ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະສອງຝ່າຍກັບ ທ່ານ ຊັງ ອາແຊນບອນ, ລັດຖະມົນຕີກະຊວງການຕ່າງປະເທດ ແລະ ວຽກງານເອີຣົບ ແຫ່ງ ຣາຊະອານາຈັກ ລຸກຊໍາບວກ, ຊຶ່ງຈັດຂຶ້ນໃນວັນທີ 13 ມິຖຸນາ ນີ້, ທີ່ ໂຮງແຮມ ລາວພລາຊາ, ໃນໂອກາດທີ່ ທ່ານ ຊັງ ອາແຊນບອນ ດຳເນີນການຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 12-13 ມິຖຸນາ 2018, ເພື່ອຊຸກຍູ້ສົ່ງເສີມການພົວພັນ ແລະ ຮ່ວມມື ສອງຝ່າຍ.
ໃນການພົບປະຄັ້ງນີ້, ສອງຝ່າຍ ຕີລາຄາສູງການພົວພັນ ແລະ ຮ່ວມມືສອງຝ່າຍ ໃນໄລຍະຜ່ານມາ, ໄດ້ປຶກສາຫາລື ກ່ຽວກັບ ການເສີມຂະຫຍາຍການພົວພັນ ແລະ ການຮ່ວມມື ລະຫວ່າງ ສອງປະເທດໃນຕໍ່ໜ້າ, ໃນນີ້ລວມທັງການຮ່ວມມືດ້ານວິຊາການອັນຈຳເປັນຈຳນວນໜຶ່ງ ເພື່ອເປັນພື້ນຖານໃຫ້ແກ່ການເປີດກວ້າງການຮ່ວມມືດ້ານເສດຖະກິດ-ການຄ້າ, ການລົງທຶນ ແລະ ການຮ່ວມມື ເພື່ອການພັດທະນາລາວ-ລຸກຊໍາບວກ. ນອກຈາກນັ້ນ, ຍັງໄດ້ມີການແລກປ່ຽນຄຳຄິດເຫັນຕໍ່ບັນຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.
ນອກຈາກການພົບປະກັບ ທ່ານ ສະເຫຼີມໄຊ ກົມມະສິດ, ຄູ່ຮ່ວມຕໍາແໜ່ງແລ້ວ, ທ່ານ ຊັງ ອາແຊນບອນ ຍັງໄດ້ພົບປະກັບ ທ່ານ ປອ. ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະ ການລົງທຶນ ແລະ ຢ້ຽມຢາມສະຖາບັນການທ່ອງທ່ຽວ ແລະ ການໂຮງແຮມແຫ່ງຊາດ, ຢ້ຽມຢາມສະຖາບັນຫົວໃຈ ລາວ-ລຸກຊຳບວກ, ຢ້ຽມຢາມ ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ ເພື່ອພົບປະໂອ້ລົມກັບນັກສຶກສາ ແລະ ຢ້ຽມຢາມໂຄງການຮ່ວມມືສອງຝ່າຍ ທີ່ກຳລັງຈັດຕັ້ງປະຕິບັດ ຢູ່ມະຫາວິທະຍາໄລແຫ່ງຊາດ ໃນປັດຈຸບັນ. ການຢ້ຽມຢາມ ສປປ ລາວ ຂອງ ທ່ານ ຊັງ ອາແຊນບອນ ແລະ ຄະນະ ໃນຄັ້ງນີ້ ເປັນຂີດໝາຍອັນສຳຄັນໃນການສົ່ງເສີມການພົວພັນ ແລະ ການຮ່ວມມືຂອງສອງປະເທດ ໃຫ້ມີບາດກ້າວໃໝ່.
ນັບແຕ່ປີ 1997 ເປັນຕົ້ນມາ, ການຊ່ວຍເຫຼືອຂອງ ລຸກຊຳບວກ ໃຫ້ແກ່ ສປປ ລາວ ມີລັກສະນະເພີ່ມຂຶ້ນ, ມາຮອດປັດຈຸບັນ, ມີຫຼາຍໂຄງການກຳລັງໄດ້ຮັບການຈັດຕັ້ງປະຕິບັດໃນຫຼາຍຂະແໜງການ ທັງໃນຂອບສອງຝ່າຍ ແລະ ຫຼາຍຝ່າຍ ເຊັ່ນ: ຂະແໜງສາທາລະນະສຸກ, ການພັດທະນາຊົນນະບົດ, ການພັດທະນາຊັບພະຍາກອນມະນຸດ, ການບໍລິຫານການທ່ອງທ່ຽວ ແລະ ໂຮງແຮມ, ການປົກຄອງ ແລະ ການສຶກສາດ້ານກົດໝາຍ, ແຜນການຮ່ວມມືໄລຍະຍາວ ລະຫວ່າງ ລັດຖະບານ ລາວ ແລະ ລັດຖະບານ ລຸກຊໍາບວກ (ICP1)ໄລຍະແຕ່ປີ 2003-2006 ມູນຄ່າ 18 ລ້ານເອີໂຣ, ICP2 ໄລຍະແຕ່ປີ 2007-2010 ມູນຄ່າ 35 ລ້ານເອີໂຣ, ICP3 ໄລຍະແຕ່ປີ 2011-2015 ມູນຄ່າ 50 ລ້ານເອີໂຣ, ອັນທີ່ພົ້ນເດັ່ນກ່ວາໝູ່ແມ່ນ ICP4 ໄລຍະແຕ່ປີ 2016-2020, ມູນຄ່າ 75 ລ້ານເອີໂຣ.