ວັນທີ 30 ສິງຫາ 2023, ທີ່ເຮືອນຮັບແຂກລັດຖະບານໄດ້ມີພິທີປະດັບ ຫຼຽນໄຊແຮງງານຊັ້ນ I  ຈາກພັກ ແລະ ລັດ ແຫ່ງສາທາລະນະລັດ ສັງຄົມນິຍົມ ຫວຽດນາມ ໃຫ້ສະຫາຍແສງເພັດ  ຮຸ່ງບຸນຍວງ,  ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ  ລາວ ປະຈຳ ສສ ຫວຽດນາມ  ເປັນກຽດປະດັບໂດຍ ສະຫາຍ ບຸຍ ແທັງ ເຊີນ, ກຳມະການສູນກາງພັກ, ລັດຖະມົນຕີ ກະຊວງການຕ່າງ ປະເທດຫວຽດນາມ.

ໃນພິທີປະດັບຫຼຽນໄຊ, ສະຫາຍ ບຸ່ຍ ແທງ ເຊີນໄດ້ຕີລາຄສູງຕໍ່ຜົນງານການເຄື່ອນໄຫວ ຂອງ ສະຫາຍ ແສງເພັດ ຮຸ່ງບຸນຍວງ ໃນຕະຫຼອດໄລຍະທີ່ມາດຳລົງຕຳແໜ່ງ ເປັນເອກອັກ ຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ຊຶ່ງເປັນໄລຍະທີ່ມີລັກສະນະພິເສດເນື່ອງຈາກວ່າຖືກກັບໄລຍະການແຜ່ລະບາດຂອງເຊື້ອພະຍາດໂຄວິດ-19 ຢູ່ທົ່ວໂລກ ກໍຄືຢູ່ ລາວ ແລະ ຫວຽດນາມ ເຊິ່ງໄດ້ສົ່ງຜົນກະທົບ ຢ່າງຮ້າຍແຮງ ຕໍ່ມວນມະນຸດ ໂດຍສະເພາະແມ່ນການໄປມາຫາສູ່ ແລະ ລວມທັງກະທົບ ຕໍ່ການເຄື່ອນໄຫວ ວຽກຕ່າງໆ, ແຕ່ເຖິງຢ່າງໃດກໍຕາມ ຕະຫຼອດໄລຍະປະຈໍາການ ຢູ່ຫວຽດນາມ ສະຫາຍເອກອັກ ຄະລັດຖະທູດ ໄດ້ໃຫ້ຄວາມສຳຄັນ ເປັນຢ່າງຍິ່ງ ຕໍ່ການຊຸກຍູ້ ສົ່ງເສີມສາຍ ພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງປະເທດ ໃຫ້ເຂົ້າສູ່ ການຈັດຕັ້ງປະຕິບັດມີໝາກຜົນຕົວຈິງ, ເປັນຕົ້ນການກະກຽມໃຫ້ແກ່ການແລກປ່ຽນ ການຢ້ຽມ ຢາມຂອງການນຳຂັ້ນສູງສອງປະເທດ ຂອງເລຂາ ທິການໃຫຍ່, ປະທານ ປະເທດ, ນາຍົກລັດຖະມົນຕີ, ປະທານສະພາ ຕະຫຼອດຮອດ ບັນດາ ການນຳ, ວິຊາການ ຂອງບັນດາກະຊວງ, ຂະແໜງການ ທັງສູນກາງ ແລະ ທ້ອງຖິ່ນ; ຊຸກຍູ້ການຈັດຕັ້ງປະຕິບັດ ການຕົກລົງຂອງການນໍາຂັ້ນສູງ ກໍ່ຄືຂໍ້ຕົກລົງຂອງບັນດາ ກະຊວງ ຂະແໜງການສູນກາງ ແລະ ທ້ອງຖິ່ນ ຂອງສອງຝ່າຍ, ຊຸກຍູ້ອໍານວຍຄວາມສະ ດວກໃຫ້ແກ່ ການໄປມາຫາສູ່ເຊິ່ງກັນແລະກັນ ລະຫວ່າງປະຊາ ຊົນສອງປະເທດ, ອັນສໍາຄັນ ໄດ້ກະກຽມໃຫ້ແກ່ ການພົບປະ ລະຫວ່າງ ສອງກົມການ ເມືອງປະຈໍາປີ 2020; 2021; 2022 ແລະ 2023; ກອງປະຊຸມ ຄັ້ງທີ 42, 43, 44, 45 ຂອງຄະນະກໍາມະການ ຮ່ວມມືລະຫວ່າງສອງລັດຖະບານ ເປັນຕົ້ນ. ພິເສດ ແມ່ນຊຸກຍູ້ການຈັດກິດຈະກໍາ ການສະເຫຼີມ ສະຫຼອງປີສາມັກຄີມິດຕະພາບປີ 2022 ເພື່ອ ສະເຫຼີມສະຫຼອງສອງວັນປະຫວັດສາດ ທີ່ສຳຄັນ ຂອງສອງຊາດຄື: ວັນສ້າງຕັ້ງສາຍພົວ ພັນການທູດ ຄົບຮອບ 60 ປີ (5/9/1962 – 5/9/2022) ແລະ ວັນເຊັນສົນທິສັນຍາ ມິດຕະພາບລາວ-ຫວຽດນາມ ຄົບຮອບ 45 ປີ (18/7/1977 – 18/7/2022). ຫຼາຍກິດຈະກໍາ ຢ່າງເປັນຂະບວນຄຶກຄືນ ໃນຂອບເຂດ ທົ່ວປະເທດ ຂອງທັງສອງປະເທດ. ເຫັນໄດ້ ຜົນງານການ ປະກອບສ່ວນອັນສຳຄັນດັ່ງກ່າວ ຂອງສະຫາຍ ເອກອັກຄະລັດຖະທູດ ເຂົ້າໃນການເສີມ ຂະຫຍາຍ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ - ຫວຽດນາມ, ພັກ ແລະ ລັດຖະບານ ແຫ່ງ ສສ ຫວຽດນາມ ຈຶ່ງໄດ້ຕົກລົງປະດັບຫຼຽນໄຊແຮງງານ ຊັ້ນ 1 ໃນໂອກາດສໍາເລັດໜ້າທີ່ປະຈຳການ ຄັ້ງນີ້.

