ໃນວັນທີ 9 ພະຈິກ 2022, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ເອມໍ ອັບເດວ ຄາເດີ (Amal Abdel Kader), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ອາຣັບ ເອຢິບ ປະຈຳ ສປປ ລາວ, ເຊິ່ງ ມີສຳນັກງານສະຖານທູດ ຕັ້ງຢູ່ ຮ່າໂນຍ, ສສ ຫວຽດນາມ.
ໃນຕອນເຊົ້າວັນທີ 07 ພະຈິກ 2022 ທີ່ ກະຊວງການຕ່າງປະເທດ, ໄດ້ມີການຈັດກອງປະຊຸມສະຫຼຸບການເຄື່ອນໄຫວວຽກງານກວດກາຂອງກະຊວງການຕ່າງປະເທດ ປະຈຳປີ 2021, 2022 ແລະ ທິດທາງແຜນການໃນຕໍ່ໜ້າ, ໂດຍການໃຫ້ກຽດເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ເຊິ່ງມີຄະນະພັກ-ຄະນະນໍາກະຊວງ, ບັນດາເລຂາໜ່ວຍພັກ, ບັນດາຄະນະກົມ, ສະມາຊິກພັກ, ພະນັກງານ-ລັດຖະກອນ ຂອງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໂດຍອີງຕາມການຕົກລົງເຫັນດີຂອງ ລັດຖະບານ ແຫ່ງ ສປປ ລາວ ແລະ ຮົງກາຣີ ກ່ຽວກັບ ການເຫັນດີເປີດສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ຮົງກາຣີ ຄືນໃໝ່, ໃນວັນທີ 03 ພະຈິກ 2022, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ປີເຕີ ຊີຢາໂຕ (Péter SZIJJÁRTÓ), ລັດຖະມົນຕີກະຊວງການຕ່າງປະເທດ ແລະ ການຄ້າ ຮົງກາຣີ ໄດ້ເປັນກຽດເຂົ້າຮ່ວມພິທີເປີດຄືນສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ຮົງກາຣີ ຢ່າງເປັນທາງການ, ໂດຍມີບັນດາທູຕານຸທູດ, ຄະນະກົມ, ຄະນະພະແນກ, ພະນັກງານວິຊາການຂອງສອງຝ່າຍ ແລະ ແຂກຖືກເຊີນຈາກພາກສ່ວນກ່ຽວຂ້ອງ ເຂົ້າຮ່ວມຢ່າງພ້ອມພຽງ.