານັກງານໜັງສືພິມ ເສດຖະກິດຍີ່ປຸ່ນ ຫຼື ນິກເກ (NIKKEI), ໃນວັນທີ 11 - 12 ມິຖຸນາ 2018 ທີ່ ໂຕກຽວ, ປະເທດ ຍີ່ປຸ່ນ.

          ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ໄດ້ໃຫ້ກຽດກ່າວປາໄສ ທີ່ປິ່ນອ້ອມຫົວຂໍ້ຂອງກອງປະຊຸມຄັ້ງນີ້, ຊຶ່ງໄດ້ສະແດງທັດສະນະ ກ່ຽວກັບ ການເປີດກວ້າງການຮ່ວມມື ຂອງ ອາຊີ ໃນໄລຍະຜ່ານມາ ແລະ ບັນດາຂໍ້ລິເລີ່ມໃໝ່ໆ ທີ່ໄດ້ເກີດຂຶ້ນ ແລະ ກໍາລັງເກີດຂຶ້ນ ໃນປະຈຸບັນ ຢູ່ ອາຊີ ແລະ ໃນໂລກ ລວມທັງ ໄດ້ຊຸກຍູ້ໃຫ້ ອາຊີ ສືບຕໍ່ເປີດກວ້າງການຮ່ວມມືໃຫ້ຫຼາຍຂຶ້ນກວ່າເກົ່າ ແລະ ຊຸກຍູ້ ພາກພື້ນອື່ນ ກໍຄວນເປີດກວ້າງການຮ່ວມມື ກັບ ອາຊີ ເຊັ່ນກັນ ໃນປະຈຸບັນ ກໍຄື ອະນາຄົດ ເພື່ອປົກປັກຮັກສາສັນຕິພາບ, ສະຖຽນລະພາບ ແລະ ກ້າວໄປສູ່ຄວາມວັດທະນາຖາວອນ ຂອງ ອາຊີ ກໍຄື ຂອງ ພາກພື້ນ ແລະ ໂລກ. ພ້ອມດຽວກັນນີ້, ທ່ານ ນາຍົກລັດຖະມົນຕີ ໄດ້ໃຫ້ກຽດຕອບຄໍາຖາມ ຢູ່ໃນກອງປະຊຸມຄັ້ງນີ້ ກ່ຽວກັບ ການພັດທະນາພື້ນຖານໂຄງລ່າງການເຊື່ອມຈອດ ຢູ່ ສປປ ລາວ ເພື່ອຫັນປະເທດທີ່ບໍ່ມີຊາຍແດນຕິດກັບທະເລ ເປັນປະເທດເຊື່ອມຈອດກັບພາກພື້ນ ແລະ ຄວາມຄາດຫວັງຂອງ ສປປ ລາວ ໃນການຫຼຸດພົ້ນອອກຈາກຄວາມດ້ອຍພັດທະນາ. ນອກຈາກນີ້, ທ່ານ ນາຍົກລັດຖະມົນຕີ ໄດ້ໃຫ້ສໍາພາດຂ່າວ ກ່ຽວກັບ ການພັດທະນາເສດຖະກິດ-ສັງຄົມຂອງ ສປປ ລາວ ໃນປະຈຸບັນ ເປັນຕົ້ນແມ່ນ ນະໂຍບາຍດຶງດູດການລົງທຶນ ທັງຈາກພາຍໃນ ແລະ ຕ່າງປະເທດ, ການພັດທະນາອຸດສາຫະກໍາທີ່ມີທ່າແຮງ ເຊັ່ນ: ອຸດສາຫະກໍາປຸງແຕ່ງກະສິກໍາ, ອຸດສາຫະກໍາພະລັງງານໄຟຟ້າ ທີ່ສະອາດ ແລະ ຍືນຍົງ ແລະ ອຸດສາຫະກໍາການທ່ອງທ່ຽວ ແລະ ການພັດທະນາພື້ນຖານໂຄງລ່າງຄົມມະນາຄົມຂົນສົ່ງ ລວມທັງ ການຮ່ວມມື ແລະ ການສະໜັບສະໜູນ ຈາກ ຍີ່ປຸ່ນ.

          ຄຽງຄູ່ກັນນີ້, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ຢ້ຽມຢາມ ແລະ ພົບປະສອງຝ່າຍກັບ ພະນະທ່ານ ຊິນໂຊະ ອາເບະ, ນາຍົກລັດຖະມົນຕີ ຂອງ ຍີ່ປຸ່ນ ເພື່ອສືບຕໍ່ຮັດແໜ້ນ ຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຍີ່ປຸ່ນ ທັງລວງເລິກ ແລະ ລວງກວ້າງ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ພ້ອມນີ້, ໄດ້ເຂົ້າຮ່ວມເປັນສັກຂີພະຍານ ໃນການລົງນາມ ເອກະສານແລກປ່ຽນ ໃຫ້ທຶນການສຶກສາ JDS ມູນຄ່າ 310 ລ້ານເຢັນ ລະຫວ່າງ ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈໍາ ຍີ່ປຸ່ນ ແລະ ທ່ານ ເອກອັກຄະຣາຊະທູດ ຍີ່ປຸ່ນ ປະຈໍາ ສປປ ລາວ.

          ນອກຈາກນີ້, ທ່ານ ນາຍົກລັດຖະມົນຕີ ໄດ້ຮັບການເຂົ້າຢ້ຽມຂໍ່ານັບ ຂອງ ທ່ານ ເຈື່ອງ ຮວາ ບິງ, ຮອງນາຍົກລັດຖະມົນຕີ, ຜູ້ປະຈໍາການລັດຖະບານ ສສ ຫວຽດນາມ, ບັນດາອົງການ, ສະມາຄົມ ແລະ ບໍລິສັດຂອງຍີ່ປຸ່ນ ຈໍານວນໜຶ່ງ.