ໃນວັນທີ 22 ສິງຫາ 2023, ທີ່ ສະຖານເອກອັກຄະລັດຖະທຸດ ແຫ່ງ ສປປ ລາວ ປະຈຳ ສສ ຫວຽດນາມ  ໄດ້ມີພິທີມອບ-ຮັບເຄື່ອງຊ່ວຍເຫຼືອຈາກ ບໍລິສັດ ແຟຊັ່ນ Elise ຈຳກັດ  ເພື່ອສົ່ງໄປໃຫ້ປະຊາຊົນທີ່ທຸກຍາກຂອງລາວ, ໂດຍມີການເຂົ້າຮ່ວມຂອງ ທ່ານ ຈັນທະພອນ ຄໍາມະນີຈັນ, ທີ່ປຶກສາ, ຮອງຫົວໜ້າສຳນັກງານສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ, ທ່ານ Tokuo Yotaro, ຜູ້ອຳນວຍການບໍລິຫານ (Principal) ບໍລິສັດ ແຟຊັ່ນ Elise ຈຳກັດ ພ້ອມດ້ວຍພະນັກງານຂອງທັງສອງຝ່າຍ ເຂົ້າຮ່ວມ.

ໃນວັນທີ 28 ກໍລະກົດ 2023, ໜ່ວຍແມ່ຍິງສະຖານທູດລາວ ທີ່ ແບກແລງ ໄດ້ຈັດພິທີປາຖະກະຖາ ເພື່ອເຜີຍ ແຜ່ເອກະສານປະຫວັດມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ ແລະ ການເຄື່ອນໄຫວອັນພົ້ນເດັ່ນ ຂອງອົງການ ຈັດຕັ້ງສະຫະພັນແມ່ຍິງລາວ ຄົບຮອບ 68 ປີ, (20 ກໍລະກົດ 1955 - 20 ກໍລະກົດ 2023) ພາຍໃຕ້ການເປັນປະທານ ຂອງສະຫາຍ ນາງ ວານິດາ ວໍລະສານ, ພັນລະຍາເອກອັກຄະລັດຖະທູດລາວ ປະຈໍາ ເຢຍລະມັນ ໂດຍຕາງໜ້າໜ່ວຍ ແມ່ຍິງສະຖານທູດ ໃຫ້ກຽດບັນລະຍາຍ ເອກະສານປະຫວັດມູນເຊື້ອຂອງອົງການຈັດຕັ້ງສະຫະພັນແມ່ຍິງລາວດັ່ງກ່າວ ໂດຍມີການເຂົ້າຮ່ວມຂອງທ່ານ ໄມບົວ ໄຊຍະວົງ, ເອກອັກຄະລັດຖະທູດລາວ ປະຈໍາ ເຢຍລະມັນ, ເອື້ອຍນ້ອງແມ່ຍິງ ສະຖານທູດ, ອົງການຈັດຕັ້ງມະຫາຊົນ ແລະ ພະນັກງານສະຖານທູດລາວ ປະຈໍາ ແບກແລງ. ໃນໂອກາດດັ່ງກ່າວ, ປະທານ ໄດ້ຍົກໃຫ້ເຫັນເຖິງປະຫວັດມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ ແລະ ການເຄື່ອນໄຫວອັນພົ້ນເດັ່ນ ຂອງອົງການຈັດຕັ້ງຂອງສະຫະພັນແມ່ຍິງລາວ ຕະຫຼອດໄລຍະຜ່ານມາ, ບໍ່ວ່າຈະເປັນໃນໄລຍະຕໍ່ສູ້ກູ້ຊາດໃນເມືອກ່ອນ ກໍຄື ໃນໄລຍະແຫ່ງການສ້າງສາ ແລະ ພັດທະນາປະເທດຊາດ ໃນປັດຈຸບັນ, ຊຶ່ງເອື້ອຍນ້ອງແມ່ຍິງລາວ ຍາມໃດ ກໍ່ເຮັດວຽກຄ່ຽງບ່າຄຽງໄຫຼ່ກັບອ້າຍນ້ອງຊາຍ ປະກອບສ່ວນສ້າງຜົນງານຢ່າງບໍ່ຮູ້ອິດຮູ້ເມື່ອຍ ເພື່ອຍົກສູງບົດບາດ ຂອງແມ່ຍິງລາວ ຂຶ້ນສູ່ເວທີພາກພື້ນ ແລະ ສາກົນ.